ނަޝީދު އަވަހާރަކޮށްލަން އުޅޭކަމުގެ އެއްވެސް މައުލޫމާތެއް އެމްއެންޑީއެފަށް ނުލިބޭކަމަށް ގަބޫލެއްނުކުރެވޭ: އިންކުއަރީ ރިޕޯޓް

މެއި މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން އައިއީޑީއެއް ގޮއްވާލީ އެމްއެންޑީއެފްއަށް އެފަދަ ހަމަލާއެއް ދީފާނެކަމުގެ އެއްވެސް އިންޑިކޭޓަރެއް ނުލިބިކަމަށް ގަބޫލު ނުކުރެވޭކަމަށް، މިހަމަލާއާ ގުޅިގެން 241 ކޮމިޓީން ކުރިޔަށްގެންދިޔަ އިންކުއަރީ ރިޕޯޓްގައި ބުނެފިއެވެ.

އިންކުއަރީއަށް އެގޮތަށް ގަބޫލު ނުކުރެވޭކަމަށް ފާހަގަކޮށްފައިވަނީ ރައީސް ނަޝީދަށް ދިން ހަމަލާއާ ގުޅުންހުރި އިންޑިކޭޓަރސްތައް ފާހަގަކުރި ބާބުގައެވެ.

އިންކުއަރީ ރިޕޯޓްގައި އިންޓެލިޖެންސާ ގުޅުންހުރި ކަންތައްތަކާ ގުޅިގެން ފާހަގަކޮށްފައިވަނީ، މެއި މަހުގެ 6 ވަނަ ދުވަހު ނަޝީދު އަވަހާރަކޮށްލަން ދިން ހަމަލާއާ ގުޅޭ "ސްޕެސިފިކް" ނުވަތަ ޚާއްސަ މައުލޫމާތެއް ނުވަތަ އިންޓެލިޖެންސް މައުލޫމާތެއް އެ މުއައްސަސާއަށް ލިބިފައި ނުވާކަމަށް، މި އިންކުއަރީއަށް މައުލޫމާތުދެމުން، ތަކުރާރުކޮށް އެމްއެންޑީއެފްއިން ބުނެފައިވާ ކަމަށެވެ.

ނަމަވެސް ދުނިޔޭގެ އެކި ތަންތަނުގައި އިންޓެލިޖެންސް އިދާރާތަކަށް އެއްވެސް މައުލޫމާތެއް ނުލިބި އަދި އަނެއްބައި ފަހަރު ބައެއް ކަހަލަ މައުލޫމާތު ނުވަތަ "އިންޑިކޭޓަރސް" ލިބިގެންވެސް ހަމަލާދީފައި ހުރިކަމަށް ރިޕޯޓްގައި ބުނެފައިވެއެވެ. ދުނިޔޭގެ އެއްވެސް ތަނެއްގައި ދޭ ޓެރަރިސްޓް ހަމަލާއަކީ މަދު ފަހަރެއްގައި މެނުވީ ސްޕެސިފިކް އިންޓެލިޖެންސް ލިބޭ ބާވަތުގެ ކަންކަން ނޫންކަމަށް ވަނީ ބުނެފައެވެ.

އިންކުއަރީ ރިޕޯޓްގައި ފާހަގަކޮށްފައިވަނީ ލިބޭ ވަކި އެއް މައުލޫމާތަކުން ފުރިހަމަ މަންޒަރު ދެނެގަތުމަކީ ނާދިރުކަމެއްކަމަށެވެ. ނަމަވެސް ހަމަލާއެއް ދިނުމުގެ އިޙްތިމާލް އޮތްކަން ދެނެގަންނާނީ، ލިބޭ، އަދި ކުރިން އެކިފަހަރުމަތިން ލިބިފައިހުރި އެތައް މައުލޫމާތުތަކެއް ގުޅުވައިގެން ހަދާ އެނަލިސިސްގެ މައްޗަށް ބިނާކޮށެވެ. އަދި މިފަދަ އެސެސްމަންޓް ހެދުމުގެ މަސައްކަތަކީ ހަމައެކަނި މީހަކަށް ލިބޭ މައުލޫމާތެއް އެއްކުރުމުގެ އިތުރުން ކޮމްޕިޔުޓަރައިސްޑް "އިންޓެލިޖެންސް އެނަލިޓިކަލް ޓޫލްސް" ނުވަތަ ސޮފްޓްވެއަރ ބޭނުންކޮށްގެން ކުރާ މަސައްކަތެކެވެ.

މީގެއިތުރުން މޯލްޑިވްސް ޕޮލިސް ސަރވިސްގެ އިސްވެރިއެއް ވިދާޅުވެފައިވާކަމަށް ރިޕޯޓްގައި ބުނެފައިވަނީ ހަމަލާއަކީ ނޭންގި ދިން ހަމަލާއެއްކަމަށް ގަބޫލުނުކުރެވޭ ކަމަށެވެ.

މީގެއިތުރުންވެސް ޕޮލިސް ސަރވިސްގެ އިސްވެރިއަކު އިންކުއަރީއަށް މައުލޫމާތު ދެއްވަމުން، ވިދާޅުވީ މިހަމަލާއާ ގުޅޭ މައުލޫމާތު ކޮންމެސް ގޮތަކުން އެނގިފައިވާކަމަށް ގަބޫލުކުރައްވާކަމަށެވެ.

އިންކުއަރީއަށް ހޯދުނު މައުލޫމާތުތަކުގައި އަލީގައި މިއިންކުއަރީއަށް ގަބޫލުކުރެވުނީ މެއި 6 ގައި ރައީސް ނަޝީދަށް ދިން ހަމަލާ ދެނެގަނެވޭނެ މިންވަރަށް އިންޑިކޭޓަރސް ނުވަތަ ފްލޭގް ވާންޖެހޭ ޒާތުގެ މައުލޫމާތުތަކެއް އެމްއެންޑީއެފަށް ލިބިފައި ހުރިކަމަށެވެ. އެގޮތުން ފްލޭގްވާންޖެހޭ ކަމަށް އިންކުއަރީއަށް ފާހަގަވާ ކަންކަންވެސް ވަނީ އިންކުއަރީ ރިޕޯޓްގައި ހިމަނާފައެވެ.