ވެކްސިންގެ ދެ ޑޯޒް ޖެހި މީހުންގެ އަދަދު އެއްލައްކަ ނުވަދިހަ ހާހަށް

ރާއްޖޭގައި ކޮވިޑް-19 ވެކްސިންގެ ދެ ޑޯޒް ޖެހި މީހުންގެ އަދަދު އެއްލައްކަ ނުވަދިހަ ހާސް ދުއިސައްތަ ހަތާވީސް (190،227)ށް އަރައިފިއެވެ.

އަންގާރަ ދުވަހު ވެކްސިންގެ ދެ ވަނަ ޑޯޒް ޖަހާފައިވަނީ 698 މީހުންނެވެ. އެއީ މާލެ ސަރަހައްދުން 237 މީހުންނާއި އަތޮޅުތެރެއިން 461 މީހުންނެވެ. ވެކްސިންގެ ފުރަތަމަ ޑޯޒް ޖަހާފައިވަނީ 143 މީހުންނެވެ. އެއީ މާލެ ސަރަހައްދުން 81 މީހުންނާއި އަތޮޅު ތެރެއިން 62 މީހުންނެވެ. މިއާއެކު ރާއްޖެއިން ކޮވިޑް ވެކްސިންގެ ފުރަތަމަ ޑޯޒް ޖަހާފައިވަނީ 316،847 މީހުންނެވެ.

Advertisement

ޖުލައި މަހުގެ ތެރޭގައި ރާއްޖެއަށް ބޭނުންވާ ވެކްސިންގެ ޑޯޒްތައް ލިބިގެންދާނެ ކަމަށް ހެލްތު މިނިސްޓަރ އަޙްމަދު ނަސީމް ވިދާޅުވެފައިވާއިރު، ސަރުކާރުން މިހާރު އެންމެ ބޮޑަށް މަސައްކަތްކުރަނީ ފައިސާ ދައްކާފައިވާ އެސްޓްރަޒެނިކާ ކޮވިޑް ވެކްސިން ޑޯޒްތައް ރާއްޖެ ގެނައުމަށެވެ. އޭގެ އިތުރުން ރަޝިއާގެ ސްޕަޓްނިކްވީ ހޯދުމުގެ މަސައްކަތް ވެސް ކުރަމުންދާއިރު، އެމެރިކާއިން ވަނީ އެގައުމުން ވެކްސިން ފޯރުކޮށްދޭން ނިންމާފައިވާ ގައުމުތަކުގެ ލިސްޓުގައި ރާއްޖެ ހިމަނާފައެވެ.

ރާއްޖޭގެ ކޮވިޑް-19 ވެކްސިނޭޝަން ޕްރޮގްރާމް ފެބްރުއަރީ 1ވަނަ ދުވަހު ފަށާފައިވާއިރު، އެންމެ ފުރަތަމަ ރާއްޖޭގައި ބޭނުންކުރުމުގެ ހުއްދަ ދީފައި ވަނީ ކޮވިޝީލްޑް ވެކްސިނެވެ. އޭގެ އިތުރުން ބަޔޯއެންޓެކް އަދި ފައިޒަރ ގުޅިގެން އުފައްދާފައިވާ ކޮވިޑް-19 ވެކްސިނާއި، ޗައިނާގެ ސިނޮފަރމް ކުންފުނީގެ ކޮވިޑް ވެކްސިނާއި، އެސްޓްރަޒެނިކާ ކުންފުނީގެ ކޮވިޑް ވެކްސިންގެ އިތުރުން، ސްޕަޓްނިކްވީ، މޮޑާނާގެ ކޮވިޑް ވެކްސިން، އަދި ޖޯންސަން އެންޑް ޖޯންސަންގެ ވެކްސިން ބޭނުންކުރުމުގެ ހުއްދަ ރާއްޖެއިން ވަނީ މިހާރު ދީފައެވެ.