ފާކިސްތާނުން އެންމެ ގިނައިން މަސްތުވާތަކެތި އެތެރެކުރާ ގައުމުތަކުގެ ތެރޭގައި ރާއްޖެ ހިމެނިފައިވާކަމަށް ރިޕޯޓުކޮށްފިއެވެ.

މި ސަރަހައްދުގެ ގައުމުތަކަށް އެންމެ ގިނައިން މަސްތުވާތަކެތި އެތެރެ ކުރަނިީ އަފްޣާނިސްތާން، އީރާން އަދި ޕާކިސްތާނުންނެވެ. މަސްތުވާތަކެތި އެންމެ ގިނައިން ގައުމުތަކަށް އެތެރެކުރަނީ ކަނޑުމަގުންނެވެ. މިކަން ހުއްޓުވުމަށް ޕާކިސްތާނާއި އަފްޣާނިސްތާން ބޯޑަރު ބަލަހައްޓަމުން ދިޔަނަމަވެސް މިކަން ވަނީ ކާމިޔާބުވާ ގޮތް ނުވެފައެވެ.

މިއަހަރުގެ އެޕްރީލް މަހުގެތެރޭގައިވެސް އިންޑިއާގެ ކަނޑުގެ ސިފައިން ވަނީ 3000 ކްރޯޑްގެ އަގުހުރި މަސްތުވާތަކެތި އަތުލައިގަނެފައެވެ. ސްރީލަންކާގެ ކަނޑުގެ ސިފައިންވެސް ވަނީ 605 ކިލޯގެ 'ކްރިސްޓަލް މެތް' އަދި 579 ކިލޯގެ ކެޓަމައިންވެސް އަތުލައިގަނެފައެވެ. މިއާއެކު ޕާކިސްތާނުގެ 9 ފަޅުވެރިންވެސްވަނީ އަތުލައިގަނެފައެވެ.

ޕާކިސްތާނުގެ ގްވާދަރުން އެންމެ ގިނައިން މަސްތުާތަކެތި އެތެރެކުރާ ގައުމުތަކުގެ ތެރޭގައި ރާއްޖެވެސް ހިމެނެއެވެ. ދެން އެ ލިސްޓުގައި ހިމެނެނީ ސްރީލަންކާއެވެ.

މަސްތުވާތަކެތި ބޯޓުތަކަށް ބަރުކުރަނީ ގްވާދަރުންނެވެ. "މިކަމުގެ އަޑީގައި ބަޔަކު ތިބެގެން ކުރާކަމެއް މިއީ. އެހެން ނޫންނަމަ މިހާ ބައިވަރު މަސްތުވާތަކެތި ބަރުކޮށްގެން ބޯޓުތަކަށް ފުރައިގެން ނުދެވޭނެ." ޒީ ނިއުސްއަށް މައުލޫމާތުދިން މީހަކު ބުނެފައިވެއެވެ.

ދޭތެރެދޭތެރެއިން ގިނަ އަދަދުތަކުން މަސްތުވާތަކެތި ރާއްޖެއެތެރެކުރާ މީހުން އަތުލައިގަނެ އެވެ. އަދި ބޭރުގެ ކަނޑު ބޯޓު ފަހަރުތަކުން ރާއްޖެއަށް މަސްތުވާތަކެތި އެތެރެކުރަމުންދާއިރު، ވައިގެ މަގުން މަސްތުވާތަކެތި އެތެރެކުރާ މީހުންވެސް ދޭތެރެދޭތެރެއިން ހައްޔަރު ކުރެވެއެވެ.

ރާއްޖެއާއި، އިންޑިއާ އަދި ސްރީލަންކާގެ ސިފައިން ގުޅިގެން ހިންގި އޮޕަރޭޝަނެއްގައި 2019 ވަނަ އަހަރުގެ އޮކްޓޯބަރ މަހުގައި ރާއްޖެ ސަރަހައްދުން 150 ކިލޯގެ މަސްތުވާތަކެތި އަތުލައިގެންފައިވެއެވެ. މިއީވެސް ޕާކިސްތާނުން ފުރައިގެން ދަތުރުކުރަނިކޮށް ރާއްޖޭގެ ކަނޑުގެ ސަަރަހައްދުން އަތުލައިގަނެފައިވާ ބޯޓެކެވެ. ހަމަ އެއަހަރު އީރާން ބޯޓެއްވެސް 51 ކިލޯގެ މަސްތުވާތަކެއްޗާއެކު ރާއްޖޭގެ ކަނޑުގެ ސަރަހައްދުންވަނީ އަތުލައިގަނެފައެވެ.

ފަހަކަށް އައިސް ކަނޑުމަގުން ރާއްޖެއަށް އެތެރެކުރުމަށް މަސައްކަތްކުރި މަސްތުވާތަކެތިވަނީ އަތުލައިގަނެފައެވެ.