އެމްއާރްއެމްއިން ވަކިވެވަޑައިގެން ކަމާލުއްދީންގެ ވަކި ސިޔާސީ ޕާޓީއެއް
ޢަބްދުﷲ ކަމާލުއްދީނަކީ ޑީއާރުޕީއާއި، ޖުމްހޫރީ ޕާޓީ، އަދި އެމްއާރުއެމްގައި ހަރަކާތްތެރިވެވަޑައިގެންފައިވާ ބޭފުޅެއް
ކަމާލުއްދީން ވަނީ އެމްއާރްއެމްގެ ޓިކެޓްގައި ރައްޔިތުންގެ މަޖިލީހުގެ ފޮނަދޫ ދާއިރާއަށްވެސް ކުރިމަތިލައްވާފައި
ކުރީގެ ރައީސް މައުމޫން ޢަބްދުލް ޤައްޔޫމްގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ޢަބްދުﷲ ކަމާލުއްދީން، ސިޔާސީ ޕާޓީއެއް ރަޖިސްޓްރީކުރުމަށް އިލެކްޝަންސް ކޮމިޝަނަށް ހުށަހަޅުއްވައިފިއެވެ.
ރައީސް މައުމޫންގެ ދައުރުގައި ހޯމް މިިނިސްޓަރުކަންވެސް ކުރައްވާފައިވާ ކަމާލުއްދީނަކީ ޑީއާރުޕީއާއި، ޖުމްހޫރީ ޕާޓީ، އަދި އެމްއާރުއެމްގައި ހަރަކާތްތެރިވެވަޑައިގެންފައިވާ ބޭފުޅެކެވެ. އައު ސިޔާސީ ޕާޓީއެއް ހެއްދެވުމަށް ނިންމަވައި، ޢަބްދުﷲ ކަމާލުއްދީން ނެރުއްވި ބަޔާނެއްގައި ވަނީ، އައު ޤާނޫނުއަސާސީގެ ދަށުން ރައްޔިތުން ބާރުވެރިކުރެވި ދައުލަތުގެ ބާރުތައް ވަކި ކުރެވިގެން ދިޔުމާއެކުވެސް، ޤައުމުގައި ޙައްލުނުކުރެވި މައްސަލަތަކެއް އެބަހުރިކަމަށެވެ. އެހެންކަމުން އެމައްސަލަތައް ހައްލުކުރުމަށް އައު ޢަޒުމެއްގައި އައު ސިޔާސީ ފަލްސަފާއެއް ވުޖޫދުވާންޖެހޭކަށެވެ. އެގޮތުން އޭނާއާ އެއް ޚިޔާލެއްގައި، އެއް މަޤްޞަދެއްގައި މަސައްކަތް ކުރައްވާ ފަރާތްތަކެއްގެ މަޝްވަރާގެ މަތިން، "ޤައުމީ އެއްބައިވަންތަކަމުގެ ޕާޓީ" ނުވަތަ "ނެޝަނަލް ސޮލިޑާރިޓީ ޕާޓީ"ގެ ނަމުގައި، އައު ސިޔާސީ ޕާޓީއެއް ރަޖިސްޓަރީކުރުމުގެ ހުއްދައަށް އެދި އިލެކްޝަންސް ކޮމިޝަނަށް، ހުށަހަޅުއްވާފައިވާކަމަށެވެ.
އެމްއާރްއެމްއިން ވަކިވެވަޑައިގެން ކަމާލުއްދީންގެ ވަކި ސިޔާސީ ޕާޓީއެއް އުފެއްދެވުމަށް އަމާޒު ހިއްޕަވާފައި މިވަނީ ރާއްޖޭގެ ސިޔާސީ ދާއިރާ އަނެއްކާވެސް ވަރަށް ބޮޑަށް ހަލަބޮލި ވެފައިވާ ދަނޑިވަޅެއްގައެވެ. އެގޮތުން އެމްޑީޕީގެ ތެރޭގައި ދެ ރައީސުންގެ ފެކްޝަނެއް އުފެދިފައިވާކަމުގެ އަޑުގަދަވެފައިވާއިރު، ޖުމްހޫރީ ޕާޓީ ތެރެއިން އިތުރު ޕާޓީއެއް އުފައްދަން އުޅޭކަމުގެ ޚަބަރުތަކެއް ފެތުރެން ވަނީ ފަށާފައެވެ. ރާއްޖޭގައި މިހާރުވެސް 10 ސިޔާސީ ޕާޓީ އެބައޮތެވެ.
