ކުލަގަދަ ރަސްމިއްޔާތަކުން ޓޯކިއޯ އޮލިމްޕިކްސް ހުޅުވައިފި

ޓޯކިއޯ އޮލިމްޕިކްސް ސްޓޭޑިއަމުގައި ބޭއްވި ކުލަގަދަ ރަސްމިއްޔާތަކުން ދުނިޔޭގެ އެންމެ ބޮޑު ކުޅިވަރު އީދު އޮލިމްޕިކް ގޭމްސް 2020 ރަސްމީކޮށް ފަށައިފިއެވެ.

ދުނިޔޭގެ 200 ށްވުރެ ގިނަ ގައުމުން ބައިވެރިވާ ގޭމްސް ރަސްމީކޮށް ހުޅުވުމުގެ ރަސްމިއްޔާތު ހުކުރު ދުވަހުގެރޭ ބޭއްވިއިރު، އޮލިމްޕިކްސް ހުޅުވުމުގެ ގޮތުން ދަންމަރު ރޯކޮށްދިނީ ޖަޕާނުގެ ޓެނިސް ތަރި ނައޯމީ އޮސާކާއެވެ. މި ރަސްމިއްޔާތުގައި ޖަޕާނުގެ ތާރީޚާއި ސަގަފީ ހަރަކާތްތައް ދައްކާލިއިރު، ރަސްމިއްޔާތު ބަލަން 68,000 މީހުންގެ ޖާގައިގެ ސްޓޭޑިއަމަށް ވައްދާފައިވަނީ 1،000 ށްވުރެ މަދު މީހުންނެވެ.

ހުޅުވުމުގެ ރަސްމިއްޔާތުގެ އެންމެ ހާއްސަ ބަޔަކީ، ގައުމުތަކުގެ ކޮންޓިންޖެންޓުގައި ހިމެނޭ މެންބަރުން ތައާރަފުވުމަށް ސްޓޭޑިއަމް ވަށައި ހިނގާލުމެވެ. މި ހިނގާލުމުގައި ފެނިގެން ދިޔަ އެންމެ ކުޑަ އެއް ކޮންޓިންޖެންޓަކީ ދިވެހިރާއްޖޭގެ ފަޚުރުވެރި އެތުލީޓުންނާއި އޮފިޝަލުން ހިމެނޭ ކޮންޓިންޖެންޓެވެ.

މި ރަސްމިއްޔާތުގައި ދިވެހި ދިދަ އުފުލާލީ ފެތުންތެރިޔާ މުބާލް އައްޒާމް އިބްރާހީމާއި ބެޑްމިންޓަން ކުޅުންތެރިޔާ ފާތިމަތު ނަބާހާއެވެ. މި ފަހަރުގެ އޮލިމްޕިކްސްގައި މުޅިން އަލަށް ދިދަ އުފުލުގެ ފުރުސަތު އަންހެން އެތުލީޓަކާއި ފިރިހެން އެތުލީޓަކަށް ދޭން އިންޓަނޭޝަން އޮލިމްޕިކް ކޮމިޓީ (އައިއޯސީ) އިން ނިންމީ މިންތީގެ ހަމަހަމަކަމަށް ތާއީދުކުރުމުގެ ގޮތުންނެވެ. މި ފަހަރުގެ އޮލިމްޕިކްސްގައި ރާއްޖެއިން ހަތަރު އެތުލީޓަކު ވާދަކުރާނެއެވެ. އެއީ މުބާލާއި ނަބާހާގެ އިތުރުން ރާއްޖޭގެ އެންމެ ބާރު ދުވުންތެރިޔާ ހަސަން ސާއިދާއި، ފެތުންތެރިޔާ އައިޝަތު ސާޖިނާއެވެ.

ޓޯކިއޯ އޮލިމްޕިކްސް ހުކުރު ދުވަހުގެރޭ ފެށިއިރު، ގޭމްސް ކުރިއަށްދާނީ އަންނަ އޮގަސްޓް މަހުގެ އަށްވަނަ ދުވަހުގެ ނިޔަލަށެވެ. އަދި ޕެރަލިމްޕިކްސް ބާއްވަން ތާވަލުކޮށްފައިވަނީ އޮގަސްޓް މަހުގެ 24 ވަނަ ދުވަހުން ފެށިގެން ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށެވެ.

ކޮވިޑް-19 އާ ގުޅިގެން މިދިޔަ އަހަރުގެ އޮލިމްޕިކްސް މި އަހަރަށް ފަސްކުރިއިރު، މިއީ ތާރީޚުގައި އޮލިމްޕިކްސް ފަސްކުރި ފުރަތަމަ ފަހަރެވެ. މި އަހަރުގެ ހޫނު މޫސުމުގައި އޮލިމްޕިކްސް ބާއްވާ ނަމަވެސް، މި އަހަރުގެ ގޭމްސްގައިވެސް ބޭނުންކުރާނެ ނަމަކީ "ޓޯކިއޯ އޮލިމްޕިކްސް 2020" އެވެ.