ރާއްޖޭގެ ފުޓްބޯޅައިގައި ޑިފެންސިވް މިޑްފީލްޑަރުން އުފެދުން ވަރަށް މުހިންމު ކަމަށާއި މި ފަހަރުގެ ޔޫރޯ ފުޓްބޯޅަ މުބާރާތުގައި މޮޅެތި ޓީމުތަކުގައި އެއްމެ މުހިންމު މަގާމެއްގެ ގޮތުގައި ފާހަގަ ވެގެންދިޔައީ ޑިފެންސިވް މިޑްފީލްޑަރު ކަމަށް ތަޖްްރިބާކާރު ކޯޗު މުޙައްމަދު ޝިޔާޒް މޯހަން ބުނެފިއެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަމުން މޯހަން ބުނީ ދިވެހި ކޯޗުން ކުޅުންތެރިޔާ އެ މަގާމަށް ކުޅުވަން ބޭނުން ވިޔަސް އެކަން ކުރެވޭނީ ކުޅުންތެރިޔާގެ ސިކުނޑި އެމަގާމަށް ކުޅެން ފުރިހަމައަށް ބޭނުން ވެގެން ކަމަށެވެ.

ޑިފެންސިވް މިޑްފީލްޑަރުން މި ފަހަރުގެ ޔޫރޯގައި ފެނިގެންދިޔައީ ހަމަ އެކަނި ޑިފެންސް ކުރާ ކުޅުންތެރިއެއްގެ ގޮތުގައި ނޫން ކަމަށާއި އެ ކުޅުންތެރިއަކީ މުޅި މެޗުގެ ކޮންޓްރޯލް ނަގައިގެން ޓީމަށް މެޗު ކޮންޓްރޯލު ކޮށްދޭ ކުޅުންތެރިޔާ ކަމަށާއި އެ ކުޅުންތެރިޔާ އަކީ މެޗުގެ ސްޕީޑް އަދި ޕާސްތަކާއި ކުޅުންތެރިން ތަންތަނަށް މޫވް ކުރާއިރު އެ ބެލެންސް ހިފަހައްޓަން ވެސް އެންމެ މުހިންމު ދައުރެއް އަދާކުރާ ކުޅުންތެރިޔާ ކަމަށް މޯހަން ބުންޏެވެ.

ޑިފެންސިވްް މިޑްފީލްޑަރުންނަކީ ކާރެއް ނަމަަ އެ ކާރުގެ އިންޖީނު ކަމަށާއި މަސައްކަތް ކުރަން މި ޖެހެނީ އިންޖީނު ކަމަށްވާއިރު މި ފަހަރުގެ ޔޫރޯގައި އެކަން ވަރަށް ރަނގަޅަށް ފެނިގެންދިޔަ ކަމަށް މޯހަން ބުންޏެވެ.

ރާއްޖޭގައި މި މަގާމު ވަރަށް މަދުއިރު މިހާރުގެ ފުޓްބޯޅައިގެ ޖީލުގައި ވެސް މި މަގާމު ދައްކަމަށާއި އެ ވިސްނުމުގައި ކުޅޭ ކުޅުންތެރިން ނެތޭ ވެސް ބުނެވިދާނެ ކަމަށް މޯހަން ފާހަގަ ކުރިއެވެ.

ރާއްޖޭގައި މި މަގާމަށް ކުޅޭ ކުޅުންތެރިން އެބަތިބި ކަމަށާއި އެހެން ނަމަވެސް މި ވިސްނުމުގައި ކުޅޭ ކުޅުންތެރިން ނެތްއިރު އަރަމުން އަންނަ ކުޅުންތެރިންގެ ތެރޭގައި ޑިފެންސިވްް މިޑްފީލްޑަރުންގެ ވިސްނުން ހުރި ކުޅުންތެރުން ނެތް ކަމަަށް މޯހަން ބުންޏެވެ.

ޑިފެންސިވްް މިޑްފީލްޑަރުގެ ވިސްނުން ހުރި އެމަގާމަށް ކުޅޭތަން މިހާރު ވެސް ލީގްގައި ފެންނަނީ އުމުރުން 34 އަހަރު ނޫނީ 35 އަހަރުގެ ކުޅުންތެރިންކަމަށްވާއިރު ފުޓްބޯޅަ ކުރިއެރުވުމަށް އަދި ގައުމީ ޓީމު މޮޅު ޓީމަކަށް ހެދުމަށް ވެސް މި މަގާމަށް ކުޅޭނެ ޒުވާން ކުޅުންތެރިން ބޭނުންވާ ކަމަށް މޯހަން ބުންޏެވެ.

ޔޫރޯ ފުޓްބޯޅަ މުބާރާތުގައި ފެނުނު ކަންކަމާއި ބެހޭ ގޮތުން ވާހަކަ ދައްކަމުން މޯހަން ބުނީ ޒުވާން ކުޅުންތެރިން ކޯޗުންގެ ބަސް އަހައިގެން ހިތްވަރާއި ޖޯޝާއިއެކު ބިރެއް ނެތި ކުޅުނުތަން ފެނިގެންދިޔަ ކަމަށާއި ރާއްޖޭގެ ޒުވާން ކުޅުންތެރިން ވެސް އެ ހިތްވަރު އެ ޖޯޝް ދައްކަންޖެހޭ ކަމަށެވެ.

ކުޅުންތެރިން ގައުމީ ސަލާމަށް ދޭ ލޯބި އަދި ގައުމީ ސަލާމް ކިޔާލާ ޖޯޝް ފެނުމުން ވަރަށް ބޮޑު އަސަރެއް ކުރި ކަމަށާއި ރާއްޖޭގެ ހުރިހާ ކުޅިވަރެއްގައި ވެސް ގައުމީ ޖޯޝް ގައުމީ ސަލާމް އުފައްދަން ޖެހޭއިރު މިހާރު ރާއްޖޭގައި ގައުމީ ސަލާމުން ލިބެންޖެހޭ ޖޯޝާއި ފޯރި ވަރަށް ކުޑަ ކަމަށް މޯހަން ބުންޏެވެ.

ފުޓްބޯޅަ އެސޯސިއޭޝަނުން ކުދި އުމުރު ފުރާތަކަށް ގައުމީ ސަލާމް ކިޔުން ލާޒިމް ކުރުމާއި ޕްރިމިއާ ލީގުގައި ގައުމީ ސަލާމް ކިޔުން ލާޒިމުކޮށްފައިވާއިރު އެއީ ވަރަށް ރަނގަޅުކަމެއް ކަމަށާއި އެހެން ނަމަވެސް ގައުމީ ސަލާމުގެ ހަގީގީ ލޯބި ކުޅުންތެރިންގެ ހިތުގައި އުފެދޭނީ ހިތުގައި އެ ޖޯޝް އުފައްދައިގެން ކަމަށް މޯހަން ބުންޏެވެ.