ވެކްސިންގެ ދެ ޑޯޒަށް ފަހު 14 ދުވަސް ހަމަވެފައިވާ ފަރާތްތަކަށް ދަތުރުކުރުމުގައި ލުއިދީފި

ކޮވިޑް-19 އިން ރައްކާތެރިވުމަށް ޖަހަންޖެހޭ ވެކްސިންގެ ދެ ޑޯޒް ޖަހައި 14 ދުވަސް ފުރިހަމަކޮށް، ޕީސީއާރު ޓެސްޓު ނެގަޓިވްވުމުން ދަތުރުކުރެވޭނެ އިންތިޒާމްތައް ސަރުކާރުން ހަމަޖައިސިފިއެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ މޮނިޓަރިންގެ ހާލަތުގައި ނެތް ރަށެއްގައި ދިރިއުޅޭ ފަރާތްތަކުގެ ތެރެއިން ވެކްސިންގެ ދެ ޑޯޒް ފުރިހަމަކޮށް 14 ދުވަސްވެފައިވާ ފަރާތްތަކަށް، މީހުން ދިރިއުޅޭ ރަށްތަކުގެ ތެރެއިން މޮނިޓަރިންގެ ހާލަތުގައި ނެތް އެހެން ރަށަކަށް، ނެގެޓިވް ޕީސީއާރު ޓެސްޓަކާއެކު ދަތުރުކުރުމުގެ ފުރުސަތު ޖުލައި 8 ވަނަ ދުވަހުން ފެށިގެން ހުޅުވާލެވޭނެ ކަމަށެވެ.

Advertisement

މި ލުއި ދީފައިވާއިރު ސަރވައިލަންސްގެ ގޮތުގައި ރެންޑަމް ސާމްޕްލިންގއިން ހަދާ ޕީސީއާރް ޓެސްޓުގެ ނަތީޖާ މިގޮތަށް ދަތުރުކުރުމަށް ބޭނުންކުރެވޭނެ ކަމަށް އެޗްޕީއޭ އިން ފާހަގަކުރެއެވެ.

އޭގެ އިތުރުން ރިސޯޓް މުވައްޒަފުންނަށް މޮނިޓަރިންގެ ހާލަތުގައި ނެތް ރަށެއްގައި ދިރިއުޅޭ ފަރާތްތަކުގެ ތެރެއިން، ،ވެކްސިންގެ ދެ ޑޯޒް ފުރިހަމަކޮށް 14 ދުވަސްވެފައިވާ ފަރާތްތަކަށް، މީހުން ދިރިއުޅޭ މޮނިޓަރިންގެ ހާލަތުގައި ނެތް އެހެން ރަށަކަށް، ނެގެޓިވް ޕީސީއާރު ޓެސްޓަކާއެކު ކަރަންޓީންވުމަކާ ނުލައި ޖުލައި 8 ވަނަ ދުވަހުން ފެށިގެން ދަތުރުކުރެވޭނެ ކަމަށް މަބްރޫކު ވިދާޅުވިއެވެ.

މަބްރޫކް ވަނީ ވެކްސިންގެ ދެ ޑޯޒް ފުރިހަމަކުރުމުން ބައިނަލްއަގުވާމީ ދަތުރުވެރިންނަށް ލުއިދިނުމަށް ނިންމާފައިވާކަމަށް ވިދާޅުވެފައެވެ. އެގޮތުން ރާއްޖެ އައުމުގެ 96 ގަޑިއިރުގެ ތެރޭގައި ހަދާފައިވާ ޕީސީއާރު ނެގެޓިވް ޓެސްޓަކާއެކު އައުމުން ކަރަންޓީން ވާ މުއްދަތު 7 ދުވަހަށް ކުޑަކޮށް ކަރަންޓީން ރިލީސް ސާމްޕަލް ނެގުމަށް ވަނީ ނިންމާފައެވެ. މިގޮތަށް ޢަމަލުކުރެވޭނީ ދުނިޔޭގެ ސިއްހަތު ޖަމިއްޔާއިން ބަލައިގަންނަ ވެކްސިނެއްގެ ދެ ޑޯޒް ފުރިހަމަކޮށް، 14 ދުވަސް ހަމަވެފައިވާ ފަރާތްތަކަށް ކަމަށް މަބްރޫކް ވިދާޅުވިއެވެ.

ވެކްސިންގެ ދެ ޑޯޒް ފުރިހަމަކުރުމުން ދަތުރުކުރުމުގައި ލުއި ދޭން ނިންމާފައިވާއިރު، މި ލުއިތައް މިގޮތަށް ދެވިފައި މިވަނީ މާލެ ސަރަހައްދުގެ ކޮވިޑް ޕޮޒިޓިވިޓީ ރޭޓް ފަސް އިންސައްތައިން ދަށަށް ދިއުމުން ކަމަށް މަބްރޫކް ފާހަގަކުރެއްވިއެވެ.