ފަތުރުވެރިއަކު މޫދުގައި މަރުވެފައި އޮއްވާ ފެނިއްޖެ

އައްޑޫގެ އީކެއޭޓަރ ވިލެޖުގައި ޗުއްޓީ ހޭދަކުރަމުންދިޔަ ފަތުރުވެރިއަކު މޫދުގައި މަރުވެފައި އޮއްވާ ފެނިއްޖެއެވެ.

އެމްއެންޑީއެފްއިން ބުނީ އެ ހާދިސާގެ ރިޕޯޓުލިބިފައި ވަނީ ބުރާސްފަތި ދުވަހުގެ މެންދުރުފަހު 15:30ހާއިރު ކަމަށެވެ. އެމީހާ އޮތީ އީކުއޭޓަރ ވިލެޖުގެ އިރު އުތުރު ފަރު ބޭރުގައި ކަމަށާއި، އެމީހާ ނަގައިގެން ހަވީރު 4:30ހާއިރު ސ. ފޭދޫއަށް ގެންގޮސްފައިވާ ކަމަށެވެ.

ފުލުހުން ބުނީ މަރުވެފައި ވަނީ އުމުރުން 44 އަހަރުގެ ޖަރުމަނު ފަތުރުވެރިއެއް ކަމަށެވެ. އެމީހާ މަރުވެފައި ވަނީ ސްނޯކްލިން އަށް ގޮސް އުޅެނިކޮށް ކަމަށާއި، އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.

ރާއްޖޭގައި ސްނޯކްލިން އަށާއި އެ ނޫން ވެސް އެކި މޫދު ކުޅިވަރުތަކުގައި މިފަދަ ހާދިސާތައް ހިނގާތީ މީގެ ކުރިން ވެސް ޓޫރިޒަމް މިނިސްޓްރީން ވަނީ މިކަންކަމަށް ސަމާލުވުމަށް އިލްތިމާސް ކޮށްފައެވެ.