ރަށު ފެރީ ނިޒާމުގެ ޓެސްޓު ދަތުރުތައް އޮގަސްޓުގައި

"'އިންޓަރގްރޭޓެޑް ނެޝަނަލް ޕަބްލިކް ފެރީ ނެޓްވޯރކް" ނުވަތަ ރަށު ފެރީގެ ޓެސްޓު ދަތުރުތައް، އަންނަ އޮގަސްޓު މަހު ފަށާނެ ކަމަށް އެމްޓީސީސީން ބުނެފިއެވެ.

އެމްޓީސީސީން ބުނީ ފުރަތަމަ ޒޯންގެ ދަތުރުތައް ފެށުމަށް ތައްޔާރުވަމުން އަންނައިރު، ފުރަތަމަ ފެރީ ބަނދެ ނިމުމަކާ މިހާރު ގާތްވެފައިވާ ކަމަށާއި، ފުރަތަމަ ޓެސްޓް ދަތުރުތައް އޮންނާނީ މާލެ ސަރަހައްދުގައި ކަމަށެވެ. 17 ފެރީއެއް ބަނުމަށް ނިންމާފައިވާއިރު، ބޭރުން ގެންނަ ބައެއް ސާމާނު ގެނައުމުގައި، ކޮވިޑްގެ ހާލަތާއެކު ލަސްތަކެއްވި ކަމަށް އެމްޓީސީސީގެ ސީއީއޯ އާދަމް ޢާޒިމް ވިދާޅުވިއެވެ.

Advertisement

އުތުރުގެ ރަށްރަށުގައި ޤާއިމުކުރާ ޚާއްސަ ފެރީ ޓަރމިނަލްތަކުގެ މަސައްކަތް ފަށައިގެން މިހާރު ކުރިއަށްދާ ކަމަށާއި، ފެރީގެ ނިޒާމު ފެށޭއިރު ޓަރމިނަލްތައް ހުންނާނީ ނިމިފައި ކަމަށް ޢާޒިމް ވިދާޅުވިއެވެ.

ދައުލަތުގެ ބަޖެޓުން 157 މިލިއަން ރުފިޔާ ޚަރަދުކޮށްގެން ހިންގާ މަޝްރޫއު ކުރިއަށްގެންދިޔުމުގައި ސަރުކާރުގެ ވިސްނުމަކީ، ސަބްސިޑައިޒް ކޮށްގެންވެސް "ރަށު ފެރީ"ގެ ނިޒާމު ނަގާ ކޮޅަށްޖެހުމެވެ. މުޅި ރާއްޖެ ދަތުުރުފަތުގެ ނިޒާމަކުން ގުޅާލުމަށް ސަރުކާރުން ކުރިއަށްގެންދާ މި މަޝްރޫޢުގައި އެންމެ ފުރަތަމަ ފެރީގެ ޚިދުމަތް ފަށަނީ އުތުރުގެ 3 އަތޮޅުގައެވެ. މުޅިރާއްޖެ 6 ޒޯނަކަށް ބަހާލައިގެން ކުރިއަށްގެންދާ މި މަޝްރޫޢުގެ، ބާކީހުރި ޒޯންތަކުގެ މަސައްކަތް އަންނަ އަހަރުގެ ތެރޭގައި ކުރިއަށްގެންގޮސް، 2023 ގައި މުޅި މަޝްރޫޢު އެއްކޮށް ނިންމުމަށް ސަރުކާރުންވަނީ އަމާޒުހިފާފައެވެ.

އެމްޓީސީސީ ބުނެފައިވަނީ ފެރީގެ ނިޒާމު ފަށާއިރު، މުވައްޒަފުން ނަގާނީ އެ ސަރަހައްދަކުން ކަމަށެވެ. ފުރަތަމަ ޒޯނުގައި މަސައްކަތްކުރުމަށްވެސް 80ށްވުރެ ގިނަ މުވައްޒަފުން ބޭނުންވެއެވެ.

މި ފެރީ ނެޓްވޯކްއިން 6 ރީޖަންގައި އެކުލެވޭ ހުރިހާ ރަށްތަކެއް ގުޅައިލެވޭއިރު، އެއް ރީޖަން އަނެއް ރީޖަންއާ ވެސް ގުޅިގެންދާނެއެވެ. މިގޮތަށް ފަސިންޖަރުން އުފުލާ ފެރީ ގުޅުވައިލެވިގެންދާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ. ކޮމިއުޓް ލިންކްއަކީ އެ ރީޖަންއެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކްއެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ޚާއްސަކޮށްފައިވާ ލިންކްއެވެ. އަދި ހައިވޭ ލިންކްއަކީ އެއް ރީޖަން އަނެއް ރީޖަންއާ ގުޅުވައިދޭ މައި ދަތުރުފަތުރުގެ ހަބްއެވެ.

އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ އެ ރީޖަންއެއްގައި ހިމެނޭ ހުރިހާ ރަށްތަކާއި އެންމެ ކައިރީގައި އޮންނަ ކޮމަރޝަލް ހަބްއާ ގުޅުވައިދޭނެ ޚިދުމަތެކެވެ.