މެކްސިކޯއަށް އައި ބާރުގަދަ ބިންހެލުމާއެކު ސުނާމީގެ އިންޒާރު

ސެންޓްރަލް މެކްސިކޯއަށް 7.6 މެގްނިޓިއުޑްގެ ބިންހެލުމެއް އަތުވެއްޖެއެވެ.

ސެޕްޓެމްބަރު 19 ވަނަ ދުވަހު މެކްސިކޯއަށް ބާރުގަދަ ބިންހެލުމެއް އައިސްފައިވާއިރު، 1985 އަދި 2017 ވަނަ އަހަރުގެ ސެޕްޓެމްބަރު 19 ގައިވެސް އެ ގައުމަށް ބާރުގަދަ ބިންހެލުމެއް އައިސްފައިވެއެވެ.

ބިންހެލުން އައިސްފައިވަނީ މެކްސިކޯ ގަޑިން 13:05 ގައި ކަމަށް ރޮއިޓަރސްގައި ރިޕޯޓުކޮށްފައިވެއެވެ. އަދި މިއާއެކު ޕެސިފިކް ސުނާމީ ވާރނިން ސެންޓަރުން ވަނީ ސުނާމީގެ އިންޒާރެއް ނެރެފައެވެ.

ބިންހެލުން އައިސްފައިވަނީ ބިންހެލުމެއް އައިސްދާނެ ހާލަތަކަށް ތައްޔާރުވުމަށް ބާއްވާފައިވާ "ނޭޝަނަަލް ޑްރިލް 2022" ނިމުނުތާ ގަޑިއިރެެއް ފަހުންނެވެ. މި ޑްރިލްގައި މިލިއަނުން މީހުން ބައިވެރިވެފައިވާއިރު، މިއީ މިފަދަ ހާލަތެއްގައި ރައްކާތެރިކަމާއެކު މީހުން އިމާރާތްތަކުން ނެރުމާއި، އަމަލުކުރަންޖެހޭ ގޮތަށް ތައްޔާރުކުރުމަށް ކުރިއަށްގެންގޮސްފައިވާ ޑްރިލްއެކެވެ.

ބިންހެލުމުގެ ސަބަބުން ލިބުނު ގެއްލުން ދެނެގަތުމުގެ މަސައްކަތް އަދިވެސް އިދާރާތަކުން ގެންދަނީ ކުރަމުންނެވެ. ބިންހެލުމުގެ އަސަރު އެންމެ ބޮޑަށް ކުރި ސަރަހައްދުތަކުގެ މީހުން ވަނީ މަގުތައް މައްޗަށް ނިކުމެފައެވެ. އަދި މީހެއްގެ ބޮލަށް ފާރެއް ވެއްޓި މަރުވެފައިވާކަމަށް ރޮއިޓަރސްގައި ރިޕޯޓުކޮށްފައިވެއެވެ.