ކުޅުދުއްފުށި ސިޓީގެ 3 ސްކޫލެއްގެ އިސްވަރިންނާ ރައީސް ބައްދަލު ކުރައްވައިފިއެވެ.

ކުޅުދުއްފުށި ސިޓީގެ ޖަލާލުއްދީން ސްކޫލާއި، ހދ. އަތޮޅު ތަޢުލީމީ މަރުކަޒާއި، އަފީފުއްދީން ސްކޫލުގައި އެތައް ޒަމާނެއްވަންދެން ޙައްލުނުވެ ހުރި ކަންކަން ސަރުކާރުން ޙައްލުކޮށްދެއްވައިފިކަމުގައި، މި 3 ސްކޫލުގެ އިސްވެރިނާއެކު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބޭއްވެވި ބައްދަލުކުރެއްވުމުގައި ސްކޫލްތަކުގެ ވެރިން ފާހަގަކުރެއްވިއެވެ. ހޮނިހިރު ދުވަހުގެ ހެނދުނު މި ބައްދަލުކުރެއްވުން އޮތީ ކުޅުދުއްފުށީ އަފީފުއްދީން ސްކޫލުގައެވެ.

މި ބައްދަލުކުރެއްވުމުގައި ސްކޫލްތަކުގެ އިސްވެރިން ވަނީ ސްކޫލްތަކުގައި މިހާރު ކުރިޔަށްދާ އަދި، ޕްލޭންކުރެވިފައިވާ ޢުމްރާނީ މަޝްރޫޢުތައް ބާރަށް ކުރިޔަށްދާތީ އެކަން ފާހަގަކުރައްވާފައެވެ. މީގެ އިތުރުން ސްކޫލްތަކަށް ބޭނުންވާ އިތުރު ޚިދުމަތްތަކާއި، ބޭނުންވާ އިތުރު ކަންކަމާއި އިންސާނީ ވަޞީލަތްތައް އިތުރަށް ތަރައްޤީކުރުމާއި ބެހޭގޮތުން އަދި ކުދިންގެ ތަޢުލީމު ކުރިއެރުވުމަށް ބޭނުންވާ ކަންތައްތައް ސްކޫލްތަކުގެ އިސްވެރިން ރައީސުލްޖުމްހޫރިއްޔާއާ ވަނީ ހިއްސާކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި އަފީފުއްދީން ސްކޫލަކީ ރާއްޖޭގައި އަލަށް ވަށާޖެހޭ ތަޢުލީމު ފުރިހަމަވާގޮތަށް ފަރުމާކުރާ 5 ސްކޫލުގެ ތެރެއިން މިއަހަރު ތަރައްޤީ ކުރާ 2 ސްކޫލުގެ ތެރޭގައި ހިމެނޭ އެއް ސްކޫލުކަން ފާހަގަކުރެއްވިއެވެ. އަދި، މި ބައްދަލުކުރެއްވުމުގައި މި ޕްރޮޖެކްޓާބެހޭ ޕްރެޒެންޓޭޝަނެއްވެސް ހުށަހަޅާފައިވެއެވެ.

ރައީސުލްޖުމްހޫރިއްޔާ ވަނީ ސަރުކާރުގެ އިދާރާތަކުގެ މުސާރަތައް ހާމޮނައިޒްކުރުމުގެ ގޮތުން ސަރުކާރުން ފައްޓަވައިފައިވާ މަސައްކަތުގައި އެންމެ އިސްކަމެއް ދެއްވާނީ ތަޢުލީމީ ދާއިރާއަށްކަން ހާމަކުރައްވާފައެވެ. އަދި، ތަޢުލީމީ ދާއިރާއިން މިދުވަސްވަރު ކުރިޔަށްގެންދާ މުހިންމު މަސައްކަތްތައް ފާހަގަކުރައްވައި ރައީސުލްޖުމްހޫރިއްޔާ ވަނީ 12 އަހަރާއި 18 އަހަރާ ދެމެދުގެ ހުރިހާ ސްކޫލް ދަރިވަރުންނާ ޓީޗަރުންނަށް އަމާޒުކޮށް ޚާއްޞަ ވެކްސިން ޕްރޮގްރާމެއް ފެށުމަށް ސަރުކާރުން ތައްޔާރުވަމުން އަންނަކަން ފާހަގަކުރައްވާފައެވެ.

މި ބައްދަލުކުރެއްވުމުގެ ކުރިން ރައީސުލްޖުމްހޫރިއްޔާ ވަނީ އަފީފުއްދީން ސްކޫލުގެ ޙާލަތު ބައްލަވާލައްވާފައެވެ.

ކުޅުދުއްފުށި ސިޓީގެ ސުކޫލްތަކަށް މި ސަރުކާރު ވެރިކަމާ ހަވާލުވިފަހުން ގެނެސްފައިވާ ކުރިއެރުންތަކަށް ބަލާއިރު، ހދ. އަތޮޅު ތަޢުލީމީ މަރުކަޒު ގައި ސެޕްޓެމްބަރ 2019 ގައި 4 ބުރީގެ 12 ކުލާސްރޫމްގެ އިމާރާތުގެ މަސައްކަތް ފަށައި، މިހާރު ކުރަމުން ދަނީ ފިނިޝިންގ މަސައްކަތެވެ. ޕްރި ސްކޫލުން ފެށިގެން ގްރޭޑް 10ށް ކިޔަވައިދޭ ސުކޫލަކަށް 2020 ގައި ބަދަލުކުރެވި، ކިޔަވައި ދެއްވާނެ ޓީޗަރުން ހަމަކޮށްފައިވެއެވެ. 2021 ވަނަ އަހަރުގެ ބަޖެޓުގައި ސުކޫލް އޮފީހުގެ އާއިމާރާތުގެ މަސައްކަތް ވަނީ ހިމަނާފައެވެ.

ޖަލާލުއްދީން ސުކޫލްވަނީ 10-1 ކިޔަވައިދޭ ސުކޫލަކަށް 2020 ގައި ބަދަލުކޮށްފައެވެ. 2021 ވަނަ އަހަރުގެ ބަޖެޓުގައި 8 ކުލާސްރޫމްގެ އިމާރާތެއް ވަނީ ހިމަނާފައެވެ.

އަފީފުއްދީން ސުކޫލުގެ ޖާގަ ދަތިވުމުން ވަގުތީ 2 ކުލާސްރޫމްވަނީ އަޅާފައެވެ. އިންޑިއާގެ ހިލޭއެހީގެ ދަށުން އިންކުލޫސިވް އެޑިޔުކޭޝަން ސަޕޯޓް ޔުނިޓެއް ޤާއިމްކޮށް ސެން ޓީޗަރސް ހަމަޖެއްސާފައިވެއެވެ. 2021 ވަނަ އަހަރުގެ ބަޖެޓުގައި 8 ކުލާސްރޫމްގެ އިމާރާތް ހިމަނާފައިވެއެވެ. ރާއްޖޭގެ 5 ސަރަހައްދެއްގައި ޒަމާނީ ތަޢުލީމް ފުޅާކުރުމުގެ ޕްލޭންގެ ދަށުން ކުޅުދުއްފުށީގައި ޤާއިމްކުރާ ސެންޓަރ އަފީފުއްދީން ސުކޫލްގައި ވަނީ ގާއިމް ކޮށްފައެވެ.