އޮޑިޓަރ ޖެނެރަލްގެ މަގާމަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވި ނަމާ ގުޅޭގޮތުން އާންމުންގެ ޚިޔާލު ހޯދަނީ
30 ޖޫން 2021 | ބުދަ 10:52އޮޑިޓަރ ޖެނެރަލްގެ މަގާމަށް އައްޔަނުކުރެއްވުމަށް ފޮނުއްވާފައިވަނީ ހުސައިން ނިޔާޒީގެ ނަން
ރައްޔިތުންގެ މަޖިލިސް
އޮޑިޓަރ ޖެނެރަލްގެ މަގާމަށް ބޭފުޅަކު ހަމަޖެއްސެވުމަށް ރައީސުލްޖުމްހޫރިއްޔާ ފޮނުއްވާފައިވާ ނަމާ ގުޅޭގޮތުން އާންމުގެ ޚިޔާލު ހޯދުމަށް ހުޅުވާލައިފިއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައިވަނީ އޮޑިޓް ގާނޫނުގެ 2 ވަނަ މާއްދާގައިވާ ގޮތުގެމަތިން، އޮޑިޓަރ ޖެނެރަލްގެ މަގާމަށް ހުސައިން ނިޔާޒީ، ގ. އައިފަ، އައްޔަނު ކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅު އިއްވަވާފައެވެ. ރައީސުލްޖުމްހޫރިއްޔާ ފޮނުއްވާފައިވާ ނަން ދިރާސާކުރެއްވުމަށް ފޮނުއްވާފައިވަނީ މާލިއްޔަތު ކޮމިޓީއަށެވެ.
ރައްޔިތުންގެ މަޖިލީހުގެ އިދާރާއިން އާންމުކޮށްފައިވާ އިއުލާނެއްގައި ބުނެފައިވަނީ ރައީސް ފޮނުއްވާފައިވާ ނަމާ ދޭތެރޭ އެއްވެސް ޝަކުވާއެއްވާނަމަ، 4 ޖުލައި ވާ އާދީއްތަ ދުވަހުގެ 10:00 ގެ ކުރިން، ޝަކުވާ ހުށަހަޅުއްވާ ފަރާތުގެ ފުރިހަމަ ނަމާއި، ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭނެ ގޮތަށް ކޮމިޓީގެ އީމެއިލްއެޑްރެސް Public.accounts_committee@majlis.gov.mv އަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުއްވައި ދެއްވުމަށް އެދޭކަމަށެވެ.
އޮޑިޓަރ ޖެނެރަލްގެ މަގާމު ހުސްވެފައިވަނީ ބޮޑު ޚިޔާނާތުން މަންފާވިކަމަށް އެސެޓް ރިކަވަރީ ކޮމިޝަނުން އެކުލަވާލާފައިވާ ލިސްޓުގައި އޮޑިޓަރ ޖެނެރަލް ކަމުގައި ހުންނެވި ހަސަން ޒިޔާތު ހިމެނިވަޑައިގެންފައިވާތީ އެ މަނިކުފާނު އަމިއްލަފުޅަށް އިސްތިއުފާ ދެއްވުމުންނެވެ. ޒިޔާތު އިސްތިއުފާ ދެއްވާފައިވަނީ މިދިޔަ މެއި މަހުގެ 12 ވަނަ ދުވަހުއެވެ.
