ދައުވާ ކޯޓަށް ވެއްދުމުގެ ކުރިން އިތުރު މައުލޫމާތު އެއްކުރުމުގެ ފުރުސަތު އާރަށުގެ މައްސަލައިގައި އެބައޮތް- ޕީޖީ އޮފީސް
މިހާރު ގާނޫނީ އިންޒާރު ދީފައި އޮތްގޮތުން ސުވާލު އުފައްދާނެ ފުރުސަތު އޮވެދާނެ
ރައީސް ޔާމީން ފުލުހުންގެ އިދާރާއަށް ހާޒިރުކުރުކުރުން
އާރަށުގެ މައްސަލާގައި ކުރީގެ ރައީސް ޔާމީން ޢަބްދުލްޤައްޔޫމުގެ މައްޗަށް ދައުވާކުރަން ކޯޓަށް ވެއްދުމުގެ ކުރިން އިތުރު މައުލޫމާތު އެއްކުރުމުގެ ފުރުސަތު އެބައޮތް ކަމަށް ޕީޖީ އޮފީހުން ބުނެފިއެވެ.
ރާއްޖެއެމްވީއާ މައުލޫމާތު ދެމުން ޕީޖީ އޮފީހުގެ އޮފިޝަލަކު ވިދާޅުވީ، އާރަށުގެ މައްސަލައާ ގުޅިގެން ރައީސް ޔާމީން ހައްޔަރު ކޮށްފައި ނުވާތީ، މި މައްސަލައިގެ ތަހުގީގަށް ވަކި މުއްދަތެއް ނެތް ކަމަށެވެ. އެހެންކަމުން ތަހުގީގު އިތުރަށް ފުރިހަމަ ކުރުމަށް ކުރަންޖެހޭ ކަންކަން ކުރުމުގެ ފުރުސަތު އޮންނާނެ ކަމަށެވެ. މިހާރުވެސް އާރަށުގެ މައްސަލައިގައި ދައުވާ ކުރެވޭނެކަމަށް އޮފިޝަލް ވިދާޅުވިއެވެ.
ބައެއް މައްސަލަތަކަކީ ތަހުގީގަށް ވަކި މުއްދަތެއް އޮންނަ މައްސަލަތަކެއްކަން ފާހަގަކުރައްވަމުން އޮފިޝަލް ވިދާޅުވީ ޓެރަރިޒަމްގެ މައްސަލަތަކުގައި ތަހުގީގަށް މުއްދަތެއް އޮންނަ ކަމަށެވެ. އަދި މި މައްސަލާގައި ރައީސް ޔާމީން ހައްޔަރު ނުކުރާތީ، ތަހުގީގުގެ މުއްދަތެއް ނޯންނާނެކަމަށެވެ. ކޯޓަށް މައްސަލަ ހުށަހެޅުމާ ހަމައަށް ތަހުގީގު ފުރިހަމަ ކުރުމަށްޓަކައި ކުރަންޖެހޭ ކަންކަން ކުރެވޭނެ ކަމަށް އޮފިޝަލް ވިދާޅުވިއެވެ.
މިމައްސަލައިގައި ގާނޫނީ އިންޒާރު ދީފައި އޮތީ ޕީޖީން ބޭނުންވާ ފެންވަރަށް ނޫން ކަމަށާއި، އެހެންކަމުން މިހާރު ކުރަމުންދަނީ އެއަށްވުރެ ފުރިހަމައަށް، ގާނޫނުގައި ބުނާ، އަކުރުން އަކުރަށް އެ އިންޒާރު ފުރިހަމަ ކުރުމަށް ކުރަމުން އަންނަ ކަމެއް ކަމަށް އޮފިޝަލް ވިދާޅުވިއެވެ.
މިހާރު ގާނޫނީ އިންޒާރު ދީފައި އޮތްގޮތުން ސުވާލު އުފައްދާނެ ފުރުސަތު އޮވެދާނެކަަމަށް ބެލެވޭތީ، އެ އިންޒާރު ފުރިހަމަ ނުކޮށް ދައުވާ ކުރުމުން ޝަރީއަތުގެ މަރުހަލާގައި މައްސަލަ ކުރިއަށް ނުގެންގޮސް ބޭރުކޮށްލުމުގެ ޖާގަ އޮންނާނެ ކަމަށް އޮފިޝަލް ވިދާޅުވިއެވެ. އެހެންކަމުން އެކަހަލަ ފުރުސަތެއް ނުދިނުމުގެ މަގްސަދުގައި ކުރިއަށްގެންދާ ކަމެއް ކަމަށް އޮފިޝަލް ވިދާޅުވިއެވެ.
ތަހުގީގު ނިންމާ ޕީޖީއަށް ފޮނުވާފައިވާ މައްސަލައެއްގެ ތަހުގީގު އަލުން ކުރިއަށް ނުގެންދެވޭނެ ކަމަށް ވިދާޅުވެ، ހޯމަ ދުވަހު ރައީސް ޔާމީން ފުލުހުންގެ އިދާރާއަށް ހާޒިރުކޮށް ކުރިއަށްގެންދިޔަ ތަހުގީގު މަޖިލީހުން ރައީސް ޔާމީންގެ ގާނޫނީ ޓީމުންވަނީ ތަނާޒުލްވެފައެވެ.
