ހުޅުދެލީ ބަނދަރުގެ ބޭރުތޮށިލުމުގެ މަސައްކަތުގެ 68 އިންސައްތަ މަސައްކަތް ނިމިއްޖެ

ދ. ހުޅުދެލީ ބަނދަރު ތަރައްޤީކުރުމުގެ މަޝްރޫއުގެ ދަށުން، ބޭރުތޮށިލުމުގެ މަސައްކަތުގެ 68 އިންސައްތަ މަސައްކަތް ނިމިއްޖެއެވެ.

ހުޅުދެލީ ބަނދަރު ތަރައްގީކުރުމުގެ މަސައްކަތްތަކާ ބެހޭ ގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނީ މި މަޝްރޫއުގެ މަސައްކަތްތައް ބާރު ސްޕީޑްގައި ކުރިއަށްދާ ކަަމަށެވެ. އެގޮތުން ބޭރުތޮށި ލުމުގެ މަސައްކަތުގެ 68 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެއެވެ.

މި މަޝްރޫއުގެ ދަށުން 49,612 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 432 މީޓަރުގެ ސަރަހައްދެއްގައި އެއްގަމު ތޮށި ލުމާއި، 337 މީޓަރުގެ ސަރަޙައްދެއްގައި ބޭރު ތޮށިލުމާއި، 252 މީޓަރުގެ ސަރަޙައްދެއްގައި ރިވެޓްމަންޓް ޖެހުން ހިމެނޭ ކަމަށެވެ. އަދި މަގު ބައްތި ހަރުކުރުމާއި، 1,645 އަކަ މީޓަރު ސަރަޙައްދެއްގައި ޕޭވްމަންޓް ހެދުން ހިމެނޭ ކަމަށް އެމްޓީސީސީން ބުނެއެވެ.

މި މަޝްރޫއުއަކީ 39.8 މިލިއަން ރުފިޔާގެ މަޝްރޫއެކެވެ.

މަސައްކަތް ނިންމުމަށް ކަނޑައަޅާފައިވާ ތަރީޚުގައި ނިމޭނެ ކަމަށާއި، ބަނދަރުގެ މަސައްކަތް ނިމުމާއެކު އެރަށަށް ދިމާވެފައިވާ ލަފާފުރުގެ ދަތިކަމުގެ މައްސަލައަށް ހައްލު ލިބިގެން ދާނެ ކަމަށް އެމްޓީސީސީން ބުނެއެވެ.