ވިމްބަލްޑަން ކާމިޔާބުކޮށް ޖޮކޮވިޗް ރިކޯޑާ ހަމަކޮށްފި

ވިމްބަލްޑަން ޓެނިސް މުބާރާތް ހަވަނަ ފަހަރަށް ސާބިއާގެ މަޝްހޫރު ޓެނިސް ކުޅުންތެރިޔާ ނޮވަކް ޖޮކޮވިޗް ކާމިޔާބުކޮށްފިއެވެ.

މި މުބާރާތް ކާމިޔާބުކުރުމާއެކު ޖޮކޮވިޗް ވަނީ ޓެނިހުގެ ދެ ލެޖެންޑުން ކަމަށްވާ ސްޕެއިނުގެ ރަފައެލް ނަޑާލާއި ސްވިޓްޒަލެންޑްގެ ރޮޖާ ފެޑެރާގެ ރިކޯޑާ ހަމަކޮށްފައެވެ. އެ ދެ ކުޅުންތެރިންނަށްވެސް 20 ގްރޭންޑް ސްލޭމް ތަށި ލިބިފައިވާއިރު، މި ފަހަރުގެ ވިމްބަލްޑަން އަކީ ޖޮކޮވިޗުގެވެސް 20 ވަނަ ގްރޭންޑް ސްލޭމް މުބާރާތެވެ.

ލަންޑަނުގައި ކުރިއަށްދިޔަ ވިމްބަލްޑަން މުބާރާތުގެ ފައިނަލް މެޗު ބަލަން 15،000 އަށްވުރެ ގިނަ ސަޕޯޓަރުން ވަނީ ވައްދާފައެވެ. އިޓަލީގެ މަޓެއޯ ބެރެޓީނީއާ ދެކޮޅަށް ކުޅުނު މެޗު ޖޮކޮވިޗް ކާމިޔާބުކުރީ 3-1 ސެޓުންނެވެ. މެޗުގެ ސެޓުތައް ދިޔައީ 7-6، 7-4، 4-6،، 4-6 އަދި 3-6 އިންނެވެ.

މިއީ ދުނިޔޭގެ ރޭންކިންގެ އެއްވަނައިގައި އޮތް ޖޮކޮވިޗް މި އަހަރު ކާމިޔާބުކުރި ތިންވަނަ ގްރޭންޑް ސްލޭމް މުބާރާތެވެ. މީގެ ކުރިން މި އަހަރުގެ ތެރޭގައި ޖޮކޮވިޗް ވަނީ އޮސްޓްރޭލިއަން އޯޕަން އާއި ފްރެންޗް އޯޕަންވެސް ކާމިޔާބުކޮށްފައެވެ. އެއާއެކު ޖޮކޮވިޗް ވެފައިވަނީ ޓެނިހުގެ އޯޕަން އެރާގައި އެއް އަހަރު ތެރޭ ތިން ގްރޭންޑް ސްލޭމް މުބާރާތް ކާމިޔާބުކުރި ތިންވަނަ ކުޅުންތެރިޔާއަށެވެ.

ގްރޭންޑް ސްލޭމުގެ ރިކޯޑާ އެކު ޖޮކޮވިޗް ދެން މި އަހަރު އަމާޒުހިފާފައިވަނީ މި މަހު ފަށާ އޮލިމްޕިކްސްއަށެވެ. އަހަރެއްގެ ތެރޭގައި ހަތަރު ގްރޭންޑް ސްލޭމް މުބާރާތާއި އޮލިމްޕިކްސް އެންމެ ފަހުން ކާމިޔާބުކުރީ 1988 ވަނަ އަހަރު ޖަރުމަނުގެ ސްޓެފީ ގްރާފެވެ. ޖޮކޮވިޗަށް މި އަހަރު އެ ރިކޯޑާ ހަމަކުރުމުގެ ފުރުސަތުވެސް އެބައޮތެވެ.