ޕޯޓުތައް އިތުރަށް ތަރައްގީކުރުމަށް ހާއްސަ މަސައްކަތްތަކެއް ކުރާނަން - ޝާހިދު
ކުންފުނީގެ މެންޑޭޓްގައި ހުރި މަސައްކަތްތައް އިތުރަށް ފުޅާކުރުމުގެ މަސައްކަތްކުރާނަން
އެމްޕީއެލްގެ ސީއީއޯ ޝާހިދު އަލީ
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހިންގަމުންދާ ޕޯޓުތައް ތަރައްގީކުރުމަށް ހާއްސަ އިސްކަމެއްދީގެން މަސައްކަތްކުރާނެ ކަމަށް އެކުންފުނީގެ ސީއީއޯ ޝާހިދު އަލީ ވިދާޅުވެއްޖެއެވެ.
އެމްޕީއެލް އިން ޓްރާންސްޕޯޓްގެ ޚިދުމަތްދިނުން ހުއްޓާލުމާގުޅިގެން ވާހަކަދައްކަވަމުން ސީއީއޯ ޝާހިދު ވަނީ ޓްރާންސްޕޯޓް ސެކްޓަރ، ކުންފުނިން ވަކިވެގެން ދިޔަަނަމަވެސް ކުންފުނީގެ މެންޑޭޓްގައި ހުރި މަސައްކަތްތައް އިތުރަށް ފުޅާކުރުމުގެ މަސައްކަތްކުރާނެ ކަމަށް ވިދާޅުވެފައެވެ. އެގޮތުން މާލެ ކޮމާޝަލް ހާބަރާއި ހުޅުމާލެ އާއި ކުޅުދުއްފުށި އަދި އައްޑޫގައި އެމްޕީއެލް އިން ދެމުންދާ ޚިދުމަތްތައް ފުޅާކޮށް އިތުރު ހަރުފަތަކަށް އެރުވުމުގެ މަސައްކަތްތައް ކުރާނެ ކަމަށް ޝާހިދު ވިދާޅުވިއެވެ.
އޭގެ އިތުރުން މިހާރު މަސައްކަތްކުރަމުންދާ ގުޅީފަޅު ޕޯޓު ޕްރޮޖެކްޓަކީ އެމްޕީއެލް އިން މިހާރު ކުރަމުންދާ އެންމެ ބުރަ އެއް މަސައްކަތްކަމަށާއި މަސައްކަތްތައް ބައްޓަންކުރާއިރު، މިކަމަށް ވެސް ހާއްސަ އިސްކަމެއްދޭން ޖެހޭކަމަށް ޝާހިދު ވިދާޅުވިއެވެ. ޝާހިދު ވަނީ މާލެއިން ގުޅީފަޅަށް ކޮމާޝަލް ހާބަރު ބަދަލުކުރުމަކީ ވަރަށް ގިނަ މަސައްކަތްތައް ކުރަން ޖެހޭނެ ކަމެއް ކަމަށް ވިދާޅުވެފައެވެ. އެގޮތުން ކޮމާޝަލް ހާބަރު ގުޅީފަޅަށް ބަދަލުވެގެންދާއިރު، މަސައްކަތުގެ މާހައުލު އެއްކޮށް ބަދަލުވެގެންދަނީ ކަމަށާއި މިހާރު ބޭނުންކުރަމުންދާ ޓެކްނޮލޮޖީގެ ބަދަލުގައި ޒަމާނީ ޓެކްނޮލޮޖީ ބޭނުންކުރަން ފެށޭނެ ކަމަށް ޝާހިދު ފާހަގަކުރެއްވިއެވެ.
ޝާހިދު ވަނީ ގުޅީފަޅަށް ޕޯޓުގެ މަސައްކަތްތައް ބަދަލުވުމުން ވަރަށް ގިނަ ބަދަލުތަކެއް އަންނާނެ ކަމަށާއި އެކަންކަމަށް ތައްޔާރުވުމަށް ގިނަ މަސައްކަތްތަކެއް ކުރަންޖެހޭނެކަން ފާހަގަކުރައްވާފައެވެ. އެހެންކަމުން މިކަންތައް އެންމެ ފުރިހަމަ ގޮތުގައި ކުރުމަށް ވަރަށް ހާއްސަ ސަމާލުކަމެއް ދޭނެ ކަމަށް ވިދާޅުވިއެވެ. އޭގެ އިތުރުން ސަރުކާރުގެ ސިޔާސަތުތަކާ އެއްގޮތަށް ޕޯޓުތަކުގެ ޚިދުމަތް ފުޅާކުރުމަށް ކުރަމުންދާ މަސައްކަތުގެ ދަށުން ތިނަދޫގައި އިންޓަނޭޝަނަލް ޕޯޓެއް ތަރައްގީކުރުމުގެ މަސައްކަތް ވެސް ކުރިއަށް ގެންދާނެކަމަށް ޝާހިދު ވިދާޅުވިއެވެ.
އެމްޕީއެލް އިން ދެމުންދިޔަ ޓްރާންސްޕޯޓުގެ ހުރިހާ ޚިދުމަތެއް މިހާރު ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ހަވާލުކޮށް އެޚިދުމަތާ އެއްކޮށް އަލްވަދާއު ކިޔާފައެވެ.
