ލ.ފޮނަދޫ މަގުހެދުމުގެ މަޝްރޫއު: ފުރަތަމަ ފިޔަވަހީގެ މަސައްކަތް ނިމުމާއި ގާތަށް
މި މަޝްރޫއުގެ 88 އިންސައްތަ މަސައްކަތް މިހާރު ވަނީ ނިމިފައި
ލ.ފޮނަދޫގެ މަގެއް،
ލ. ފޮނަދޫ މަގުހެދުމުގެ މަޝްރޫއުގެ ފުރަތަމަ ފިޔަވަހީގެ ބޮޑު ބައެއްގެ މަސައްކަތް ނިންމާލައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީން) ބުނީ ފޮނަދޫ މަގުހެދުމުގެ މަޝްރޫއުގެ (ފުރަތަމަ ފިޔަވަހި) މަސައްކަތުގެ 88 އިންސައްތަ މަސައްކަތް ނިމިފައިވާ ކަމަށެވެ. އަދި ދުއްވާ ސަރަހައްދު ގާއިމުކުރުމުގެ މަސައްކަތް ނިމިފައިވާ ކަމަށް ވެސް އެމްޓީސީސީން ބުނެއެވެ.
ފޮނަދޫ މަގުތައް ޒަމާނީ ފެންވަރަށް ތަރައްގީކުރުމުގެ ފުރަތަމަ ފިޔަވަހީގެ މަސައްކަތް ފަށާފައިވަނީ 2017 ވަނަ އަހަރުއެވެ. ނަމަވެސް މަސައްކަތް ހުއްޓި ދިގު މުއްދަތެއް ފާއިތުވީ ފަހުން، އަލުން އެމްޓީސީސީއާ ހަވާލުކޮށްގެން މަސައްކަތް ފެށީ 2019 ވަނަ އަހަރުގެ ޖޫންމަހުއެވެ. މި ދިޔަ ޑިސެމްބަރުމަހު ވަނީ މަގުތަކުގައި ތާރުއެޅުމުގެ މަސައްކަތް ފަށާފައެވެ.
ފުރަތަމަ ފިޔަވަހީގައި އެރަށުގެ 12 މަގެއްގައި ތާރު އެޅުމުގެ މަސައްކަތްދަނީ ކުރަމުންނެވެ. އެއީ 3.5 ކިލޯ މީޓަރުގެ ސަރަހައްދެކެވެ. މަގުތައް ޒަމާނީ ފެންވަރަށް ހެދުމުގެ މި މަޝްރޫއު ކުރިއަށްގެންދަނީ ފެންބޮޑުވުމުގެ މައްސަލައަށް ވެސް ހައްލު ލިބޭނެހެން ފަރުމާކޮށްގެންނެވެ.
ފޮނަދޫ މަގުހެދުމުގެ ފުރަތަމަ ފިޔަވަހީގެ މަސައްކަތް ނިމުމަކާ ގާތްވެފައިވާއިރު، މި މަސައްކަތުގެ ދެވަނަ ފިޔަވަހީގެ މަސައްކަތް ވެސް އެމްޓީސީސީއާ ވަނީ ހަވާލުކޮށްފައެވެ.
ލ.ފޮނަދޫގެ މަގުތައް ޒަމާނީ ފެންވަރަށް ތަރައްގީކުރުމަށް ކުރިއަށްގެންދާ މަސައްކަތުގެ ދެވަނަ ފިޔަވަހީގެ ދަށުން އެރަށުގެ 3.64 ކިލޯމީޓަރުގެ މަގު ހެދުމަށްވަނީ ހަމަޖެހިފައެވެ. ފޮނަދޫ މަގުތައް ހަދަނީ، މަގުގެ މައްސަލައަށް ފުރިހަމައަށް ހައްލު ލިބޭނެހެން ފަރުމާކޮށް، ތާރު އަޅައިގެންނެވެ. އެމްޓީސީސީއާ ހަވާލުކޮށްފައިވަނީ މަގުތަކުގައި ތާރު އެޅުމާއި ފެން ހިންދާ ނިޒާމު ގާއިމުކުރުމާއި މަގު ބައްތިޖަހައި ރަނގަޅު ފެންވަރަކަށް މަގު ހެދުމުގެ މަސައްކަތެކެވެ. މި މަސައްކަތްތައް އެމްޓީސީސީއާ ހަވާލުކުރީ 390 ދުވަހުން ނިންމާގޮތަށެވެ. މި މަޝްރޫއަކީ ސަރުކާރުން 53.9 މިލިއަން ރުފިޔާ ޚަރަދުކޮށްގެން ކުރިއަށް ގެންދިއުމަށް ނިންމާފައިވާ މަސައްކަތެކެވެ.
