ރައީސްގެ ދެކަނބަލުން ނުރަސްމީ ދަތުރުފުޅެއްގައި ލަންކާއަށް ފުރާވަޑައިގެންފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އަނބިކަނބަލުން ފަޒްނާ އަޙްމަދު، ސްރީލަންކާއަށް ކުރައްވާ ނުރަސްމީ ދަތުރުފުޅެއްގައި މިއަދު ފުރާވަޑައިގެންފިއެވެ.

ރައީސް އޮފީހުން ބުނީ ރައީސުލްޖުމްހޫރިއްޔާގެ ދެކަނބަލުން ސްރީލަންކާއަށް ކުރައްވާ މި ދަތުރުފުޅު ނިންމަވާލައްވައި އެނބުރި ވަޑައިގެންނެވުމަށް ހަމަޖެހިފައި ވަނީ ޖުލައި 23 ވާ ހުކުރު ދުވަހު ކަމަށެވެ.

ރައީސުލްޖުމްހޫރިއްޔާގެ ދެ ކަނބަލުން ނުރަސްމީ ދަތުރުފުޅެއްގައި ސްރީލަންކާއަށް ފުރާވަޑައިގެންފައިވާއިރު، އެ ދެ ކަނބަލުން ވަނީ މި މަހުގެ 16ން 18ށް ތިލަދުންމަތީ ދެކުނުބުރީގެ ބައެއް ރަށްތަކަށް ޒިޔާރަތްކުރައްވާފައެވެ. އެގޮތުން އެ ދަތުރުފުޅުގައި ރައީސްގެ ދެކަނބަލުން ކުޅުދުއްފުށި ސިޓީއަށާއި، ހދ. ކުމުންދޫ އަދި ހދ. ހަނިމާދޫއަށް ވަޑައިގެންފައިވެއެވެ.

މި ތިން ރަށަށް ވަޑައިގެން ރައީސްގެ ދެކަނބަލުން ވަނީ މި ތިން ރަށުގެ ވެސް ކައުންސިލާ ބައްދަލުކޮށް، ތަރައްގީގެ އެކި މަޝްރޫއުތަކާ ގުޅޭގޮތުން މަޝްވަރާކުރައްވާފައެވެ.

އަދި އެ ރަށްރަށުގެ ސްކޫލާއި، ހެލްތް ސެންޓަރު އަދި ބަނދަރަށް ވެސް ޒިޔާރަތްކުރައްވައި އެ ތަންތަނުގެ ހާލަތު ބައްލަވާލައްވާފައިވެއެވެ.