ރައީސް ސާލިހުގެ ފޯންކޯލެއް ޗައިނާގެ ރައީސަށް
16 ޖުލައި 2021 | ހުކުރު 14:11ޗައިނާއަކީ ރާއްޖޭގެ ތަރައްގީގެ މުހިންމު ބައިވެރިއެއް ކަމަށް ވިދާޅުވި
ރައީސް ސޯލިޙު
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު، ޗައިނާގެ ރައީސް ޝީ ޖިންޕިން އަށް ފޯނުން ގުޅުއްވައި ކޮވިޑް-19 ގެ ހާލަތާއި ގުޅޭގޮތުންނާއި ދެ ގައުމުގެ ޝައުގުވެރިކަން ހުރި ދާއިރާތަކުން މަޝްވަރާ ކުރައްވައިފިއެވެ.
ހުކުރު ދުވަހު މެންދުރު ކުރެއްވި މި ފޯނުކޯލުގައި ރައީސުލްޖުމްހޫރިއްޔާ ވަނީ ކޮމިއުނިސްޓް ޕާޓީ އޮފް ޗައިނާ (ސީ.ޕީ.ސީ) އަށް މި ޖުލައި މަހުގެ ފުރަތަމަ ދުވަހު 100 އަހަރު ފުރުމާއި ގުޅިގެން އެކަމަށްޓަކައި މަރުހަބާ ވިދާޅުވެފައެވެ. މި މޭރުމުން ވާހަކަފުޅު ކުރިއަށްގެންދަވަމުން ރައީސުލްޖުމްހޫރިއްޔާ ވަނީ ސީ.ޕީ.ސީއަކީ ހަމަހަމަކަމަށް ގޮވާލާ، ކާމިޔާބު އަދި ބައިނަލްއަގުވާމީ ގޮތުން އޮންނަ ގުޅުން ވަރުގަދަވެފައިވާ ޕާޓީއަކަށް ވެފައިވަނީ ޝީ ޖިންޕިންގެ ހަރުދަނާ ހިންގުންތެރިކަމުގެ ދަށުންކަމުގައި ވިދާޅުވެފައެވެ.
ކޮވިޑް-19 ގެ ހާލަތާއި ގުޅޭގޮތުން ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވަނީ ކޮވިޑް-19 ގެ ހާލަތުން އަރައިގަތުމަށް ޗައިނާއިން މުޅި ދުނިޔެއަށް ފޯރުކޮށްދެމުންދާ އެހީތެރިކަން ފާހަގަކުރައްވާފައެވެ. އަދި އެއާއެކު އެމަނިކުފާނު ވަނީ ދިވެހިރާއްޖެއަށްވެސް މިދިޔަ މާރިޗު މަހު 200،000 ޑޯޒް ސިނޯފާމް ވެކްސިން ޗައިނާއިން ހަދިޔާ ކޮށްފައިވާތީ އެކަމަށްޓަކައި ޗައިނާގެ ރައީސަށާއި އެގައުމުގެ ސަރުކާރަށް އިޚުލާސްތެރިކަމާއެކު ޝުކުރުއަދާކުރައްވާފައެވެ.
މި ފޯނުކޯލުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ޗައިނާއާއި ރާއްޖެއާ ދެމެދު ސިޔާސީ ގުޅުން ގާއިމުކުރިތާ ކުރިއަށް އޮތް އަހަރު 50 އަހަރު ފުރޭއިރު، މިހާތަނަށް ޗައިނާއަކީ ރާއްޖޭގެ ތަރައްގީގެ މުހިންމު ބައިވެރިއެއްކަން ފާހަގަކުރެއްވިއެވެ. އެގޮތުން، ޗައިނާ ސަރުކާރުގެ އެހީތެރިކަމާއެކު ރާއްޖޭގައި ކުރިޔަށްގެންދާ އަދި ހިންގާފައިވާ ބައެއް މަޝްރޫއުތައް ފާހަގަކުރައްވައި، ކުރިމަގުގައިވެސް ޗައިނާގެ އެހީތެރިކަން އެގޮތުގައި ލިބެމުންދާނެކަމަށް އުންމީދުކުރައްވާކަމުގައި ރައީސުލްހުމްހޫރިއްޔާ ވިދާޅުވިއެވެ. އަދި، އެެމަނިކުފާނު ވަނީ ޗައިނާއިން ރާއްޖެއަށް ކަނޑައެޅުއްވި އާ ސަފީރާއެކު މަސައްކަތްކުރެއްވުމަށް ޝައުގުވެރިކަން ފާޅުކުރައްވައި އާ ސަފީރުގެ ދައުރުގައި ރާއްޖެއާއި ޗައިނާ އާއި ދެގައުމުގެ ގުޅުން އިތުރަށް ބަދަހިވެގެން ދިއުމަށް އުންމީދުކުރައްވާކަމުގައި ވިދާޅުވެފައެވެ.
މި ފޯންކޯލުގައި ޗައިނާގެ ރައީސްވެސް ވަނީ ދެ ގައުމުގެ ގާތް ގުޅުމުގެ މައްޗަށް އަލިއަޅުއްވާލައްވާފައެވެ. އެގޮތުން، ޗައިނާގެ ރައީސްވަނީ ދެގައުމުގެ ސިޔާސީ ގުޅުމަށް 50 އަހަރު ފުރުން ކުލަގަދަ ގޮތެއްގައި ފާހަގަކުރުމަށް ޝައުގުވެރިކަން ފާޅުކުރައްވާފައެވެ.
ޗައިނާގެ ރައީސްގެ ވާހަކަފުޅުގައި ކައިރި މުސްތަގުބަލެއްގައި ޗައިނާއިން ރާއްޖެއަށް އިތުރު ވެކްސިން ހަދިޔާކުރުމަށް ނިންމަވާފައިވާކަން ފާހަގަކުރެއްވެވިއެވެ. އަދި، މީގެ އިތުރުންވެސް ޗައިނާއިން ރާއްޖެއަށް އެހީވެވެން ހުރި ދާއިރާތަކުން އެހީތެރިކަން ފޯރުކޮށްދިނުމަށް ނިންމަވާފައިވާކަން އުފަލާއެކު ފާހަގަކުރެއްވެވިއެވެ. އެގޮތުން ޑެޕްޓް ސަރވިސް ސަސްޕެންޝަން އިނީޝިއޭޓިވް (ޑީ.އެސް.އެސް.އައި) އަށް އެހީ ތެރިވެދިނުމަށް ނިންމަވާފައިވާކަމަށާއި، މިކަމުގެ ސަބަބުން ރާއްޖެއަށް ކޮވިޑް-19 ގެ ހާލަތުން އަރައިގަތުމަށް އެހީއަކަށް ވެގެންދިއުމަށްވެސް އުންމީދުކުރައްވާކަމުގައި ޗައިނާގެ ރައީސް ވަނީ ވިދާޅުވެފައެވެ.
މީގެ އިތުރުންވެސް ރާއްޖެއާއެކު ކުޅިވަރުގެ ދާއިރާއިން ތަމްރީނުވާ މީހުން އިތުރުކުރުމަށާއި، ޗައިނާ ފަތުރުވެރިން ރާއްޖެއަށް ފޮނުވުމަށް ޗައިނާގެ ރައީސްވަނީ ޝައުގުވެރިކަން ފާޅުކުރައްވާފައެވެ. އަދި އެމަނިކުފާނު ވަނީ އ.ދ. ގެ ޢާންމު މަޖިލީހުގެ 76 ވަނަ ރައީސަކަށް މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު ހޮވިވަޑައިގަތުމުން ވަރަށް ބޮޑަށް މަރުހަބާ ވިދާޅުވެފައެވެ.
މި ފޯނުކޯލު ނިންމަވާލައްވަމުން ދެ ގައުމުގެ އިސް ވެރިންވެސް ވަނީ އެއްބޭފުޅަކު އަނެއްބޭފުޅަކަށް ކާމިޔާބަށް އެދިވަޑައިގަންނަވާކަމަށް ފާހަގަކުރައްވާ ދެ ގައުމުގެ މެދުގައިވާ ގުޅުންތައް ހަރުދަނާ މިސްރާބަކަށް ގެންދެވުމުގެ އަޒުމް އާކުރައްވާފައެވެ.
