އީދާ ގުޅުވައިގެން ޝެއިޚް ހަސީނާގެ ފޮނި ހަދިޔާ

ގައުމުތަކުގެ މެދުގައި އޮންނަ ގުޅުން ބަދަހިކުރުމަށް އެކި ގައުމުތަކުން ހަދިޔާ ބަދިޔާ ބަދަލުކުރެއެވެ. މައުނަވީ ގޮތުންނާއި ރަމްޒީގޮތުންނެވެ. މާލީ އެހީތެރިކަން ފޯރުކޮށްދިނުމާއި އެއް ގައުމުގެ ވެރިން އަނެއް ގައުމަށް ޒިޔާރަތްކުރުމާއި ރަމްޒީ ތަކެތި ބަދަލުކުރުން އޮވެއެވެ.

ބައިނަލްއަގުވާމީ ޑިޕްލޮމަސީގެ ތެރެއިން ހަދިޔާ ބަދަލުކުރުމަކީ ވަރަށް ކުރީއްސުރެ ގައުމުތަކުގެ އާދައެކެވެ. ޚާއްސަކޮށް އެގައުމެއްގައި އާއްމު ބާވަތްތައް ނުވަތަ ވަކި ކަހަލަ އެއްޗަކަށް އެގައުމެއް ދުނިޔޭގައި މަޝްހޫރުވެފައިވާނަމަ އެ އެއްޗަކުން އަނެއް ގައުމަކަށް ރަމްޒީގޮތެއްގައި ހަދިޔާ ފޯރުކޮށްދިނުމަކީ ދެނެގަތުމާއި އެކުވެރިކަމުގެ އަގު ވަޒަންކުރާކަން ދޭހަކޮށްދިނުމަށް ކޮށްއުޅޭ ކަމެކެވެ.

ބަންގްލަދޭޝްއަކީ މައިގަޑު ގޮތެއްގައި ދަނޑުވެރިކަމުގެ ގައުމެކެވެ. އަނބަކީ އެގައުމުގައި ވަރަށް ތިޔާގި އެއްޗެކެވެ. ބަންގާޅު އަނބަކީ ދުނިޔޭގައި ވަރަށް މަޝްހޫރު އަދި މަގްބޫލުވެސް އެއްޗެކެވެ. އަރަބި ގައުމުތަކުން އެކުވެރި ގައުމުތަކަށް ކަދުރު ފޮނުވާ ގޮތަށް ބަންގްލަދޭޝްއިން އަނބުވެސް ފޮނުވައެވެ. ދިވެހިރާއްޖެއަކީ އަރަބި ގައުމުތަކުން ދޭތެރެ ދޭތެރެއިން ކަދުރު ލިބޭ ގައުމެކެވެ. ކޮންމެ އަހަރަކުހެން ސައުދީ ސަރުކާރުން ރާއްޖެއަށް ކަދުރު ފޮނުވައެވެ. އެއީ އިސްލާމީ ރިވެތި އުޚުވަތްތެރިކަމުގެ ރަމްޒެއްގެ ގޮތުން ކުރާ ކަމެކެވެ.

ބަންގްލަދޭޝްގެ ބޮޑުވަޒީރު ޝައިޚު ހަސީނާގެ ފަރާތްޕުޅުން ދިވެހިރާއްޖޭގެ ރައީސަށް އަނބުގެ ހަދިޔާއެއް ލިބިވަޑައިގެންނެވި ވާހަކަ ނޫސްތަކަށް އެރުމުން ދިވެހީންގެ ސަމާލުކަމަށް މިހަދިޔާ ވަނީ އައިސްފައެވެ. މައުލޫމާތު ލިބޭ ގޮތުގައި މިއީ ބަންގްލަދޭޝްގެ ވެރިއެއްގެ ފަރާތްޕުޅުން ރާއްޖޭގެ ވެރިޔަކަށް ލިބިވަޑައިގެންނެވި މިޒާތުގެ ފުރަތަމަ "ފޮނި" ހަދިޔާއެވެ. ޝެއިޚު ހަސީނާގެ ފަރާތްޕުޅުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް އެރުވުނީ 500 ކިލޯގެ އަނބެވެ. މި ހަދިޔާ ފޮނުއްވީ ބޮޑު އީދާ ގުޅުވައިގެންނެވެ. އެހެންކަމުން މިއީ އިސްލާމީ ގައުމެއްގެ ވެރިޔަކު އިސްލާމީ އަނެއް ގައުމެއްގެ ވެރިޔަކަށް ކުރެއްވި އީދު ހަދިޔާއެކެވެ. އެކުވެރިކަމާއި ދެނެގަތުމުގެ ރަމްޒެއްގެ ގޮތުންނެވެ.

ކުރިންވެސް ބަޔާންކުރެވުނު ފަދައިން މިއީ ރަމްޒީ ހަދިޔާއެކެވެ. ސައުދީ އަރަބިޔާއިން ރަމަޟާން މަހާ ދިމާކޮށް ދިވެހި ރައްޔިތުންނަށް ޓަނުން ޓަނުން ހަދިޔާކުރާ ކަދުރު ކަހަލަ އެއްޗެއް ނޫނެވެ. ބައެއް ފަހަރު ޚާއްސަ އިހުތިފާލުތަކާ ގުޅުވައިގެން ގައުމުތަކުގެ ވެރިންނަށް އިންޑިޔާގެ ބޮޑުވަޒީރު ލައްޑޫ ޕެކެޓް ވެސް ފޮނުއްވައެވެ. ސުވިޒަލެންޑުގެ ވެރިން ބައެއް ފަހަރު ރަމްޒީ ހަދިޔާގެ ގޮތުގައި އަނެއް ގައުމެއްގެ ވެރިޔަކަށް ސުވިސް ޗޮކްލެޓެއްވެސް ފޮނުއްވައިފާނެއެވެ. މިއީ އެޒާތަކުން ހިނގާ ކަމެކެވެ.

ވަރަށް އާދަޔާ ޚިލާފު ތަކެތިން ހަދިޔާ ބަދަލުކުރާ ގައުމުތައްވެސް ހުރެއެވެ. އަރަބި ގައުމެއް ކަމަށްވާ އޮމާނަށް އެހެން ގައުމެއްގެ ވެރިޔަކު ވަޑައިގެންފިނަމަ ވަރަށް ގިނަފަހަރު ޚަންޖަރެއް ކަހަލަ އެއްޗެއް އަރުވާނެއެވެ. އެވައްތަރުގެ ޚަންޖަރަށް ބައެއް ދިވެހިން ޖަންބިޔާއޭވެސް ކިޔައެވެ. އޮމާނުގެ މަތީފަންތީގެ ބޭފުޅުން ރަސްމީ އިއްޒަތުގައި ތިއްބަވާއިރު އުނަގަނޑުގައި އެކަހަލަ ޖަންބިޔާއެއް ހުންނާނެއެވެ. އެއީ އެގައުމުގެ ޝަރަފާއި އިއްޒަތާއި އާދަކާދަ ރަމްޒުކޮށްދޭ އެއްޗެކެވެ.

ލުބުނާނާއި ޖޯޑަން އަދި އިޒްރޭލާއި ފަލަސްތީނުގެ ވެރިން އެހެން ގައުމުތަކުގެ ވެރިންނަށް ޒައިތޫނި ވެސް ހަދިޔާ ކުރައްވައެވެ. މިއީ އެސަރަހައްދުގައި ވަރަށް ޚާއްސަ އެއްޗެކެވެ. މިޒާތުގެ ކަންކަން ހިނގަނީ ރާއްޖޭގެ މަތީ ފަންތީގެ ބޭފުޅުން އަތޮޅު ތެރެއަށް ވަޑައިގަންނަވާއިރު ވަކި މަސައްކަތަކަށް ނުވަތަ ވަކި އެއްޗަކަށް މަޝްހޫރު ރަށަކަށް ވަޑައިގެންފިނަމަ އެ އެއްޗަކުން ހަދިޔާ އެރުވޭ އުސޫލުންނެވެ. މިސާލަކަށް ކުރީ ޒަމާނުގައި ހުވަދުއަތޮޅު ގައްދޫގެ ރައްޔިތުންގެ ފަރާތުން ވެދުންކުރަނީ ތުނޑު ކުނަލެކެވެ. މަޣުރިބު ކަރައިގައިނަމަ އެންމެ ޚާއްސަ އެއްޗަކީ ދޫލައެވެ.