ވެކްސިން ޖަހައިފިނަމަ ޖިންނިމޮޔަވާ ކަމަށް ބުނެފި

ކޮވިޑް-19އިން ދިފާއުވުމަށް ވެކްސިން ޖަހައިފިނަމަ ޖިންނި މޮޔަވާ ކަމަށް ބުނެ, މެކްސިކޯގައި ވަޓްސްއަޕް މެދުވެރިކޮށް ދޮގު މައުލޫމާތު ފަތުރައި، މީހުންނަށް ބިރުދައްކަމުންދާ ކަމަށް މީޑިއާ ރިޕޯޓުތައް ބުނެފިއެވެ.

މެކްސިކޯގެ އަވަށެއް ކަމަށްވާ ކޮކުއިލްޓީލްގެ އިތުރުން، އާބާދީ މަދު ބައެއް ހިސާބުތަކުގައި، ވަޓްސްއަޕް ގްރޫޕްތަކުގައި ކޮވިޑް ވެކްސިނާ ގުޅިގެން ދޮގު އެތައް ޚަބަރެއް ފަތުރަައި، މީހުން ވެކްސިން ޖެހުމާ ދެކޮޅުހެދުމަށް ބާރުއަޅާފަދަ ވާހަކަތަކެއް ފެތުރެމުންދާ ކަމަށް މީޑިއާތަކުގައި ރިޕޯޓު ކޮށްފައިވެއެވެ.

އެގޮތުން ވެކްސިނަކީ ގައުމުގެ އާބާދީ މަދު ކުރުމަށްޓަކައި އެގައުމުގެ ސަރުކާރުން ހިންގާ ޕްރޮޕެގެންޑާއެއް ކަމަށާއި، ވެކްސިން ޖަހައިފިނަމަ ދެއަހަރުގެ ތެރޭގައި އިންސާނުން މަރުވާނެ ކަމަށް ޚަބަރުތައް ދަނީ ފަތުރަމުންނެވެ.

އަދި ވެކްސިނުން ޖިންނި ޝައިތޯނުންގެ އުނދަގޫވާކަމަށާއި، އުފާވެރިކަމުން މީހާ މަހުރޫމްކޮށްލާ ކަމަށް މީހުންނަށް ދަނީ ކިޔައިދެމުންނެވެ. މީގެ ސަބަބުން އެ ސަރަހައްދުތަކުގައި ދިރިއުޅެމުންދާ މީހުން ދަނީ ވެކްސިން ޖެހުމަށް ދެކޮޅުހަދައި، އެ ގައުމުގެ ސަރުކާރާމެދު އިތުބާރެއް ނެތް ކަމަށް ބުނަމުންނެވެ.

މީގެ އިތުރުން އެގައުމުގެ ބައެއް ހިސާބުތަކަށް ކޮވިޑް ނުފެތުރޭނެ ކަމަށާއި، އެމީހުންނަށް ކޮވިޑުގެ އެއްވެސް ނުރައްކަލެއް ނެތް ކަމަށް ބުނެ ވެކްސިނާ ދެކޮޅު ހަދަމުންދާ މީހުންވެސް ދަނީ އިތުރުވަމުންނެވެ.

މެކްސިކޯގައި ވެކްސިން ޖަހާފައިވާ މީހުންގެ އަދަދު ނިސްބަތުން މަދު ކަމަށް ތަފާސްހިސާބުތައް ދައްކައެވެ. އެގޮތުން ވެކްސިނުގެ އެއް ޑޯޒް ފުރިހަަމަ ކޮށްފައިވަނީ އެގައުމުގެ އާބާދީގެ 30 އިންސައްތަ މީހުންނެވެ.