ރަށްރަށުގައި ކޮމިއުނިޓީ ޝޮޕްތަކެއް ޤާއިމުކުރުމަށް މިދަނީ މަސައްކަތް ކުރަމުން: ޕޯސްޓް އޮފީސް

މޯލްޑިވްސް ޕޯސްޓް ލިމިޓެޑްގެ އީ-ޓުކުރި ލޯކަލްގެ ތެރެއިން ރަށްރަށުގައި ކޮމިއުނިޓީ ޝޮޕްތަކެއް ޤާއިމުކުރުމުގެ މަސައްކަތް ކުރަމުންދާ ކަމަށް އެ ކުންފުނިން ބުނެފިއެވެ.

ބައިނަލްއަޤްވާމީ ގޮތުން ފާހަގަކުރަމުންދާ ޕޯސްޓް ދުވަހާ ގުޅިގެން ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި އެ ކުންފުނީގެ ޑިރެކްޓަރ މުޙައްމަދު އަޙުމަދު ވިދާޅުވީ ކޮންމެ އޮންލައިން ޝޮޕަކުން ވިއްކާ މުދާ ރާއްޖޭގައި އިޝްތިހާރު ކުރެވޭނެ އަދި ފޮނުވޭނެ ނިޒާމެއް ޤާއިމުކުރުމުގެ މަސައްކަތް ކުރަމުންދާ ކަމަށެވެ. އަދި ފައިސާ ބަލައިގަނެވޭނެ ފުރިހަމަ ގޮތްތަކެއް ވެސް ހޯދަމުންދާ ކަމަށެވެ.  

އެގޮތުން ޝޮޕްތައް ޤާއިމުކުރުމަށް ރާއްޖޭގެ އުތުރުން ފެށިގެން ދެކުނަށް ޓީމުތައް ދަތުރު ކުރަމުންދާ ކަމަށާއި މި ޚިދުމަތް ތަޢާރަފުކުރުމާއެކު ރާއްޖޭގެ އުފެއްދުންތައް މީހުންނަށް އެނގި، އެ އުފައްދާ މީހުންނަށް މަންފާ ލިބި، ރާއްޖޭގެ ޕްރޮޑަކްޓްތައް ދުނިޔޭގައި އިޝްތިހާރު ވެގެންދާނެ ކަމަށް ވެސް މުޙައްމަދު ވިދާޅުވިއެވެ.

އެއްތަނުން އަނެއްތަނަށް ސިޓީ ބަދަލުކުރުމަށާއި މުވާސަލާތު ކުރުމުގެ ޚިދުމަތެއްގެ ގޮތުގައި ޕޯސްޓްގެ ޚިދުމަތް ފެށިގެން އައި ނަމަވެސް މިހާރު މި ޚިދުމަތް ފުޅާވެފައިވާ ކަމަށް އޭނާ ވިދާޅުވިއެވެ. އަދި އިޖްތިމާޢީ ގޮތުންނާއި އިޤްތިޞާދީ ގޮތުން ވެސް މި ޚިދުމަތްފުޅާވެ، އީ-ކޮމަރސްއަށް އައި ކުރިއެރުންތަކާއެކު ކަސްޓަމަރުންގެ ޑިމާންޑް ބޮޑުވެ، ރާއްޖެއަށް ގެނެވޭ މުދަލުގެ އަގު އެއް އަހަރުން އަނެއް އަހަރަށް އިތުރުވެފައިވާ ކަމަށެވެ.

ޕޯސްޓްގެ ޚިދުމަތް ބިނާވެފައިވަނީ މިހާރު އީ-ކޮމަރސްގެ ޚިދުމަތަށް ކަމަށާއި ޕޯސްޓްގެ ޚިދުމަތްތައް ފުޅާކޮށް ކަސްޓަމަރުންނަށް ފަސޭހައިން މައުލޫމާތު ލިބޭނެ ނިޒާމު ޤާއިމުކުރުމުގެ މަސައްކަތް ކުރަމުންދާ ކަމަށް އެ ކުންފުނިން ބުންޏެވެ.  

ނެޓްވޯކް ބަރޯސާވެފައި އޮންނަނީ ރާއްޖެއިން ބޭރުން ގެންނަ މުދާތަކަށް ކަމަށާއި ކަސްޓަމަރުންނަށް މުދާ ފޯރުކޮށްދިނުމަށް, ކޮވިޑާއި ގުޅިގެން ދަތިވި ކަމަށް ވެސް އޭނާ ވިދާޅުވިއެވެ. އަދި ޕެންޑަމިކުން އަރައިގަތުމަށް މިހާރު މަސައްކަތް ކުރަމުންދާ ކަމަށް ވެސް ވިދާޅުވިއެވެ.

އެކި ގޮތްގޮތުން ކަސްޓަމަރުންނަށް ޙިދުމަތްތައް ފޯރުކޮށްދޭކަން ފާހަގަކުރައްވާ މުޙައްމަދު ވިދާޅުވީ ރާއްޖޭގެ ހުރިހާ ރަށަކަށް ޚިދުމަތް ފޯރުކޮށްދެމުންދާ ކަމަށެވެ. އެގޮތުން ސަބް ޕޯސްޓް އޮފީހާއި ޕޯސްޓަލް ނެޓްވޯކްގައި ހުރި އެހެން ވަސީލަތްތަކާއި މާލެއާއި ހުޅުމާލޭގައި ހުރި ޕޯސްޓް އޮފީހުން ޚިދުމަތް ފޯރުކޮށްދޭ ކަމަށެވެ.

ބައިނަލްއަޤްވާމީ ގޮތުން ފާހަގަކުރަމުންދާ ޕޯސްޓް ދުވަހުގެ ޝިޢާރަކީ "އިނޮވޭޓް ޓު ރިކަވަރ" ކަމަށްވާއިރު މިއަދުގެ ހާލަތާއި ޝިޢާރު ވަރަށް ގުޅޭކަމަށް މުޙައްމަދު ވިދާޅުވިއެވެ. އެގޮތުން އައު އީޖާދީ ގޮތްތައް ދެނެގަންނަން ޖެހޭ ކަމަށް ވެސް އޭނާ ވިދާޅުވިއެވެ.

1906 ވަނަ އަހަރު ރަސްމީކޮށް ޕޯސްޓްގެ ޚިދުމަތް ފަށާފައިވާއިރު ރާއްޖޭގައި މި ޚިދުމަތް ފޯރުކޮށްދެމުން އަންނަތާ މިވަނީ 115 އަހަރުވެފައެވެ.