ޓްރިޕިއާ ވިއްކާލަން އެތުލެޓިކޯއިން ބޭނުމެއް ނުވޭ

މި ފަހަރުގެ ޓްރާންސް ބާޒާރުގައި އިންގްލެންޑުގެ ޑިފެންޑަރު ކިއެރަން ޓްރިޕިއާ ވިއްކާލަން އެތުލެޓިކޯ މެޑްރިޑުން ބޭނުންނުވާ ކަމަށް ރިޕޯޓުތައް ބުނެފިއެވެ.

ދާދި ފަހުން މީޑިއާތަކުން ވަނީ އުމުރުން 30 އަހަރުގެ ޓްރިޕިއާ ގަންނަން ކުރާ މަސައްކަތް މެންޗެސްޓާ ޔުނައިޓެޑުން ވަރުގަދަކޮށްފައިވާ ކަމަށް ރިޕޯޓުކޮށްފައެވެ. އެގޮތުން ޓްރިޕިއާ ގަތުމަށް ޔުނައިޓެޑުން 20 މިލިޔަން ޕައުންޑުގެ ބިޑެއް އެތުލެޓިކޯއަށް ހުށަހަޅާފައިވާ ކަމަށްވެސް ވަނީ ރިޕޯޓުކޮށްފައެވެ.

އެކަމަކު ސްޕެއިނުގެ މީޑިއާ ރިޕޯޓުތައް ބުނާ ގޮތުން މި ފަހަރުގެ ޓްރާންސްފާގައި ޓްރިޕިއާ ވިއްކާލަން އެތުލެޓިކޯއިން ވަނީ ދެކޮޅު ހަދާފައެވެ. އެކަމަކު އެ ޑީލް ކުރިއަށް ގެންދަން ޓްރިޕިއާގެ އޭޖެންޓް ޕްރެޝަރު ކުރަމުން އަންނަ ކަމަށް ރިޕޯޓުތައް ބުނެއެވެ.

މެންޗެސްޓާ ސިޓީ ޔޫތު ޓީމުން ކެރިއަރު ފެށި ޓްރިޕިއާ ފުރަތަމަ ފާހަގަވާން ފެށީ ބާންލީއަށް ކުޅުނުއިރުއެވެ. އޭގެ ފަހުން ޓޮޓެންހަމް ހޮޓްސްޕާގައި ޓްރިޕިއާ މޮޅު ކުޅުމެއް ދެއްކިއިރު، އޭނާ އެތުލެޓިކޯއަށް ބަދަލުވީ 2019 ވަނަ އަހަރުގެ ޖުލައި މަހުގެ ތެރޭގައި 20 މިލިޔަން ޕައުންޑުގެ ފީއަކަށެވެ.

އެތުލެޓިކޯއާއެކު ޓްރިޕިއާ ހަދާފައިވާ އެއްބަސްވުން އަންނަ އަހަރު ޖޫން މަހު ހަމަވާއިރު، ދާދި ފަހުން ޓްރިޕިއާ ވަނީ އަލުން އިނގިރޭސި ކުލަބަކަށް ކުޅެން ބޭނުންވާ ކަމަށް ބުނެފައެވެ. އެހެންކަމުން މި ފަހަރުގެ ޓްރާންސްފާގައި ޓްރިޕިއާ ވިއްކާލަން އެތުލެޓިކޯއަށް މަޖުބޫރުވާނެ ކަމަށް ރިޕޯޓުތައް ބުނެއެވެ. ސަބަބަކީ މި ބާޒާރުގައި ޓްރިޕިއާ ވިއްކާނުލައިފިނަމަ، އަންނަ އަހަރު އޭނާއަށް ހިލޭ ޓްރާންސްފާއެއްގެ ދަށުން ކުލަބު ބަދަލުކުރެވޭނެތީއެވެ.

އެތުލެޓިކޯގައި މިދިޔަ ދެ ސީޒަނުގައި ޓްރިޕިއާ މޮޅު ކުޅުމެއް ދެއްކިއިރު، އޭނާ ވަނީ މިހާތަނަށް އެ ޓީމަށް 68 މެޗު ކުޅެދީފައެވެ. އަދި ވަނީ އެތުލެޓިކޯއާއެކު މިދިޔަ ސީޒަނުގެ ސްޕެނިޝް ލީގު ކާމިޔާބުކޮށްފައެވެ.