ކުޑަކުއްޖަކުލައްވާ ހަށިވިއްކުވި މައްސަލާގައި ލަންކާއިން ހައްޔަރުކުރި ދިވެހި މީހާ 10 ދުވަހަށް ބަންދު

ކުޑަކުއްޖަކު ލައްވާ ހަށިވިއްކުވި ކަމުގެ ތުހުމަތުގައި ލަންކާއިން ހައްޔަރުކުރި ދިވެހި މީހާ މި މަހުގެ 10 ވަނަ ދުވަހުގެ ނިޔަލަށް ބަންދުކޮށްފައިވާ ކަމަށް އެ ގައުމުގެ ނޫސްތަކުން ރިޕޯޓުކޮށްފިއެވެ.

އެ ގައުމުގެ ނޫސްތަކުގައި ރިޕޯޓުކޮށްފައިވާގޮތުގައި 15 އަހަރުގެ ކުޑަ ކުއްޖަކު ލައްވާ ހަށިވިއްކުވާ ކަމުގެ ތުހުމަތުގައި ޖުމްލަ 32 މީހަކު މިހާތަނަށް ހައްޔަރުކޮށްފައިވެއެވެ. ދިވެހި ފިރިހެން މީހާ ހައްޔަރު ކޮށްފައިވަނީ ކަސްޓަމަރެއްގެ ހައިސިއްޔަތުން އެ ނެޓްވޯކަށް އެހީތެރިވެދޭކަމުގެ ތުހުމަތުގައެވެ. މިހާތަނަށް ލިބިފައިވާ މައުލޫމާތުތަކަށް ބަލާއިރު، އެކަމުގެ ތެރެއިން ހައްޔަރުކޮށްފައިވާ ދިވެހި މީހާއަކީ ކުރިން ސަރުކާރުތަކުގެ އިސްމަގާމުތަކުގައި އުޅުއްވި ބޭފުޅެކެވެ.

Advertisement

ލަންކާގެ ފުލުހުންގެ ތަރުޖަމާނު އެސްޑީއައިޖީ އަޖިތް ރޯހާނާއާ ހަވާލާދީ ލަންކާގެ ނޫހުގައި ބުނެފައިވަނީ, އޮންލައިންކޮށް ހަށިވިއްކުމުގެ ވަގުފާރި ކުރަމުންދިޔަ ނެޓްވޯކެއްގެ މައުލޫމާތު ލިބުމާ ގުޅިގެން ހިންގި ތަހުގީގެއްގެ ތެރެއިން ކަމަށެވެ. މި މީހުން އަތުލައިގެންފައިވަނީ ދިވެހިންގެ މެދުގައި މަޝްހޫރު އެއް ހޮޓެލް ކަމުގައިވާ މައުންޓް ލެވީނިއާގައި މިދިޔަ ޖޫން މަހުގެ ތެރޭގައެވެ.

ތަރުޖަމާނު ވިދާޅުވެފައިވަނީ ފައިސާއަށް ކުޑަކުއްޖާ ވިއްކުމުގެ މުއާމަލާތް ކުރަމުން ދިޔަ މައި ވެބްސައިޓުގެ އިތުރުން، އިތުރު 4 ވެބްސައިޓެއް ވެސް މިކަމުގައި ބޭނުންކޮށްފައިވާ ކަމަށެވެ. ހައްޔަރު ކުރެވުނު މީހުންގެ ތެރެއިން ދެ މީހަކު ހައްޔަރުކޮށްފައިވަނީ ވެބްސައިޓް ހިންގާކަމުގެ ތުހުމަތުގައި އާދިއްތަ ދުވަހުއެވެ. އެމީހާ ވެސް ވަނީ މި މަހުގެ 19ށް ބަންދުކޮށްފައެވެ.

ހައްޔަރު ކުރެވުނު ހަތަރުވަނަ މީހާއަކީ މައުންޓްލެވޭނިއާގެ މެނޭޖަރެވެ. އޭނާ ހައްޔަރުކުރީ މި އަމަލުގައި ކަސްޓަމަރުންގެ ގޮތުގައި ބައިވެރިވާ ފަރާތްތަކަށް ކޮޓަރި ހަމަޖައްސައިދޭތީއެވެ.

ތަރުޖަމާނު ރޯހާނާ ވިދާޅުވީ މި މައްސަލައާ ގުޅިގެން މިހާތަނަށް 32 މީހަކު ހައްޔަރުކޮށްފައިވާ އިރު، ދިވެހި ފިރިހެން މީހާގެ އިތުރުން އެ ކުޑަކުއްޖާގެ މަންމައާއި، އޮޓޯ ދުއްވާ މީހަކާއި، ކާރު ދުއްވާ މީހެއްގެ އިތުރުން ގަހަނާ ވިއްކާ މީހަކާއި ފާދިރީއެއް ވަނީ ހައްޔަރުކޮށްފައެވެ. މީގެ އިތުރުން ބޯޓެއްގެ ކެޕްޓަނާއި، އެ ބޯޓުގެ ފަޅުވެރިންނާއި، މިހިންޓާލޭ ޕްރަދޭޝިއާ ސާބާގެ ޑެޕިއުޓީ ޗެއަރމަން ވެސް ވަނީ ހައްޔަރުކޮށްފައެވެ.

މީގެ އިތުރުން 3 މީހަކު ހައްޔަރުކޮށްފައިވަނީ ވެބްސައިޓުގައި އިޝްތިހާރު ޖެހި މައްސަލައިގައެވެ. މީގެ އިތުރުން ކުޑަކުއްޖާއެކު ބަދު އަޚުލާގީ އަމަލު ހިންގައި، ރޭޕް ކުރި މައްސަލައިގައި އިތުރު 12 މީހަކު ދެނެގަނެވިފައިވާކަމަށް ލަންކާ ފުލުހުން ބުނެއެވެ.

މި މައްސަލައިގައި އެންމެ އިސްކޮށް އުޅުނު މީހާ މިދިޔަ މަހުގެ 7 ވަނަ ދުވަހު ލަންކާ ފުލުހުން ވަނީ ހައްޔަރުކޮށްފައެވެ. މި މައްސަލައިގައި ހިމެނޭ 15 އަހަރުގެ އަންހެން ކުއްޖާ 3 މަސް ވަންދެން އެކި މީހުންނަށް ދީގެން ނަޖާއިޒް ފައިދާ ނަގާފައިވާ ކަމަށް ފުލުހުން ވަނީ ބުނެފައެވެ.