އޮޑިޓަރ ޖެނެރަލްގެ މަގާމަށް ގ. އައިފަ، ޙުސައިން ނިޔާޒީ އައްޔަނު ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
އޮޑިޓަރ ޖެނެރަލްގެ މަގާމަށް ނިޔާޒީ އައްޔަނުކުރުމަށް ފާސްވެފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިގެންނެވި 63 މެމްބަރުންގެ އިއްތިފާގުންނެވެ. މި މަގާމަށް ނިޔާޒީ އައްޔަނު ކުރުމުގެ މައްސަލަ ދިރާސާކުރި މާލިއްޔަތު ކޮމިޓީންވެސް ވަނީ އޭނާ އެ މަގާމަށް އައްޔަނު ކުރުމަށް ފާސްކޮށްފައެވެ.
މި މަގާމަށް އައްޔަންކުރެއްވުމަށް، ހުސައިން ނިޔާޒީގެ ނަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ރައްޔިތުންގެ މަޖިލީހަށް ހުށަހަޅުއްވާފައިވަނީ ނިމިދިޔަ ޖޫންމަހުގެ 30ވަނަ ދުވަހުއެވެ.
ހުސެއިން ނިޔާޒީ މީގެ ކުރިން ހުންނެވީ އެސިސްޓެންޓް އޮޑިޓަރ ޖެނެރަލްގެ މަގާމުގައެވެ. އޭނާ އެ އޮފީހުގައި މަސައްކަތް ކުރައްވާތާ 15 އަހަރަށްވުރެ ގިނަ ދުވަސް ވެފައިވާ އިރު، އޭނާއަކީ އެ ދާއިރާއިން ތަޖުރިބާ ހާސިލް ކުރައްވައިގެން ހުންނެވި ޢިލްމީ ބޭފުޅެކެވެ.
އޮޑިޓަރ ޖެނެރަލްގެ މަގާމު ހުސްވެފައިވަނީ، ބޮޑު ޚިޔާނާތުން މަންފާވިކަމަށް އެސެޓް ރިކަވަރީ ކޮމިޝަނުން އެކުލަވާލާފައިވާ ލިސްޓުގައި ކުރީގެ އޮޑިޓަރ ޖެނެރަލް ހަސަން ޒިޔަތު ހިމެނިވަޑައިގެންފައިވާތީ އެ މަނިކުފާނު އަމިއްލަފުޅަށް އިސްތިއުފާ ދެއްވުމުންނެވެ. ޒިޔަތު އިސްތިއުފާ ދެއްވާފައިވަނީ މިދިޔަ މެއި މަހުގެ 12 ވަނަ ދުވަހުއެވެ.
