ފިލިޕީންސްގެ އަސްކަރީ މަތިންދާ ބޯޓު ވެއްޓުނު ހާދިސާގައި 45 މީހަކު މަރުވެއްޖެ

ރަންވޭއަށް ޖައްސަން އުޅުމުގެ ތެރޭގައި ވެއްޓުނު ފިލިޕީންސްގެ އަސްކަރީ މަތިންދާބޯޓުގެ ހާދިސާގައި 45 މީހަކު މަރުވެއްޖެއެވެ.

މި ހާދިސާއާއި ގުޅިގެން އަސްކަރިއްޔާގެ ޖެނެރަލެއް ކަމަށްވާ ކިރިލިޓޯ ސޮބްޖެނާއާ ހަވާލާދީ ރިޕޯޓުކޮށްފައިވާ ގޮތުން ވެއްޓިފައިވަނީ c-130 ބޯޓެވެ. ބޯޓު ވެއްޓުނީ ވެރިކަން ކުރާ މެނީލާއާ 1000 ކިލޯ މީޓަރު ދުރުގައި އޮންނަ ޖޯލޯ އައިލެންޑަށެވެ.

ބީބީސީގައި ރިޕޯޓްކޮށްފައިވާ ގޮތުން މި ބޯޓުގައި 90 މީހަކު ދިޔައީ ދަތުރުކުރަމުންނެވެ. އެގައުމުގެ ޑިފެންސް މިނިސްޓްރީން ބުނެފައިވަނީ މަރުވެފައިވާ މީހުންގެ ތެރޭގައި ގިނައީ އަސްކަރިއްޔާގެ އޮފިސަރުން ކަމަށާއި، އާންމުންގެ 3 މީހަކު މި ހާދިސާގައި މަރުވެފައިވާ ކަމަށެވެ.

ބޯޓު ވެއްޓުމާއެކު އޭގައި ރޯވެފައިވެއެވެ. މި ހާދިސާގައި އެތައް ބަޔަކު ޒަޚަމް ވެފައިވާ އިރު، 5 މީހަކު އަދި ފެނިފައެއް ނުވެއެވެ. މި ހާދިސާގައި އަނިޔާ ލިބުނު މީހުންނަށް ފަރުވާ ދެމުންދަނީ ކައިރި ހިސާބެއްގައި ހުރި އަސްކަރީ ހޮސްޕިޓަލެއްގައެވެ.

ފިލިޕީންސްގެ ގަޑިން 11:30 ގައި ޖައްސަން އުޅުނު ބޯޓު ރަންވޭގައި ޖައްސަން ޖެހޭ ހިސާބަށްވުރެ މާ ދުރަށް ދެވުމުން އަލުން އުދުއްސައިގަންނަށް މަސައްކަތް ކުރި ނަމަވެސް ބޯޓު ވެއްޓުނީ ކަމަށް، ފިލިޕީންސްގެ އަސްކަރިއްޔާއާ ހަވާލާދީ ރިޕޯޓްތައް ބުނެއެވެ. އަދި ބޯޓު ވެއްޓުމުގެ ކުރިން ބައެއް އޮފިސަރުން ބޯޓުން ފުންމާލިތަން ފެނިފައިވާ ކަމަށް އަސްކަރިއްޔާއާ ހަވާލާދީ ރިޕޯޓްތައް ބުނެއެވެ.