ހައިޓީގެ ރައީސް އަވަހާރަކޮށްލުން: ތުހުމަތުކުރެވޭ 4 މީހަކު މަރާލައިފި
4 މީހަކު މަރާލާފައިވާ އިރު، ތުހުމަތު ކުރެވޭ 2 މީހަކު ވަނީ ހައްޔަރުކޮށްފައި
ހައިޓީގެ ރައީސް ޖޮވެނެލް މުއީސް- މުއީސް އަވަހާރަވުމުން ގައުމު ހިންގާނެ ފަރާތެއް ނެތި ހައިޓީ ވަނީ ހުއްޓުމަކަށް އައިސްފައި
ހައިޓީގެ ރައީސް ޖޮވެނެލް މުއީސް އަވަހާރަކޮށްލި މައްސަލައިގައި ތުހުމަތު ކުރެވޭ 4 މީހަކު މަރާލައިފިއެވެ.
އޮފިޝަލުންނާއި ހަވާލާދީ ސީއެންއެންގައި ބުނެފައިވަނީ ބުދަ ދުވަހުގެރޭ ހިނގި ހާދިސާއާއި ގުޅިގެން އެކަމުގައި ތުހުމަތު ކުރެވޭ 4 މީހަކު، އެގައުމުގެ ސިފައިން މަރާލާފައިވާ ކަމަށެވެ. މީގެ އިތުރުން އިތުރު 2 މީހަކު ހައްޔަރުކޮށްފައިވާ ކަމަށް އޮފިޝަލުން ވަނީ ބުނެފައެވެ.
ހައިޓީން އެމެރިކާއަށް ކަނޑައަޅުއްވާފައި ހުންނަވާ ސަފީރު، ބޮއްޗިޓު އެޑްމޮންޑް ވިދާޅުވީ ރައީސް އަވަހާރަކޮށްލި މީހުންނަކީ ބޭރުގެ ސިފައިން ކަމަށް ބެލެވޭ ކަމަށާއި، އެމީހުންނަށް ހައިޓީގެ އާންމުންގެ ތެރެއިން ބައެއްގެ އެހީތެރިކަން ލިބިފައިވާ ކަމަށެވެ. ސަފީރު މި ކަމާބެހޭ އިތުރު މައުލޫމާތު ހާމައެއް ނުކުރެއްވިއެވެ.
މޮއިސެސް އަވަހާރަކޮށްލާފައިވަނީ އެގައުމުގައި ސިޔާސީ ހަމަނުޖެހުންތައް އިތުރުވެފައިވާ ދަނޑިވަޅެއްގައެވެ. އެގޮތުން އެގައުމުގެ ވެރިކަން ކުރާ ރަށުގައި ބޮޑެތި ހަމަނުޖެހުންތަކެއް އުފެދިފައިވާ އިރު، މި ހަމަނުޖެހުންތަކުގައި އެތައް ބަޔަކު ވަނީ މަރުވެފައެވެ. ސިޔާސީ ހަލަބޮލިކަމުގެ އިތުރުން، އިންސާނީ ކާރިސާއާއި، އަދި ކޮވިޑްގެ އާލަމީ ވަބާގެ ސަބަބުންވެސް އެގައުމަށް އައީ އިތުރު ހަމަނުޖެހުންތަކާއި އުނދަގޫތަކެއް ކުރިމަތިވަމުންނެވެ.
ހައިޓީގެ ރައީސް އަވަހާރަކޮށްލުމާއެކު އެގައުމުގައި ވެރިކަމުގެ ބާރުތަކާމެދުވެސް ވަނީ ނުތަނަވަސްކަން އުފެދިއެވެ. އެގައުމުގެ ގާނޫނު ހަދާ މަޖިލިސް ހުއްޓުމަކަށް އައިސްފައިވާއިރު، ގައުމުގެ ބޮޑުވަޒީރުކަމާމެދު ދެ މީހަކު ގެންދަނީ ދައުވާ ކުރަމުންނެވެ.
އެގައުމުގެ ގާނޫނުގައި ބުނާ ގޮތުން، ރައީސް ނެތް ހާލަތެއްގައި ގައުމުގެ ހިންގުމާ ވަގުތީ ގޮތުން ހަވާލުވާނީ ސުޕްރީމް ކޯޓުގެ ރައީސެވެ. ނަމަވެސް ސުޕްރީމް ކޯޓުގެ ރައީސް ވަނީ ކޮވިޑްގައި އަވަހާރަވެފައެވެ.
ހައިޓީގެ ވަގުތީ ބޮޑުވަޒީރު ކްލޯޑް ޖޯސެފް ވަނީ ގައުމު ހުއްޓުމަކަށް އައިސްވައިވާކަން އިއުލާން ކުރައްވާފައެވެ. އަދި މިއާއެކު ގައުމުގެ ބޯޑަރު ބަންދުކޮށް ހަރުކަށި ފިޔަވަޅުތަކެއް އެޅުމަށް ވަނީ ނިންމަވާފައެވެ.
ނަމަވެސް ވަގުތީ ބޮޑުވަޒީރުގެ ގޮތުގައި ގާނޫނު ހަދާ މަޖިލީހުން އަދި ޖޯސެފް ބަލައިގަނެފައި ނުވެއެވެ. މިދިޔަ އަހަރުން ފެށިގެން ގާނޫނު ހަދާ މަޖިލިސް އެގައުމުގައި ބާއްވާފައި ނުވެއެވެ.
