ޕެޓްރޯލް ޝެޑްތަކުން ޚިދުމަތްދޭ ގަޑިތަކަށް ބަދަލުގެނެސްފި

ފިއުލް ސަޕްލައިސް މޯލްޑިވްސް (އެފްއެސްއެމް)ގެ ޕެޓްރޯލް ޝެޑްތަކުން ޚިދުމަތްދޭ ގަނޑިތަކަށް ބަދަލުގެނެސްފިއެވެ.

އެފްއެސްއެމް އިން މާލެ ސަރަހައްދުގައި ގާއިމުކޮށްފައިވާ ހަ ޕެޓްރޯލް ޝެޑުން ޚިދުމަތްދޭ ގަނޑިތަކަށް ވަނީ ބަދަލުގެނަސްފައެވެ. އެގޮތުން ސްޓެލްކޯ ސަރަހައްދުގައި ހުންނަ އީޒީ ފިލް-1، އިންޑަސްޓްރިލް ވިލެޖުގައި ހުރި އީޒީ ފިލް-4ން ނާއި ހުޅުމާލޭގައި ހުރި އީޒީ ފިލް-3ން ދެން ޚިދުމަތްދޭނީ ހޮނިހިރު ދުވަހުން ބުރާސްފަތި ދުވަހަށް ހެނދުނު 09:00ން ރޭގަނޑު 10:30ށް އަދި ހުކުރު ދުވަހުގެ މެންދުރު 02:00ން ރޭގަނޑު 10:30 އަށެވެ.

އޭގެ އިތުރުން އައިޖީއެމްއެޗް ކައިރީ ހުންނަ އިޒީ ފިލް އާއި ކާނިވާ ސަރަހައްދުގައި ހުންނަ އީޒީ ފިލް-2ން ހޮނިހިރު ދުވަހުން ބުރާސްފަތި ދުވަހަށް ޚިދުމަތްދޭނީ ހެނދުނު 09:00ން ރޭގަނޑު 08:00 އަށެވެ. ހުކުރު ދުވަހު މިދެ ޕެޓްރޯލް ޝެޑުން ޚިދުމަތްދޭނީ މެންދުރު 02:00ން ރޭގަނޑު 08:00 އަށެވެ. ތިލަފުށީގައި ހުންނަ އީޒީ ފިލް-5ން ހޮނިހިރު ދުވަހުން ބުރާސްފަތި ދުވަހަށް ޚިދުމަތްދޭނީ ހެނދުނު 09:00ން ރޭގަނޑު 07:00 ށެވެ. ހުކުރު ދުވަހު ޚިދުމަތްދޭނީ މެންދުރު 02:30ން ރޭގަނޑު 07:00 އަށެވެ.

އެފްއެސްއެމްގެ ހުރިހާ ޕެޓްރޯލް ޝެޑެއްވެސް ނަމާދު ގަޑިތަކަށް 20 މިނެޓަށް ބަންދުކުރާނެއެވެ.

މާލޭގައި ހުންނަނީ އެފްއެސްއެމްގެ ހަތަރު ޕެޓްރޯލް ޝެޑެވެ. އައިޖީއެމްއެޗް ކައިރީ ހުންނަ އިޒީ ފިލް ޕެޓްރޯލް ޝެޑް، ސްޓެލްކޯ ސަރަހައްދުގައި ހުންނަ އީޒީ ފިލް-1، ކާނިވާ ސަރަހައްދުގައި ހުންނަ އީޒީ ފިލް-2 އަދި އިންޑަސްޓްރިލް ވިލެޖުގައި ހުރި އީޒީ ފިލް-4 ކެވެ. އޭގެ އިތުރުން ހުޅުމާލޭގައި އެއް ޕެޓްރޯލް ޝެޑް އަދި ތިލަފުށީގައި އެއް ޕެޓްރޯލް ޝެޑް ވަނީ ގާއިމުކޮށްފައެވެ.