މާލެ ސަރަހައްދުގެ ކާފިއު އުވާލުމަށް ނިންމައިފި
މާލެ ސަރަހައްދުގައި ރައްކާތެރިކަމުގެ ފިޔަވަޅުތައް ވަރުގަދަ ކުރީ މެއި މަހުގެ 26 ވަނަ ދުވަހު
ކާފިއު އުވާލުމަށް ނިންމާފައި ވަނީ މާލެ ސަރަހައްދުން ފެންނަމުންދާ ކޭސްތަކުގެ އަދަދު ވަރަށް ބޮޑަށް ދަށަށްދާން ފެށުމާ ގުޅިގެން
ކޮވިޑް-19އާ ގުޅިގެން މާލެ ސަރަހައްދުގައި އިއުލާނުކޮށްފައިވާ ކާފިއު އުވާލުމަށް ނިންމާފައިވާ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ބުދަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މަބްރޫކް ވިދާޅުވީ މާލެ ސިޓީގައި އަޅާފައިވާ ކާފިއު އުވާލުމަށް ނިންމާފައި ވަނީ މާލެ ސަރަހައްދުން ފެންނަމުންދާ ކޭސްތަކުގެ އަދަދު ވަރަށް ބޮޑަށް ދަށަށްދާން ފެށުމާ ގުޅިގެން ކަމަށެވެ.
މެއި މަހުގެ ކުރީކޮޅުން ފެށިގެން މާލެ ސަރަހައްދާއި މުޅި ރާއްޖޭގައި ކޮވިޑް ކޭސްތައް އިތުރުވެފައިވާއިރު މެއި މަހުގެ ފަހު ހަފުތާއާ ޖެހެންދެން ވެސް 1،000ން މަތިން ކޮންމެ ދުވަހަކު ވެސް ކޭސްތައް ރިޕޯޓުކުރިއެވެ. އޭގެ ސަބަބުން މާލެ ސަރަހައްދުގައި ރައްކާތެރިކަމުގެ ފިޔަވަޅުތައް ވަރުގަދަ ކުރީ މެއި މަހުގެ 26 ވަނަ ދުވަހުއެވެ.
ހަވީރު 04:00ން އަނެއްދުވަހުގެ ހެނދުނު 08:00ށް ކާފިއު ހިންގުމަށްފަހު އިރުއޮއްސި 06:00ން ފަތިހު 04:00ށް ކާފިއު ހިންގާފައިވެއެވެ. އެއަށްފަހު ޖުލައި އެކަކުން ފެށިގެން ފިޔަވަޅުތަކަށް ބޮޑެތި ލުއިތަކެއް ދީފައިވެއެވެ. އެގޮތުން ކާފިއުގެ ވަގުތަކީ ރޭގަނޑު 8:00ން ފަތިހު 4:00ށް ކަމަށް ހަމަޖައްސާފައިވެއެވެ.
މިހާރު މާލެ ސަރަހައްދުން ފެންނަ ކޮވިޑްގެ ކޭސްތަކުގެ އަދަދު މަދުވެފައިވާއިރު އަތޮޅުތެރެއިން ފެންނަ ކޭސްތަކުގެ އަދަދު ވަނީ މާލެ ސަރަހައްދަށްވުރެ އިތުރުވެފައެވެ. ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުކުރި ތަފާސްހިސާބުތަކަށް ބަލާއިރު ފާއިތުވެދިޔަ 24 ގަޑިއިރުގެ 105 ކޭސް ފެނިފައިވާއިރު މާލެ ސަރަހައްދުން ފެނިފައިވަނީ 23 ކޭހެވެ. އަތޮޅުތެރެއިން ފެނިފައިވަނީ 74 ކޭހެވެ. އަދި އޭގެތެރޭގައި ރިސޯޓުތަކުން ފެނުނު 7 ކޭހާއި އިންޑަސްޓްރިއަލް ރަށްތަކުން ފެނިފައިވަނީ 1 ކޭސް ހިމެނެއެވެ.
