އީ-ޓުކުރީގެ މޯބައިލް އެޕްލިކޭޝަން ނޮވެމްބަރ މަހުގެ ނިޔަލަށް ނިމޭނެ
އީ ޓުކުރި ލޯކަލް ޕްލެޓް ފޯމު މެދުވެރިކޮށް މުދާ ގަނެ ވިއްކުމުގެ ޚިދުމަތް ދެމުންގެންދާއިރު ޕޯސްޓް އޮފީސް މެދުވެރިކޮށް އެ މުދާ ޑެލިވަރކޮށްދޭ
މޯލްޑިވްސް ޕޯސްޓް އޮފީސް
މޯލްޑިވްސް ޕޯސްޓު ލިމިޓެޑުން ދެމުންދާ ޚިދުމަތްތަކުގެ ތެރެއިން އޮންލައިންކޮށް މުދާ ގަނެވިއްކުމަށް މަގުފަހިކުރުމަށް އެކުލަވާލާފައިވާ ޕްލެޓް ފޯރމް ކަމުގައިވާ އީ-ޓުކުރީގެ މޯބައިލް އެޕްލިކޭޝަންގެ މަސައްކަތް އަންނަ ނޮވެމްބަރ މަހުގެ ނިޔަލަށް ނިމޭނެކަމަށް މޯލްޑިވްސް ޕޯސްޓުގެ ޑެޕިޔުޓީ މެނޭޖިންގ ޑިރެކްޓަރ އަހުމަދު އަދުހަމް ވިދާޅުވެއްޖެއެވެ.
ކްލަބް ހައުސް މެދުވެރިކޮށް އެމްޑީޕީ ހަރުގެއިން ކުރިޔަށްގެންދިޔަ ޖަލްސާގައި މޯލްޑިވްސް ޕޯސްޓުން ދެމުންގެންދާ ޚިދުމަތްތަކާއި ކުރިޔަށް ރާވާފައިވާ ކަންކަމުގެ މައުލޫމާތު އަދުހަމް ވަނީ ހިއްސާކުރައްވާފައެވެ. އެގޮތުން ޕޯސްޓުން ދެމުންގެންދާ ޚިދުމަތްތަކުގެ ތެރެއިން އީ ޓުކުރި ލޯކަލް ޕްލެޓް ފޯމު މެދުވެރިކޮށް މުދާ ގަނެ ވިއްކުމުގެ ޚިދުމަތް ދެމުންގެންދާއިރު ޕޯސްޓް އޮފީސް މެދުވެރިކޮށް އެމުދާ ޑެލިވަރކޮށްދިނުމުގެ މަސައްކަތް ކުރަމުންދާ ކަމަށް އަދުހަމް ވިދާޅުވިއެވެ. މި ޚިދުމަތް އީ ޓުކުރި ޕްލެޓް ފޯމްގައި ރަޖިސްޓްރީކޮށްފައިވާ ކޮންމެ ވިޔަފާރިއަކަށް ވެސް ލިބޭނެކަމަށް އަދުހަމް ވިދާޅުވިއެވެ. އޮންލައިންކޮށް ފައިސާދެއްކުމުގެ އިތުރުން ރާއްޖޭގެ ކޮންމެ ރަށަކަށް މުދާ ޑެލިވަރކޮށްދިނުމާއި ކަސްޓަމަރުންނާ މުއާލަމާތްކުރުމުގެ ކަންކަން މި ޕޯޓަލްގައި ކުރިޔަށްދާނެ ކަމަށް އަދުހަމް ވިދާޅުވިއެވެ.
އަދުހަމް ވިދާޅުވީ މުދާ ޑެލިވަރ ކުރުމުގެ ކަންކަމުގައި ވިޔަފާރިވެރިން އެއްގޮތަކަށް ވެސް ހާސްވާން ނުޖެހޭނެކަމަށާއި އެކަން ޕޯސްޓް އޮފީހުން ކުރަމުންދާނީ ހެޔޮ އަގެއްގައި ކަމަށެވެ.
އަދުހަމް އިތުރަށް ވިދާޅުވީ މިފަދަ ޕްރޮޑަކްޓްތައް ރާއްޖޭގެ ކޮންމެ ރަށަކަށް ވެސް ޑެލިވަރކޮށްދޭނެކަމަށެވެ. މީގެއިތުރުން ރަށްރަށުގައި އުފައްދާ މިފަދަ ތަކެތި ރާއްޖެއިން ބޭރަށް ވެސް ޑެލިވަރ ކޮށްދޭކަމަށް އަދުހަމް ވިދާޅުވިއެވެ. މި ޚިދުމަތް ޒަމާނީ ވަސީލަތްތަކާ އެއްގޮތަށް ކުރިޔަށް ގެންދިޔުމަށްޓަކައި މޯބައިލް އެޕްލިކޭޝަނެއް ހެދުމުގެ މަސައްކަތްކުރަމުންދާ ކަމަށް އަދުހަމް ވިދާޅުވިއެވެ.
