ބަލިމީހާއަށް އަނިޔާކުރި ބިދޭސީ މީހާ، ޝަރީއަތް ނިމެންދެން ބަންދުގައި ބަހައްޓަނީ
29 ޖޫން 2021 | އަންގާރަ 17:29މި ބިދޭސީ މީހާ ހައްޔަރުކޮށްފައިވަނީ މޭ 26ވަނަ ދުވަހު
ބަލިމީހާއަށް ބިދޭސީ މީހާ އަނިޔާ ކުރަނީ
ހުޅުމާލެ މެޑިކަލް ފެސިލިޓީގައި އޮތް ބަލި މީހެއްގެ ގައިގައި ތަޅައި އަނިޔާކުރި ބިދޭސީ މީހާ، ޝަރީއަތް ނިމެންދެން ބަންދުގައި ބަހައްޓަން ނިންމައިފިއެވެ.
ޕަބްލިކް ޕްރޮސިކިއުޓަރ އަޙްމަދު ޝަފީޢު ވިދާޅުވީ މޭ 26ވަނަ ދުވަހު، ހުޅުމާލެ މެޑިކަލް ފެސިލިޓީގައި އެޑްމިޓްކޮށްފައި އޮތް ބަލިމީހެއްގެ ގައިގާ، އޭނާގެ އެހީތެރިއެއްގެ ގޮތުގައި ޢާއިލާގެ ފަރާތުން ހަމަޖައްސާފައި ހުރި ބަނގްލަދޭޝް ރައްޔިތެއް ކަމަށްވާ ޝަރިފް ޚާން ޖެހި މައްސަލާގައި، ޝަރިފް ޚާންގެ މައްޗަށް (ޤާނޫނު ނަންބަރު: 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 120ވަނަ މާއްދާގެ (ހ) ގެ (1) ވަނަ ނަންބަރާ ޙަވާލާދީ، އެ މާއްދާގެ (ށ) ގެ 2ވަނަ ނަންބަރުގެ ދަށުން)، އަނިޔާއެއް ދިނުމުގެ ކުށުގެ ދަޢުވާ، 29 ޖޫން 2021 ދުވަހު ހުޅުމާލެ މެޖިސްޓްރޭޓް ކޯޓަށް ހުށަހަޅާފައިވާ ކަމަށެވެ.
އަދި މި ދަޢުވާއާ ގުޅިގެން އަންގާރަ ދުވަހު ބޭއްވި އަޑުއެހުމުގައި ޝަރީޢަތް ނިމެންދެން އޭނާ ބަންދު ކޮށްދިނުމަށް ދައުލަތުން އެދުމުން، ހުޅުމާލެ މެޖިސްޓްރޭޓް ކޯޓުން އެގޮތަށް އަމުރު ކޮށްފައިވާ ކަމަށް ވެސް ޝަފީޢު ވިދާޅުވިއެވެ.
މި މައްސަލާގެ ތަހުގީގު މަރުހަލާ ފުލުހުން ނިންމައި، ޕީޖީ އޮފީހަށް ފޮނުވާފައިވަނީ މި މަހުގެ 24ވަނަ ދުވަހުއެވެ.
ބަލި މީހާއަށް އަނިޔާކުރާ ތަން ވީޑިއޯ ކޮށްފައިވަނީ އެ ފެސިލިޓީގައި އޮތް އެހެން ބަލި މީހެކެވެ. އާންމުވެފައިވާ މި ވީޑިއޯގައި، އެމީހާއަށް އަނިޔާކުރާތަނާއި، އެމީހާ ރޯ އަޑު އިވެއެވެ. އަދި އެހީއަށް އެދުމުން އެމީހާއަށް އަޑުލައި ހަޅޭއް ލަވައި، ރުއިމުން ކޯމަތީގައި ބާރަށް ޖަހާތަން ވެސް ފެނެއެވެ. އަދި ރުއިން ހުއްޓާލަން އިންޒާރުދޭ ތަން ވެސް ފެނެއެވެ.
