2032 ގެ އޮލިމްޕިކްސް އޮސްޓްރޭލިއާގެ ބްރިސްބަންގައި

އޮސްޓްރޭލިއާގެ ސިޓީއެއް ކަމަށްވާ ބްރިސްބަންގައި 2032 ވަނަ އަހަރުގެ އޮލިމްޕިކް ގޭމްސް ބާއްވަން އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ނިންމައިފިއެވެ.

ބްރިސްބަންގައި އޮލިމްޕިކްސް ބާއްވަން އައިއޯސީން ނިންމީ ބުދަ ދުވަހު ޖަޕާނުގެ ވެރިރަށް ޓޯކިއޯގައި ބޭއްވި އައިއޯސީގެ މެންބަރު ގައުމުތަކުގެ ބައްދަލުވުމުގައި ނެގި ވޯޓަށްފަހުއެވެ. 2032 ވަނަ އަހަރުގެ އޮލިމްޕިކްސް ބްރިސްބަންގައި ބާއްވަން ފާސްކުރިއިރު، އެ އަހަރުގެ އޮލިމްޕިކްސް ބާއްވަން ބިޑް ކުރި ހަމައެކަނި ސިޓީއަކީވެސް ބްރިސްބަންއެވެ.

ބްރިސްބަން އަކީ އޮސްޓްރޭލިއާގެ ސްޓޭޓެއް ކަމަށްވާ ކުއީންސްލެންޑުގެ ވެރިރަށެވެ. ބްރިސްބަންގައި 2032 ވަނަ އަހަރުގެ އޮލިމްޕިކްސް ބާއްވާއިރު، ކުރިއަށް އޮތް އަހަރުތަކުގެ ތެރޭގައި ބްރިސްބަން ހިމެނޭ ސަރަހައްދުގައި ކުޅިވަރުގެ ބައިނަލްއަގުވާމީ ގިނަ މުބާރާތްތަކެއް ބޭއްވުމަށް ވަނީ ނިންމާފައެވެ. އެގޮތުން އަންނަ އަހަރުގެ ފީބާ އަންހެނުންގެ ބާސްކެޓްބޯޅަ ވޯލްޑް ކަޕާއި، އަންނަ އަހަރުގެ ޔޫސީއައި ރޯޑް ވޯލްޑް ޗެމްޕިއަންޝިޕުގެ އިތުރުން 2023 ވަނަ އަހަރުގެ ފީފާ އަންހެނުންގެ ވޯލްޑް ކަޕުވެސް އެ ސަރަހައްދުގައި ބޭއްވުމަށް ވަނީ ނިންމާފައެވެ.

އަދި މީގެ ކުރިން ބްރިސްބަންގެ ކައިރީގައި އޮނަން ސިޓީއެއް ކަމަށްވާ ގޯލްޑް ކޯސްޓުގައި ވަނީ 2018 ވަނަ އަހަރުގެ ކޮމަންވެލްތު ގޭމްސްވެސް ބާއްވާފައެވެ.

ބުދަ ދުވަހު ބޭއްވި އައިއޯސީގެ މެންބަރު ގައުމުތަކުހެ ބައްދަލުވުމަށްފަހު އައިއޯސީގެ ރައީސް ތޯމަސް ބާކް ވިދާޅުވީ 2032 ވަނަ އަހަރުގެ އޮލިމްޕިކްސް ބްރިސްބަންގައި ބާއްވަން ނިންމިއިރު، އެ އަހަރުގެ ގޭމްސްއަށް އެ ކޮމިޓީން ދުރާލާ ތައްޔާރުވާނެ ކަމަށެވެ. އެގޮތުން އެ އަހަރުގެ ގޭމްސް ފުރިހަމަ ގޭމްސްއަކަށް ހެދުމަށް ދުރު ރާސްތާ ޕްލޭނެއް ތައްޔާރުކުރަމުން އަންނަ ކަމަށްވެސް ވިދާޅުވިއެވެ.

އޮސްޓްރޭލިއާގެ ސިޓީއެއް ކަމަށްވާ ބްރިސްބަންގައި 2032 ވަނަ އަހަރުގެ އޮލިމްޕިކްސް ބާއްވަން ނިންމިއިރު، މިއީ އޮސްޓްރޭލިއާގައި އޮލިމްޕިކްސް ބާއްވާނެ ތިންވަނަ ފަހަރެވެ. އެގޮތުން މީގެ ކުރިން 1956 ވަނަ އަހަރުގެ ގޭމްސް އޮސްޓްރޭލިއާގެ މެލްބަންގައި ބޭއްވިއިރު، 2000 ވަނަ އަހަރުގެ ގޭމްސް ވަނީ އެ ގައުމުގެ ސިޑްނީގައި ބާއްވާފައެވެ.