ކޮވިޝީލްޑް ވެކްސިން ޖެހުމުގައި ގަވައިދާ ޚިލާފަށް އަމަލުތަކެއް ފެންމަތިވެ، އެޕޮއިންއިންޓްމަންޓް ނިޒާމު ހަރުދަނާކުރުމަށް އޮންލައިންކޮށް ޓޯކަން ނަންބަރު ދޫކުރަން ނިންމައިފިއެވެ.

ކޮވިޝީލްޑް ވެކްސިންގެ ދެ ވަނަ ޑޯޒް ޖެހުން ޖޫން ގައި ފަށާފައިވާއިރު، ވެކްސިން ޖަހަމުން ދަނީ އެޕޮއިންޓްމެންޓް ހެއްދުމުންނެވެ. ނަމަވެސް ބައެއް ފަރާތްތަކުން ވެކްސިން ޖެހުމަށް ހުޅުވާލި ފުރަތަމަ ދުވަހު އެޕޮއިންޓްމެންޓް ނަހައްދާ ވެކްސިން ޖަހަންދާކަން ފާހަގަކޮށް އެކަން އެގޮތަށް ނުކުރުމަށް އެޗްޕީއޭއިން ވަނީ އަންގާފައެވެ. އަދި އެޕޮއިންޓް ނުހައްދާ ވެކްސިން ޖަހަން ދިއުމުން ވެކްސިން ޖަހައި ނުދެވޭނެ ކަމަށް އެޗްޕީއޭ އިން ބުނެއެވެ. އެ އިދާރާއިން މިހާރު ދަނީ ވެކްސިންގެ ދެ ވަނަ ޑޯޒް ޖަހަންޖެހޭ ފަރާތްތަކަށް ގުޅައި އެޕޮއިންޓްމެންޓް ހެއްދުމުގެ މަސައްކަތް ކުރަމުންނެވެ.

ވެކްސިން ޖެހުމަށް އެޕޮއިންޓްމަންޓް ދެމުންގެންދާނީ ފުރަތަމަ ޑޯޒް ޖެހި ތަރުތީބުން، ކުރިން ޖެހި މީހުންނަށް އިސްކަންދީގެންނެވެ. އެގޮތުން މި އަހަރުގެ ފެބްރުއަރީ މަހު ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް މިއަދު ވެކްސިން ޖެހުމަށް އެޕޮއިންޓްމެންޓް ހެއްދުމަށް އެޗްޕީއޭއިން ގުޅަމުން ގެންދާނެއެވެ. އެޕޮއިންޓްމަންޓް ލިބޭ ހުރިހާ ފަރާތްތަކުން ވެސް ކަނޑައެޅިފައިވާ ސެންޓަރަށް ގަޑިއަށް ދިއުމަށް ސަމާލުކަންދިނުމަށް އެޗްޕީއޭ އިން އިލްތިމާސްކުރެއެވެ. އަދި މި ނިޒާމު އިތުރަށް ހަރުދަނާކުރުމަށް އިތުރު ފިޔަވަޅުތަކެއް މިހާރު މިވަނީ އިއުލާންކުރައްވާފައެވެ.

ވެކްސިން ޖަހަން ނިންމާފައިވާ ކޮންމެ ސެންޓަރަކުން ވެކްސިން ދޭނެ މީހުންގެ އަދަދެއް ކަނޑައަޅައި، އެ އަދަދުތައް ވަނީ އާންމުކޮށްފައެވެ. އެގޮތުުން މިއިން ކޮންމެ ސެންޓަރެއްގައި ވެސް ދެ ދަންފަޅިއަކަށް ބަހާލައިގެން ވެކްސިން ޖަހަމުންދާއިރު، މިހާރު އޮތް އިންތިޒާމުގެ ދަށުން ހެނދުނު 10:00ގެ ދަންފަޅިއާއި 13:00ގެ ދަންފަޅިއަށް ބަލަން ހަމަޖައްސާފައިވަނީ އެއް ހަމައެއްގައެވެ. އައު ބަދަލުތަކާއެކު ސޯޝަލް ސެންޓަރާއި އިސްލާމީ މަރުކަޒުން ކޮންމެ ދަންފަޅިއެއްގައި 200 މީހުންނަށް ޓޯކަން ދޫކުރާނެއެވެ. ހުޅުމާލެ މެޑިކަލް ފެސިލިޓީގައި މިއަދަދު އުޅެނީ 120 ގައެވެ. އަދި ނެޝަނަލް އާޓް ގެލައރީއިން ވެސް ދެ ދަންފަޅީގެ ތެރެއިން ކޮންމެ ދަންފަޅިއެއްގައި 70 ޓޯކަން ނަންބަރު ދޫކުރާނެއެވެ. ޓޯކަން ދޫކުރަނީ ކޮންމެ ދުވަހެއްގެ ވެސް ހެދނުނު 09:00ން 12 ޖެހުމާ ހަމައަށެވެ. ވެކްސިންގެ މައްސަލަ ހައްލުކުރުމަށް މިވަގުތު އެޕޮއިންޓްމަންޓް ދޫކުރާނީ 1 ފެބްރުއަރީ އާއި 15 މާޗާ ދެމެދު ފުރަތަމަ ޑޯޒް ޖެހި މީހުންނަށެވެ.

ވެކްސިން ޖަހަން ދާ ފަރާތްތަކުން ވެކްސިން ކާޑާއި އައިޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިޔުމަށް އެޗްޕީއޭ އިން ވަނީ އިލްތިމާސްކޮށްފައެވެ.

މީގެއިތުރުން ބަލީގެ އެއްވެސް އަލާމާތެއް ނެތުމާއި، އަދި ކަރަންޓީނުގައި ހުރި މީހަކަށް ނުވުމާއި، ގަޔަށް ދޫ، ފަސޭހައިން ވެކްސިން ޖަހާތަން ދެއްކޭނެ ހެދުމެއް ލުމާއި، ވެކްސިންޖަހަން ދާއިރު ރަނގަޅަށް ކައިގެން ހުރުމަށް ވެސް އެޗްޕީއޭއިން އިރުޝާދު ދީފައިވެއެވެ. ވެކްސިން ޖަހަންދާއިރު އަމިއްލަ ފެންފުޅިއެއް ގެންދިޔުމާއި އަދި އެކުގައި އެކަކަށްވުރެ ގިނަ މީހުން ނުގެންދިޔުމަށް ވެސް ވަނީ އިލްތިމާސްކޮށްފައެވެ.

ފެބްރުއަރީ މަހުގެ 1 ވަނަ ދުވަހު ރާއްޖޭގައި ކޮވިޑް ވެކްސިނޭޝަން ޕްރޮގްރާމް ފެށިއިރު އެންމެ ފުރަތަމަ ޖަހަން ފެށީ ކޮވިޝީލްޑް ވެކްސިނެވެ. އޭރު ރާއްޖެއަށް ލިބިފައިވަނީ ކޮވިޝީލްޑް ވެކްސިންގެ 1 ލައްކަ ޑޯޒެވެ. އިންޑިޔާއިން ކޮވިޝީލްޑް ވެކްސިންގެ އިތުރު 1 ލައްކަ ޑޯޒް ހަދިޔާކުރީ ފެބްރުއަރީ މަހުގެ 20 ވަނަ ދުވަހުއެވެ.

އިންޑިއާގެ ސިރަމް އިންސިޓިޓިއުޓްއިން ކޮވިޝީލްޑް ވެކްސިންގެ 3 ލައްކަ ޑޯޒް ގަތުމަށް ވެފައިވާ އެއްބަސްވުމުގެ ދަށުން ވެކްސިންގެ 1 ލައްކަ ޑޯޒު ރާއްޖެ ގެނައީ މަރޗް މަހުގެ 29 ވަނަ ދުވަހުއެވެ.

ކޮވިޝީލްޑް ވެކްސިން ލިބުމުގައި ދިމާވި ދަތިތަކުގެ ސަބަބުން މެއި މަހުގެ 2 ވަނަ ދުވަހުން ފެށިގެން މާލޭގައި ކޮވިޝީލްޑް ވެކްސިންގެ ދެވަނަ ޑޯޒް ޖެހުން ވަނީ ވަގުތީ ގޮތުން މެދުކަނޑާލާފައެވެ. ކޮވިޝީލްޑް ވެކްސިން ލިބުމުގައި ދަތިތައް ދިމާވީ އިންޑިޔާއިން މާޗް މަހުގެ ފަހުކޮޅު އެހެން ގައުމުތަކަށް ވެކްސިން އެކްސްޕޯޓް ކުރުން މެދުކަނޑާލުމުންނެވެ. އެގައުމުގެ ވެކްސިނޭޝަން ޕްރޮގްރާމްގެ ސްޕީޑް ދަށްވެ ކޭސްތައް އަތްނުފޯރާ ހިސާބަށް ދާންފެށުމުން ވެކްސިން އެހެން ގައުމުތަކަށް އެކްސްޕޯޓްކުރުން މެދުކަނޑާލިއެވެ. ނަމަވެސް ރާއްޖެއަށް މިހާރު ކޮވިޝީލްޑް ވެކްސިންގެ ޝިޕްމެންޓެއް ލިބިފައިވުމުން އަލުން މި ވެކްސިންގެ ދެވަނަ ޑޯޒް ޖަހަން މި ވަނީ ފަށާފައެވެ.

ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކުގެ ތެރެއިން 2 ވަނަ ޑޯޒް ނުޖެހިތިބި ފަރާތްތަކަށް އެޕޮއިންޓްމަންޓް ދީގެން 4 ޖުލައިގައި ވަނީ މަސައްކަތް ފަށާފައިއެވެ. ދެން ރާއްޖޭގައި ޖަހާ ފައިޒާ ވެކްިސންއަކީ އެންމެ ފުރަތަމަވެސް ވަކި ޚާއްސަ ކެޓަގަރީތަކަޖަށް އެޕޮއިންޓްމަންޓް އުސޫލުން ޖަހަމުން އަންނަ ވެކްސިންތަކެކެެވެ.