މިދިޔަ މަހު އެންމެ ގިނައިން ހުށަހެޅީ މަދަނީ މައްސަލަތައް
4 ޖުލައި 2021 | އާދީއްތަ 12:24ޖުމްލަ 354 މައްސަލަ އެ ކޯޓަށް ހުށަހަޅާފައިވޭ
ހައި ކޯޓު
މިއަހަރުގެ ފުރަތަމަ 6 މަސް ދުވަހު އެންމެ ގިނައިން ހުށަހަޅާފައި ވަނީ މަދަނީ މައްސަލަތައް ކަމަށް ހައިކޯޓުގެ ތަފާސްހިސާބުތަކުން ދައްކައިފިއެވެ.
ހައިކޯޓުން އާންމުކުރި ތަފާސްހިސާބުތައް ދައްކާގޮތުން އެ ބާވަތުގެ 81 މައްސަލަ ހުށަހަޅާފައިވާއިރު ޖިނާއީ 73 މައްސަލަ، ވަޒީފާގެ 38 މައްސަލަ، އަދި ޓެކްސްގެ 19 މައްސަލަ ވެސް ހުށަހަޅާފައިވެއެވެ. މީގެ އިތުރަށް އާއިލީ 12 މައްސަލައާއި، އިންތިހާބީ 7 މައްސަލަ ތަހުވީލުގެ 7 މައްސަލައާއި، އަދި މޮނިކޮންގެ ހަތަރު މައްސަލަ ހުށަހަޅާފައިވާއިރު، ދުސްތޫރީ އެއްވެސް މައްސަލައެއް ހުށަހަޅާފައެއް ނުވެއެވެ.
މިއާއެކު ޖުމްލަ 354 މައްސަލަ އެ ކޯޓަށް ހުށަހަޅާފައިވާއިރު އެންމެ ގިނަ މައްސަލަ އެ ކޯޓަށް ހުށަހަޅާފައި ވަނީ މެއި މަހު އެވެ. އެއީ 76 މައްސަލައެވެ. ޖެނުއަރީ މަހު 58 މައްސަލަ، ފެބްރުއަރީ މަހު 56 މައްސަލަ، މާޗު މަހު 64 މައްސަލަ، އޭޕްރީލް މަހު 52 މައްސަލަ، އަދި ޖޫން މަހު 48 މައްސަލަ ހުށަހަޅާފައިވެއެވެ.
މިދިޔަ 6 މަސްދުވަހު ހުށަހެޅި މައްސަލަތަކުގެ ތެރެއިން އެ ކޯޓުން ރެޖިސްޓަރކޮށްފައި ވަނީ 240 މައްސަލައެވެ. 117 މައްސަލަ ވަނީ ރިޖެކްޓްކޮށްފައެވެ. އެގޮތުން ޖެނުއަރީ މަހު 19 މައްސަލަ ރިޖެކްޓުކޮށް، 24 މައްސަލަ ރެޖިސްޓަރ ކޮށްފައިވާއިރު، ފެބްރުއަރީ މަހު 9 މައްސަލަ ރިޖެކްޓުކޮށްފައިވެއެވެ. އަދި މާޗު މަހާއި މެއި މަހު 26 މައްސަލަ ރިޖެކްޓުކޮށްފައިވާއިރު، އޭޕްރީލް މަހު 13 މައްސަލަ އަދި ޖޫން މަހު 24 މައްސަލަ ރިޖެކްޓުކޮށްފައިވެއެވެ.
އެ ކޯޓުން ފުރަތަމަ 6 މަސްދުވަސް ތެރޭގައި ޖުމްލަ 357 މައްސަލައެއް ބަލައި ނިންމާފައިވެއެވެ. އެގޮތުން އެންމެ ގިނަ މައްސަލަ ބަލާ ނިންމާފައި ވަނީ މާޗު މަހުއެވެ. އެއީ 100 މައްސަލައެވެ. ޖޫން މަހު 52 މައްސަލަ ނިންމި އިރު ޖެނުއަރީ މަހު 74 މައްސަލަ ބަލާ ނިންމާފައިވެއެވެ. އެންމެ މަދު މައްސަލަ ނިންމީ އޭޕްރިލް މަހުއެވެ. އެއީ 29 މައްސަލައެވެ. މޭ މަހު 40 މައްސަލަ އަދި ފެބްރުއަރީ މަހު 32 މައްސަލަ ނިންމާފައިވެއެވެ.
