ފަތުރުވެރިކަމުގެ ރަންޔޫބީލަށް މޯލްޑިވްސް ޕޯސްޓުން ސްޓޭމްޕެއް ތައާރަފުކުރާނެ ކަމަށް އިއުލާންކޮށްފި
ރާއްޖޭގެ ތާރީހުގައި ފާހަގަކޮށްލެވޭ ކަންތައްކަށް ހާއްސަ ސްޓޭމްޕްތައް ހެދުމަކީ މޯލްޑިވްސް ޕޯސްޓުން އަބަދުވެސް ކުރާ ކަމެއް
މާލޭގައި ހުންނަ މޯލްޑިވްސް ޕޯސްޓްގެ މައި އޮފީސް
ރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބަތާ ދިމާކޮށް، އެކަން ފާހަގަކުރުމުގެ ގޮތުން މޯލްޑިވްސް ޕޯސްޓް ލިމިޓެޑުން ސްޓޭމްޕެއް ނެރެން ނިންމާފައިވާ ކަމަށް އެކުންފުނީގެ މެނޭޖިން ޑިރެކްޓަރ އަހުމަދު ޝަފީގު މުހައްމަދު ވިދާޅުވެއްޖެއެވެ.
ބެލްޖިއަމްގައި ހުންނަ ރާއްޖޭގެ އެމްބަސީން އިސްނަގައިގެން ފަތުރުވެރިކަމުގެ ރަންޔޫބީލްގެ ލޯގޯ ހިމަނައިގެން ޑިޒައިންކޮށްފައިވާ ސްޓޭމްޕް ލޯންޗުކުރުމަށް ކުރިއަށް ގެންދިޔަ ހަފްލާގައި ވާހަކަދައްކަވަމުން އެމްޑީ ޝަފީގު ވަނީ ސްޓޭމްޕަކީ ގައުމެއްގެ ތާރީހާއި، ސަގާފަތާއި، އާދަކާދަ އަދި ގުދުރަތީ ރީތިކަން ދައްކައިދޭ އެއްޗެއް ކަމަށާއި ރާއްޖޭގެ ތާރީހުގައި ފާހަގަކޮށްލެވޭ ކަންތައްތަކަށް ހާއްސަ ސްޓޭމްޕްތައް ހެދުމަކީ މޯލްޑިވްސް ޕޯސްޓުން އަބަދުވެސް ކުރާ ކަމެއް ކަމަށެވެ.
ރާއްޖޭގެ ފަތުރުވެރިކަމަށް 50 އަހަރު ފުރޭ މުނާސަބަތާއި ދިމާކޮށް ސްޓޭމްޕެއް ހެދުމުގެ މަސައްކަތް ކުރިއަށްދާކަމަށާއި، 50 އަހަރު ފުރުމުގެ މުނާސަބަތުގައި ހާއްސަ ސްޓޭމްޕެއް ލޯންޗު ކުރާނެ ކަމަށް އެމްޑީ ވިދާޅުވިއެވެ. އަދި ސްޓޭމްޕްގެ ޑިޒައިނާ ގުޅޭގޮތުން ޓޫރިޒަމް މިނިސްޓްރީއާއެކު މަޝްވަރާ ކުރަމުންދާ ކަމަށެވެ. އަދި ސްޓޭމްޕްގެ މަސައްކަތްތައް ނިންމައި ޕްރިންޓްކޮށް ޕްލޭންކުރެވިފައިވާ ގޮތަށް ސްޓޭމްޕް ލޯންޗުކުރެވިގެންދާނެ ކަމަށް ޝަފީގު ވިދާޅުވިއެވެ.
މިހަފްލާގައި ވާހަކަދައްކަވަމުން އެމްޑީ ޝަފީގު ވަނީ ސްޓޭމްޕަކީ ދެ ގައުމުގެ ދެމެދުގައި އޮންނަ ގުޅުން ރަމްޒުކޮށްދޭ އެއްޗެއްކަން ފާހަގަކުރައްވާ ރަންޔޫބީލް ލޯގޯ އާއި އެކު ލޯންޗުކުރެވިގެން މިދިޔަ ބެލްޖިއަމްގެ ސްޓޭމްޕަކީ ރާއްޖެއާއި ބެލްޖިއަމްއާ ދެމެދު އޮތް ގުޅުން ވަރަށް ރަނގަޅަށް ރަމްޒުކޮށްދޭ އެއްޗެއްކަން ފާހަގަކުރައްވާފައެވެ. އަދި މިއީ ރާއްޖެއާއި ބެލްޖިއަމްގެ ޕޯސްޓަށް ލިބުނު ކާމިޔާބީއެއް ކަމަށާއި ބައިނަލްއަގުވާމީ މިފަދަ މަސައްކަތްތަކުގެ ފައިދާ ރާއްޖޭގެ ޕޯސްޓުގެ ނިޒާމު ފުޅާކޮށް ހަރުދަނާކުރުމުގައި މުހިންމު ދައުރެއް އަދާކުރާނެ ކަމަށް އެމްޑީ ވިދާޅުވިއެވެ.
