ކާގޯ ފްލައިޓެއްގެ އިންޖީނު ފެއިލްވެ އިމަރޖެންސީކޮށް ކަނޑަށް ޖައްސައިފި

ދެ މީހުންނާއެކު ދަތުރު ކުރަމުންދިޔަ ކާގޯ ފްލައިޓެއްގެ އިންޖީނު ފެއިލްވެ ހަވާއީ ކައިރިން އިމަރޖެންސީކޮށް ކަނޑަށް ޖައްސައިފިއެވެ.

އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން އިން ބުނީ ރޯޑްސް އެކްސްޕްރެސް 810ގެ ފްލައިޓެއް ހަވާއީގެ ވެރިރަށް ހޮނުލުލޫއިން ދަތުރު ކުރަމުންދިޔަ ކަމަށާއި، މި ފްލައިޓް އިމަރޖެންސީކޮށް ކަނޑަށް ޖައްސާފައިވަނީ އެމެރިކާ ގަޑިން 02:30 ގައެވެ.

މި ފްލައިޓުން ދަތުރުކުރި ޕައިލެޓުންނާ ހަވާލާދީ ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން ހަވާއީ ކައިރިން ކަނޑަށް ފްލައިޓް ޖައްސާފައިވަނީ ފްލައިޓުގެ އިންޖީނުގެ މައްސަލަ ޖެހިގެންނެވެ. އިންޖީނުގެ މައްސަލަ ޖެހުމާއެކު ޕައިލެޓުން ވަނީ އަނބުރާ ހޮނުލުލޫއަށް ދާން މަސައްކަތްކޮށްފައެވެ.

އެމެރިކާގެ ކޯސްޓްގާޑާއި ހޮނުލުލޫގެ ފަޔަރ ޑިޕާޓްމަންޓުން ފްލައިޓް ޖެއްސި ސަރަހައްދުގައި އެހީތެރިކަން ފޯރުކޮށްދިނުމަށް ހަރަކާތްތެރިވަމުންދާ ކަަމަށް ވެސް ބޭރުގައި މީޑިއާތަކުގައި ރިޕޯޓްކޮށްފައިވެއެވެ.

މި ފްލައިޓަކީ ބޮއިންގ 737 މަރުކާގެ ކާގޯ ފްލައިޓެކެވެ. ބޮއިންގ 737 މަރުކާގެ ބޯޓުތަކަކީ މީގެ ކުރިން ވެސް ވަރަށް ގިނަ މައްސަލަތައް ޖެހިފައިވާ ބޯޓުތަކެވެ. އެގޮތުން 2019 ވަނަ އަހަރުގެ މާޗު މަހުން ފެށިގެން އުދުހުން މަނާ ކޮށްފައި އޮތުމަށްފަހު، ބޮއިންގ 737 މެކްސްގެ ފްލައިޓްތަކަށް ދަތުރުކުރުމުގެ ހުއްދަ ދީފައިވަނީ މި އަހަރުގެ ކުރީކޮޅުގައެވެ.

ދަތުރުތައް ހުއްޓާލާފައިވަނީ ލަޔަން އެއަރ އަދި އިތިއޯޕިއަން އެއަރގެ ދެ ބޯޓެއް ވެއްޓި، 346 މީހަކު މަރުވި ހާދިސާއަކާ ގުޅިގެންނެވެ. މި ހާދިސާއާ ގުޅިގެން މައްސަލަ ބަލާފައިވާ ފަރާތްތަކުން ބުނި ގޮތުގައި މަތިންދާ ބޯޓުތައް ވެއްޓެން މެދުވެރިވީ ބޯޓުގައި ހިމެނޭ ފްލައިޓް ކޮންޓްރޯލް ސިސްޓަމުގައި ހުރި މައްސަލަތަކެއްގެ ސަބަބުންނެވެ. ބޮއިންގ ކުންފުނިން ވަނީ މިވޭތުވެދިޔަ ދުވަސްތަކުގައި މި މައްސަލަތައް ހައްލު ކުރުމަށް ގިނަ މަސައްކަތްތަކެއް ކޮށްފައެވެ.

މި ހާދިސާ ހިނގި ފަހުން ދުނިޔޭގެ އެންމެ ކާމިޔާބު އެއް ފްލައިޓް އުފައްދާ ކުންފުނި ކަމުގައިވާ ބޮއިންގއަށް، މާކެޓް ވެލިއުގެ 26 ބިލިއަން ޑޮލަރު ވަނީ 2019 ވަނަ އަހަރު ގެއްލިފައެވެ. ބޮއިން ކުންފުންޏަށް މިހާރު ކުރިމަތިވެފައިވާ އެންމެ ބޮޑު މައްސަލަ އަކީ 737 މެކްސް އުދުހުން މަނާ ކުރި ފަހުން އެކުންފުނިން އުފައްދާފައިވާ އެ މަރުކާގެ 450 މަތިންދާ ބޯޓު އެމެރިކާއިން ބޭރު ކުރުމެވެ.