އުރީދޫ ސުޕަނެޓުން މިހާރު ފިކްސްޑް ލައިންގެ ޚިދުމަތް
މި ޚިދުމަތް ތައާރަފުކުރީ ގެއިން އޮޕަރޭޓްކުރާ ވިޔަފާރިތަކަށް ހާއްސަ "ބްރޭންޑެޑް" ނަންބަރެއް ދިނުމުގެ ގޮތުން
އުރީދޫގެ އޮފީސް
އުރީދޫ ސުޕަނެޓުން، ކަސްޓަމަރުންނަށް ފިކްސްޑް ލައިންގެ ޚިދުމަތް މިހާރު ލިބޭނެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން އުރީދޫގެ ޗީފް ކޮމަރޝަލް އޮފިސަރ ހުސެން ނިޔާޒު ވިދާޅުވީ އިންޓަނެޓްގެ އަގުތަކަށް ބަދަލުގެނައުމަށް ސަރުކާރުން އިސްނަގައިގެން ކުރެވުނު މަސައްކަތުގެ ދަށުން އުރީދުން ފޯރުކޮށްދެމުން އަންނަ ޚިދުމަތްތައް ފުޅާކުރުމަށް އިތުރު ޚިދުމަތްތައް ތައާރަފުކޮށްފައިވާނެ ކަމަށެވެ. އެގޮތުން ރާއްޖޭގައި އެންމެ ފުރަތަމަ މުއާސަލާތީ ޚިދުމަތްތައް ފެށިގެން އައި އިރު، ދެމުންދިޔަ ފިކްސްޑް ލައިންގެ ޚިދުމަތް މިިހާރު އުރީދޫގެ ސުޕަނެޓް މެދުވެރިކޮށް ލިބޭނެ އިންތިޒާމުތައް ހަމަޖައްސައި ތައާރަފުކޮށްފައިވާނެ ކަމަށް ނިޔާޒު ވިދާޅުވިއެވެ.
ނިޔާޒު ވިދާޅުވީ ކޮވިޑް-19ގެ ބަލިމަޑުކަމާއެކު ވަރަށް ގިނަ ވިޔަފާރިތައް ގެއިން އޮޕަރޭޓްކުރާ ކަމަށާއި އެ ވިޔަފާރިތަކަށް ހާއްސަ "ބްރޭންޑެޑް" ނަންބަރެއް ބޭނުންވާކަމަށެވެ. އެހެންކަމުން ފިކްސްޑް ލައިންގެ ޚިދުމަތް މިހާރު ވަރަށް މުހިންމުވެފައިވާކަމަށް ނިޔާޒު ވިދާޅުވިއެވެ.
ނިޔާޒު ވިދާޅުވީ މި ޚިދުމަތަކީ ވަރަށް ފަސޭހައިން ލިބޭނެ ގޮތަށް ފަރުމާކޮށްފައިވާ ޚިދުމަތެއް ކަމަށެވެ. އެގޮތުން ލޭންޑް ލައިންގެ ގޮތުގައި ބޭނުންކުރާނެ ފޯނެއް ކަނޑައަޅައި އުރީދޫގެ ސުޕަނެޓް މޮޑެމްއަށް ކަނެކްޓްކޮށް ފިކްސްޑް ލައިންގެ ޚިދުމަތަށް އެދުމުން އެޚިދުމަތް އެކްޓިވޭޓް ކުރެވޭނެ ކަމަށް ވިދާޅުވިއެވެ. ފިކްސްޑް ލައިންގެ ނަންބަރުތަކުގެ ގޮތުގައި ދޫކުރެވޭނީ 400ން ފެށޭ ނަންބަރުތައް ކަމަށާއި ޚިދުމަތް އެކްޓިވޭޓްކުރުމުން އެފަދަ ނަންބަރެއް ކަސްޓަމަރުންނަށް ލިބޭނެ ކަމަށް ނިޔާޒު ވިދާޅުވިއެވެ. ނިޔާޒު ވަނީ ބޭނުންވާ ނަންބަރު އިހުތިޔާރުކުރުމުގެ ފުރުސަތު ކަސްޓަމަރުންނަށް ލިބޭނެކަން ފާހަގަކުރައްވާފައެވެ.
އުރީދޫގެ ފިކްސްޑް ލައިންގެ ޚިދުމަތަށް ވަކި ސަރވިސް ޗާޖެއް ނުނަގާނެއެވެ. ކޯލްތަކަށް ޗާޖު ނަގާއިރު، ކޯލްތަކަށް ނަގާ ޗާޖު ހިމެނޭނީ ސުޕަނެޓް ބިލްގައެވެ.
އުރީދޫ މޯލްޑިވްސްގެ ފިކްސްޑް ބްރޯޑްބޭންޑް އަދި ސުޕަރނެޓްގެ ޚިދުމަތްތައް ފުޅާކުރުމަށް ގިނަ މަސައްކަތްތަކެއް ކުރަމުން އަންނަ އިރު، ދާދި ފަހުން ވަނީ އުރީދޫ ސުޕަރނެޓް ޕެކޭޖްތަކަށް ބޮޑެތި ބަދަލުތަކެއް ގެނެސް އަޕްގްރޭޑްކޮށްފައެވެ. މި ބަދަލުގެ ދަށުން ސުޕަރނެޓް ކަސްޓަމަރުންނަށް ފަސް ގުނަ އިތުރު ސްޕީޑާއެކު 100 އިންސައްތާއާ ހަމައަށް އިތުރު ޑޭޓާ އަދި ކުރިއަށްވުރެ ހަލުވި ތްރޮޓްލް އިންޓަނެޓް ސްޕީޑް ލިބިގެންދާ ގޮތަށް މިހާރު ވަނީ ހަދާފައެވެ. އަދި ސުޕަރނެޓް ގެންގުޅުއްވާ ހުރިހާ ކަސްޓަމަރުންނަށް ޑޭޓާ ރޯލް އޯވަރގެ ޚިދުމަތާއެކު މަސް ނިމޭއިރު ބާކީ ހުންނަ ޑޭޓާ އަނެއް މަހުގެ ޕެކޭޖް އިންކްލޫސިވް ޑޭޓާއާ އެއްވެގެންދާނެ އިންތިޒާމުތައް ވެސް މިހާރު އުރީދޫން ވަނީ ހަމަޖައްސާފައެވެ.
