ބޯވަކިވީ، ކުއްޖާ ބަނޑުތެރޭ މަރުވެފައި އޮތުމުން: އައިޖީއެމްއެޗް
11 ޖުލައި 2021 | އާދީއްތަ 15:10ހޮސްޕިޓަލުން މިމައްސަލާގައި މައުލޫމާތު ހާމަކޮށްފައިވަނީ އާއިލާގެ ހުއްދައާއެކު
އައިޖީއެމްއެޗް
ވިހެއުމުގެ ތެރޭގައި ތުއްތު ކުއްޖެއްގެ ބޯ ވަކިވީ މައި މީހާގެ ސިއްހީ މައްސަލަތަކެއް ހުރުމުންނާއި ދަރިފުޅު ބަނޑުގައި ނިޔާވެފައިވާތާ ގިނައިރުތަކެއް ވެފައިވާތީ ކަމަށް އައިޖީއެމްއެޗުން ބުނެފިއެވެ.
އައިޖީއެމްއެޗުން މިހެން ބުނެފައި މިވަނީ، ހޮނިހިރު ދުވަހުގެ ރޭ އެ ހޮސްޕިޓަލުގައި މީހަކު ވިއްސުމުގެ ތެރޭގައި ދަރިފުޅުގެ ބޯ ވަކިވެފައިވާ ކަމަށް ބައެއް ނޫސްތަކުގައި ލިޔެފައިވާ ޚަބަރަކާ ގުޅިގެން ނެރުނު ބަޔާނެއްގައެވެ. މީހުންގެ ތަފްސީލީ ސިއްހީ މައުލޫމާތު ހޮސްޕިޓަލުގެ ފަރާތުން ހާމަކުރުމަކީ ގާނޫނީ ކުށެއްކަން ފާހަގަކޮށް، ބަޔާނުގައި ބުނެފައިވަނީ ހޮސްޕިޓަލުން މިމައްސަލާގައި މައުލޫމާތު ހާމަކޮށްފައިވަނީ އާއިލާގެ ހުއްދައާއި އެކު ކަމަށެވެ. ބަޔާނުގައިވާ ގޮތުން މައްސަލައާ ގުޅިގެން މި ބަޔާނުގައި ހިމަނާފައިވާ މިންވަރަށްވުރެ އިތުރަށް މައުލޫމާތު ހާމަނުކުރުމަށް އާއިލާއިން ހޮސްޕިޓަލުގައި ވަނީ އެދިފައެވެ.
އެހެންކަމުން އާއިލާގެ ހުއްދައާއެކު މި ނޫސްބަޔާނުގައި ހާމަކޮށްފައިވާ މައުލޫމާތުގެ އިތުރުން އިތުރު މަޢުލޫމާތެއް ހާމަކުރެވެން ނެތްކަމަށް ވަނީ ބުނެފައެވެ.
"މިވާހަކަ ނޫސްތަކާއި ސޯޝަލް މީޑިއާގައި ނުދެއްކުމަކީ އާއިލާގެ އެދުމެއް ކަމަށް، އާއިލާގެ ފަރާތުން ހޮސްޕިޓަލުގެ ޑޮކްޓަރުންނާ ބައްދަލުކޮށް، ނިޔާވެފައިވާ ކުއްޖާގެ ބައްޕަ ވިދާޅުވެފައިވާއިރު މި ހިތާމަވެރި ދަނޑިވަޅުގައި އާއިލާގެ އެދުމަށް އިޙްތިރާމް ކުރުމަށް މީޑިއާއާއި އެހެނިހެން ފަރާތްތަކަށް ގޮވާލަމެވެ." ބަޔާނުގައި ބުނެފައިވެއެވެ.
