މި މަހުގެ 28އާއި 29ވަނަ ދުވަހަކީ ސަރުކާރު ބަންދު 2 ދުވަހުގެ ގޮތުގައި ހަމަޖައްސައިފިއެވެ.
ރައީސް އޮފީހުން ނެރުނު ބަޔާނުގައި ބުނެފައިވަނީ މި ޖުލައި މަހުގެ 28ވާ ބުދަ ދުވަހާއި 29ވާ ބުރާސްފަތި ދުވަހަކީ ސަރުކާރު ބަންދު ދެ ދުވަސްކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހަމަޖައްސަވާފައިވާ ކަމަށެވެ.
ރައީސުލްޖުމްހޫރިއްޔާ މިގޮތަށް ހަމަޖައްސަވައިދެއްވާފައި ވަނީ އަޟްޙާ ޢީދާއި، މިނިވަން ދުވަހާ ގުޅިގެން ޗުއްޓީގައާއި އަދި އެނޫން އެހެން ބޭނުންތަކުގައި ރަށުން ބޭރަށް ދާން ބޭނުންވާ މުވައްޒަފުންނަށް ދަތިތަކެއް ކުރިމަތިވެދާނެތީ، އެކަމަށް ލުޔެއް ދެއްވުމުގެ ގޮތުންނާއި، ބަންދު ދުވަސްތަކަށް މެދުކެނޑުމެއް ނައިސް މުވައްޒަފުންނަށް ޗުއްޓީ ލިބޭގޮތަށް ހަމަޖައްސަވައިދެއްވުމުގެ ގޮތުންނެވެ. އަދި މިގޮތަށް ހަމަޖެއްސެވުމުން، ބަންދު ދުވަސްތަކަށްފަހު ސަރުކާރުގެ އޮފީސްތައް ދެން ހުޅުވޭނީ އޮގަސްޓު 1ގައި ކަމަށެވެ.
މި ހިނގާ ޖުލައި މަހުގެ 19ވާ ހޯމަ ދުވަހަކީ ޙައްޖު ދުވަހަށް ވުމާއެކު އެއީ ވެސް ސަރުކާރު ބަންދު ދުވަހެކެވެ. އަދި އަޟްހާ އީދާ ގުޅިގެން ޖުލައި 20ވަނަ ދުވަހުން ފެށިގެން 23ގެ ނިޔަލަށް ސަރުކާރު ވަނީ ބަންދު ކޮށްފައެވެ. މީގެ އިތުރުން 26 ޖުލައި އަކީ މިނިވަން ދުވަސް ކަމަށް ވުމާއެކު އެއީ ވެސް ސަރުކާރު ބަންދު ދުވަހެކެވެ. އަދި ޖުލައި މަހުގެ 27 ސަރުކާރު ބަންދު ކޮށްފައިވަނީ މިނިވަން ދުވަހުގެ މުނާސަބަތާ ގުޅިގެންނެެވެ.
މިހާރު ނިންމާފައިވާ ނިންމުމާއެކު 18 ވަނަ ދުވަހުން ފެށިގެން 2 ހަފްތާއަށް ސަރުކާރު ބަންދުވާނެއެވެ.
ކޮވިޑްގެ ކޭސްތައް މަދުވެ ރަށްރަށަށް ދަތުރުކުރުމުގައި ލުއިތައް ދިނުމުން ގިނަ އަދަދެއްގެ ބަޔަކު ދަނީ ޗުއްޓީ ހޭދަކުރުމަށް ރަށްރަށަށް ދަތުރުކުރަމުންނެނެވެ.
ނަމަވެސް ކޮވިޑް-19 ފެތުރުން މަދުވުމާގުޅިގެން ލުއިތައް ދެވިފައިވާ މި ދަނޑިވަޅުގައި އާންމު ދިރިއުޅުމުގައާއި، އެކިއެކި ޚިދުމަތްތައް ހޯދުމާއި ފޯރުކޮށްދިނުމުގައާއި، ދަތުރުފަތުރު ކުރުމުގައި ކޮވިޑް-19އިން ރައްކާތެރިވުމުގެ ފިޔަވަޅުތަކަށް ސަމާލުކަން ދިނުމަށް އެޗްޕީއޭއިން ވަނީ އިލްތިމާސްކޮށްފައެވެ.
އަދި ޚާއްސަގޮތެއްގައި ޗުއްޓީ ހޭދަކުރުމަށް ތަންތަނަށް ދަތުރުކުރުމުގައާއި އީދުގެ ހަރަކާތްތައް ކުރިއަށްގެންދިއުމުގައި ޚާއްސަ ސަމާލުކަމެއް ދިނުމަށް ވަނީ އަންގާފައެވެ. ޢީދު ފާހަގަކުރުމުގެ ހުއްދަ ލިބިފައިވީނަމަވެސް ބަލި ފެތުރުނަ ނުދިނުމަށް ސަމާލުވުމަށް އިލްތިމާސްކޮށް ނެރުނު އިއުލާނެއްގައި އެޗްޕީއޭއިން ވަނީ އެންމެންގެ ރައްކާތެރިކަމަށްޓަކައި އެކަށައަޅަންޖެހޭ ފިޔަވަޅުތަކެއް ވެސް ހިމަނާފައެވެ.
