241 ކޮމިޓީން ކުރިއަށް ގެންދިޔަ އިންކުއަރީގެ ފުރިހަމަ ރިޕޯޓާ ގުޅޭ މައުލޫމާތު މެންބަރުންނާ ހިއްސާކޮށްފި
7 ޖުލައި 2021 | ބުދަ 15:09241 ކޮމިޓީން އިންކުއަރީ ފަށާފައިވަނީ މެއި މަހުގެ 24 ވަނަ ދުވަހު
241 ކޮމިޓީން މެމްބަރުންނާ ބައްދަލުކުރައްވަނީ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ކުރިއަށް ގެންދިޔަ އިންކުއަރީގެ ފުރިހަމަ ރިޕޯޓާ ގުޅޭ މައުލޫމާތު, ރައްޔިތުންގެ މަޖިލީހުގެ މެމްބަރުންނާ ހިއްސާކޮށްފިއެވެ.
241 ކޮމިޓީން އިންކުއަރީ ފަށާފައިވަނީ މެއި މަހުގެ 24 ވަނަ ދުވަހުއެވެ. ކޮމިޓީން މަސައްކަތްކުރަމުންދިޔައީ ޖޫން މަސް ނިމެންވާއިރަށް އިންކުއަރީ ނިންމާލުމަށެވެ. ނަމަވެސް މަސައްކަތްތައް އަވަސްއަރުވާލައިގެން ރިޕޯޓު އާއްމުކުރުމަކީ މަގުސަދު ނޫން ކަމަށް ކޮމިޓީގެ މުޤައްރިރު، ހިތަދޫ އުތުރު ދާއިރާގެ މެމްބަރ މުޙައްމަދު އަސްލަމް ވަނީ ވިދާޅުވެފައެވެ. ކޮމިޓީން މިހާރު މަސައްކަތްކުރަމުން އަންނަނީ ޖުލައި މަހުގެ 8 ވަނަ ދުވަހު ރިޕޯޓް އާންމުކުރުމަށެވެ.
އެގޮތުގެ މަތިން ކޮމިޓީގެ ފުރިހަމަ ރިޕޯޓާ ގުޅޭ މައުލޫމާތު މެމްބަރުންނާ ހިއްސާކުރުމަށް ކޮމިޓީން މެމްބަރުންނާ ބައްދަލުކޮށްފައިވާއިރު، ބުދަ ދުވަހުގެ ރޭ 9 ޖަހާއިރު މިރިޕޯޓް ފާސްކުރުމަށް ކޮމިޓީގެ ބައްދަލުވުމެއް ބޭއްވުމަށް ވަނީ ހަމަޖެހިފައެވެ.
އަސްލަމް ވިދާޅުވެފައިވަނީ މަޝްވަރާގެ ތެރެއިން ރިޕޯޓު އާންމު ކުރުމުގެ މަސައްކަތް ކުރާނެ ކަމަށެވެ. އަދި ރިޕޯޓު އާންމުކުރާނީ މެމްބަރުން ހުށަހަޅާ ޚިޔާލުފުޅުތަކުގެ މައްޗަށް ބިނާ ކުރުމަށްފަހު ކަަމަށެވެ. ނަމަވެސް ރިޕޯޓުގައި މާބޮޑު ޚިލާފެއް އުޅޭނެކަމަށް ލަފާނުކުރެވޭ ކަމަށް އަސްލަމް ވިދާޅުވިއެވެ.
މަސައްކަތް ކުރަމުންދަނީ ފުރިހަމަ ރިޕޯޓެއް ނެރުމަށްކަން ފާހަގަކުރައްވައި، ކޮމެޓީގެ ބައްދަލުވުންތައް ސިއްރުކުރިކަމުގައިވީ ނަމަވެސް ރިޕޯޓު އާއްމުކުރާނެ ކަމުގެ ޔަގީންކަން އަސްލަމް ވަނީ ދެއްވާފައެވެ.
މީގެ އިތުރުން، ރިޕޯޓް އެކުލަވާލާއިރު ހާމަނުކުރެވޭނެ ބައެއް މައުލޫމާތުތައް ހުންނާނެކަމަށާއި އެފަދަ މައުލޫމާތުތައް ހާމަކުރުމުގައި އަމަލުކުރާނެ ގޮތަކާމެދު ކޮމިޓީގައި މަޝްވަރާތައް ކުރަމުންދާ ކަމަށް ވިދާޅުވިއެވެ. ނުހިމަނާ މައުލޫމާތު ނުހިމަނާ އޮތީ ކީއްވެތޯ ރިޕޯޓްގައި ބަޔާންކުރާނެ ކަމަށާއި، ކޮމިޓީގެ ރޫހު ހުރީ ހާމަކުރެވެން ހުރި ހުރިހާ މައުލޫމާތެއް ހާމަކުރުމަށް ކަމަށް އަސްލަމް ވިދާޅުވިއެވެ.
241 ކޮމިޓީން ކުރިއަށް ގެންދާ އިންކުއަރީގައި 50ށް ވުރެ ގިނަ ބޭފުޅުން ހާޒިރުކޮށްގެން ސުވާލުކޮށްފައިވެއެވެ. މީގެ ތެރޭގައި ފުލުހުންނާއި ސިފައިންގެ އިސްވެރިންގެ އިތުރުން އެކިއެކި އޮފިސަރުންނާއި މިނިސްޓަރުން ވެސް ހިމެނެއެވެ.
