އިސްލާމް ދީނަށް ތައުހީނުކޮށް އިސްލާމް ދީނާ ހިލާފު ވާހަކަތައް ފަތުރާ މީހުންގެ މައްސަލަ ތަހުގީގުކުރާނެ ކަމަށް ފުލުހުން ބުނެފިއެވެ.
ފުލުހުން މިހެން ބުނެފައި މިވަނީ ބައެއް މައްސަލަތައް ބެލުމުގައި ފުލުހުން ފަސްޖެހިފައިވާ ކަމަށް ބުނެ ބައެއް ފަރާތްތަކުން ފާޑު ކިޔަމުންދާ ދަނޑިވަޅެއްގައެވެ.
ފުލުހުން ބުނީ އިސްލާމް ދީނަށް ތައުހީނުކޮށް އިސްލާމް ދީނާ ހިލާފު ވާހަކަތައް ފަތުރާ ފަރާތްތަކުގެ މައްސަލަތައް ވެސް އެހެނިހެން މައްސަލަތަކެކޭ އެއްފަދައިން ތަހުގީގު ކުރާނެ ކަމަށެވެ. އަދި އެ މައްސަލައެއް ތަހުގީގުކުރުމަށްފަހު އުސޫލުގެ ތެރެއިން ގާނޫނީ ފިޔަވަޅު އަޅަމުންދާ ކަމަށް ފުލުހުން ބުނެފައިވެއެވެ.
ފުލުހުން ބުނީ ވަކި މައްސަލައެއް ތަހުގީގުކުރުމަށް ނުވަތަ ވަކި މައްސަލައެއް ތަހުގީގު ނުކުރުމަށް ސިޔާސީ ނުފޫޒެއް ނެތް ކަމަށެވެ.
އިސްލާމް ދީނަށް ތައުހީނުކޮށް އިސްލާމް ދީނާ ހިލާފު ވާހަކަތައް ފަތުރާ މީހުންގެ މައްސަލަ ތަހުގީގު ކުރާނެ ކަމަށް ފުލުހުން ބުނެފައިވާއިރު، އިސްލާމް ދީނާ ހިލާފު ވާހަކަތައް ބައެއް ފަރާތްތަކުން ސޯޝަލް މީޑިއާގައި ދައްކަމުންދާ މައްސަލަތަކެއް ވަނީ ފެންމަތިވެފައެވެ. އަދި ކާކުކަން ނޭނގޭ ގޮތަށް ބޭނުންކުރަމުންދާ ފޭކް އައިޑީތަކުން ވެސް ފާޅުކަން ބޮޑު ގޮތެއްގައި ދީނަށް ފުރައްސާރަކުރަމުންދާކަން ފާހަގަކުރެވެއެވެ.
