ޕާރުސަލް ރާއްޖެ އައިކަމުގެ މެސެޖް ޕޯސްޓު އޮފީހުން ކަސްޓަމަރަށް އަންގާނީ އެ ޕާރުސަލެއް ޕޯސްޓް އޮފީހަށް ލިބުމުން

ރާއްޖެއިން ބޭރުން އަންނަ ޕާރްސަލް ރާއްޖެއަށް އައިކަމުގެ މެސެޖް ކަސްޓަމަރަށް އެ މުދަލެއް ގަންނަ ފަރާތުން ފޮނުވި ނަމަވެސް ރާއްޖެއަށް ޕާރުސަލް އައި ކަމުގެ މެސެޖް ޕޯސްޓް އޮފީހުން ނުފޮނުވަނީ އެޕާރުސަލެއް ޕޯސްޓް އޮފީހާ ހަމައަށް ނާންނާތީ ކަމަށް މޯލްޑިވްސް ޕޯސްޓުގެ ޑެޕިޔުޓީ މެނޭޖިންގ ޑިރެކްޓަރ އަހުމަދު އަދުހަމް ވިދާޅުވެއްޖެއެވެ.

ކްލަބް ހައުސް މެދުވެރިކޮށް އެމްޑީޕީ ހަރުގެއިން ކުރިޔަށްގެންދިޔަ ޖަލްސާގައި ވާހަކަދައްކަވަމުން އަދުހަމް ވިދާޅުވީ ގިނަ ފަރާތްތަކަކުން އެސުވާލުކުރަމުން އަންނަކަމަށެވެ. ކަސްޓަމަރުންނަށް އެ މެސެޖް ލިބުނަނަމަވެސް ޕާރުސަލް ޕޯސްޓް އޮފީހާ ހަމައަށް ނާންނަނީސް ޕާރުސަލް ލިބުނުކަން އެންގޭނެ ގޮތެއް ނޯންނާނެކަމަށް އަދުހަމް ވިދާޅުވިއެވެ. އަދުހަމް އިތުރަށް ވިދާޅުވީ ކޮވިޑް ތެރޭގައި ދިމާވި އެންމެ ބޮޑު ގޮންޖެހުމަކީ ބޭރު ގައުމުތަކުން ލިބެންޖެހޭ ޕާރުސަލްތައް ނުލިބުމުގެ މައްސަލަކަމަށެވެ. އެހެންނަމަވެސް މިހާރު މަދުމަދުން ޕާރުސަލް ލިބެން ފަށައިފިކަމަށާއި ކުރިޔަށް އޮތްތަނުގައި ބޮޑެތި އެއަރލައިންތަކުގެ ދަތުރުތައް ފެށުމުން މިހާރަށްވުރެ ގިނައިން ޕާރުސަލްތައް ލިބެމުންދާނެ ކަމަށް އަދުހަމް ވިދާޅުވިއެވެ.

މީގެއިތުރުން ޕޯސްޓު އޮފީހުން ގިނަ ޚިދުމަތްތަކެއް ދެމުންގެންދާއިރު މިހާރު މަސައްކަތް ކުރަމުން އަންނަނީ ސަރުކާރުގެ ހުރިހާ ވުޒާރާތަކުން ދެމުންދާ ޚިދުމަތް ޕޯސްޓް އޮފީހުގެ ތެރެއިން ދެވޭނެ ގޮތެއް ހަމަޖެއްސުމަށްކަމަށް އަދުހަމް ވިދާޅުވިއެވެ. ދެން ކުރަމުންދާ މުހިންމު ކަމަކީ ޕޯސްޓަލް ބޭންކެއް ގާއިމުކުރުމުގެ މަސައްކަތްކަމަށް އަދުހަމް ވިދާޅުވިއެވެ.

އެކަމުގެ ފީސިބިލިޓީ ހެދުމުގެ މަސައްކަތް ކުރިޔަށްދާއިރު މި އަހަރު ނިމެންވާއިރަށް މި ބޭންކުގެ އަމަލީ މަސައްކަތް ފެށޭވަރުވާނެ ކަމަށް އަދުހަމް ވިދާޅުވިއެވެ.

މީގެއިތުރުން 2019 ވަނަ އަހަރަކީ ޕޯސްޓް ލިމިޓެޑަށް ފައިދާވި އަހަރެއްކަމަށާއި ކޮވިޑާ ގުޅިގެން ދިމާވި ދަތިތަކާއެކު ވެސް ދައުލަތަށް ބުރައަކަށްނުވެ ކުންފުނި ހިނގަމުންދާކަމަށް އަދުހަމް ވިދާޅުވިއެވެ.