މި މަހު ފަހުކޮޅު ތިންވަނަ ޑިވިޝަން ފެށޭތޯ މަސައްކަތްކުރަނީ

މެދުކަނޑާލާފައިވާ މި އަހަރުގެ ތިންވަނަ ޑިވިޝަން ފުޓްބޯޅަ މުބާރާތް މި މަހު ފަހުކޮޅު ފެށޭތޯ މަސައްކަތް ކުރަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

މިދިޔަ މެއި މަހުގެ ތިންވަނަ ދުވަހު އެފްއޭއެމުން ވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިއުލާންކުރި ފިޔަވަޅުތަކާ އެއްގޮތަށް އަމަލުކުރުމުގެ ގޮތުން ތިންވަނަ ޑިވިޝަން މެދުކަނޑާލާފައެވެ. އެކަމަކު ބުދަ ދުވަހު އެޗްޕީއޭއިން ވަނީ ފިޔަވަޅުތަކަށް ލުއިދިނުމުގެ ގޮތުން މާލޭގައި ކުޅިވަރުތައް ކުޅެން ހުއްދަދީފައެވެ. އެއާއެކު ތިންވަނަ ޑިވިޝަން ފުޓްބޯޅަ މުބާރާތުގައި ވާދަކުރާ ޓީމުތަކުގެ ކުޅުންތެރިން ފަރިތަކުރަން މިހާރު ވަނީ ފުރުސަތު ލިބިފައެވެ.

ބުދަ ދުވަހު ރާއްޖޭގެ އޮންލައިން ނޫސް "އަދަދު" އަށް މައުލޫމާތުދެއްވަމުން އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވަނީ ހާއްސަ އުސޫލެއްގެ ދަށުން ތިންވަނަ ޑިވިޝަން ޓީމުތަކަށް ފަރިތަކުރުމުގެ ފުރުސަތު މިހާރު އެބައޮތް ކަމަށް ވިދާޅުވެފައެވެ. ނަމަވެސް މުބާރާތް ބޭއްވުމުގެ ހުއްދަ އަދި ނެތް ކަމަށާއި، އެކަމަކު މިހާރު މި އޮތް ގޮތަށް ކުރިއަށްދާނަމަ އީދު ބަންދު ފަހުން މި މަހު ފަހުކޮޅު މުބާރާތް އަލުން ފެށޭތޯ މަސައްކަތްކުރަމުން އަންނަ ކަމަށްވެސް ވިދާޅުވިއެވެ.

މި އަހަރުގެ ތިންވަނަ ޑިވިޝަން މެދުކަނޑާލާފައިވާއިރު، މި މުބާރާތުގެ ކުޅުން ފަށާފައިވަނީ އޭޕްރީލް މަހުގެ 12 ވަނަ ދުވަހުއެވެ. އެ ފަހަރު މުބާރާތުގެ ކުޅުން ފަށާފައިވަނީ ތިން ފަހަރެއްގެ މަތިން މުބާރާތް ފަސްކުރުމަށްފަހުއެވެ. އެގޮތުން އެންމެ ފުރަތަމަ މި މުބާރާތް ފެށުމަށް އެފްއޭއެމުން ތާވަލުކުރީ ފެބްރުއަރީ މަހުގެ އެއްވަނަ ދުވަހުއެވެ. އެކަމަކު ފަހުން މި މުބާރާތް ފެށުން އެ މަހުގެ ހަތަރުވަނަ ދުވަހަށް ތާވަލުކުރިއިރު، އަނެއްކާވެސް އެ މަހުގެ 10 ވަނަ ދުވަހަށްވެސް މުބާރާތް ފެށުން ފަސްކުރިއެވެ. ނަމަވެސް ކޮވިޑާ ގުޅިގެން މުބާރާތް ފެށުން ވަރަށް ބޮޑަށް ލަސްވެގެންދިޔައެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން އެފްއޭއެމުގެ ރައީސް ބައްސާމް އަދީލް ޖަލީލް ވިދާޅުވީ މި ފަހަރުގެ ތިންވަނަ ޑިވިޝަނުގައި މިހާރު ބާކީ އޮތީ މަދު މެޗުތަކެއް ކަމަށާއި، އެހެންކަމުން އެ މުބާރާތް ނިންމަން މަޖުބޫރު ކަމަށެވެ. އެހެންކަމުން ތިންވަނަ ޑިވިޝަން ނިންމާލެވޭނީ ކޮން އިރަކުތޯ ނުވަތަ ފެއްޓޭނީ ކިހާ ހިސާބަކުތޯ ބަލަން ޖެހޭ ކަމަށާއި، އަދި މި މުބާރާތް ނިންމުން މަޖުބޫރުވާ ސަބަބަކީ ދެވަނަ ޑިވިޝަނަށް ޕްރޮމޯޓްވާނެ ޓީމުތައް ކަނޑައެޅިގެންދާނީ ތިންވަނަ ޑިވިޝަނުން ކަމަށްވާތީ ކަމަށްވެސް ވިދާޅުވިއެވެ.

މި ފަހަރުގެ ތިންވަނަ ޑިވިޝަން މެދުކަނޑާލިއިރު، މި މުބާރާތުގައި 14 ޓީމެއް އައީ ވާދަކުރަމުންނެވެ. އަދި މިހާތަނަށް މި މުބާރާތުގައި ވަނީ 12 މެޗު ކުޅެފައެވެ.

ތިންވަނަ ޑިވިޝަން ނިންމަން މަޖުބޫރުކަމަށް ބައްސާމް ވިދާޅުވިއިރު، ކޮވިޑް-19 ގެ ހާލަތާ ގުޅިގެން މީގެ ކުރިން އެފްއޭއެމުން ވަނީ މި ފަހަރުގެ ފުޓްބޯޅަ ސީޒަން އަވަހަށް ނިންމާލާފައެވެ. އެ ގޮތުން ދިރާގު ދިވެހި ޕްރިމިއާ ލީގުގެ ދެވަނަ ބުރާ ހަމައިން ލީގު ނިންމާލިއިރު، އެފްއޭ ކަޕާއި ޕްރެޒިޑެންޓްސް ކަޕް ނުބާއްވަންވެސް ވަނީ ނިންމާފައެވެ.