ދެކުނު އެފްރިކާގެ ކުރީގެ ރައީސް ޖޭކޮބް ޒޫމާ 15 މަހަށް ޖަލަށްލުމަށް އެ ގައުމުގެ އެންމެ މަތީ ކޯޓުން ހުކުމްކޮށްފިއެވެ.

ފުލުހުންނާއި އަމިއްލައަށް ހަވާލުވެވަޑައިގެންނެވުމަށް ޒޫމާއަށް ފަސް ދުވަހުގެ މުހުލަތެއް ދީފައިވާއިރު މި މުއްދަތުގެ ތެރޭގައި އަމިއްލައަށް ހަވާލު ނުވެއްޖެނަމަ ޒޫމާ ހައްޔަރުކުރަން ފުލުހުންނާއި ބެހޭ މިނިސްޓަރު އަމުރު ނެރެންވާނެ ކަމަށް އެންމެ މަތީ ކޯޓުން ކުރި ހުކުމްގައި ވަނީ ބުނެފައެވެ.

ޒޫމާ 15 މަހަށް ޖަލަށްލުމަށް ހުކުމްކޮށްފައި ވަނީ އޭނާ ދެކުނު އެފްރިކާގެ ރައީސްގެ މަގާމުގައި ހުންނެވިއިރު ހިންގެވި ކޮރަޕްޝަނުގެ މައްސަލައިގެ ތަހުގީގުގެ މަރުހަލާގައި ކޮންސްޓިޓިއުޝަނަލް ކޯޓަށް ހާޒިރުވުމަށް އެންގުމުމާ ޚިލާފުވުމަކީ ކޯޓުގެ ހުރުމަތް ކަނޑުންކަމަށް ބުނެއެވެ.

ޒޫމާގެ މައްޗަށް ދައުވާކުރަނީ އޭނާގެ ވެރިކަމުގެ ދުވަސްވަރު ހިންގެވި ހަތިޔާރުގަތުމުގެ ވިޔަފާރީގެ ޑީލްގައި ކޮރަޕްޝަން ހިމެނޭ މައްސަލައިގައެވެ. އެއީ 2.5 ބިލިއަން ޑޮލަރުގެ ހަތިޔާރުގެ ވިޔަފާރީގެ މުއާމާލާތެކެވެ.

ކޮރަޕްޝަނުގެ ތުހުމަތުތަކާ ގުޅިގެން މަގާމުން ޢަޒުލް ކުރުމުގެ މަސައްކަތް ފަށާފައި ވަނިކޮށް ޒޫމާ އިސްތިޢުފާ ދެއްވާފައި ވަނީ 2018 ވަނަ އަހަރުގެ ފެބްރުއަރީ މަހުގެ 15 ވަނަ ދުވަހުއެވެ. ޒޫމާ އިސްތިޢުފާ ދެއްވީ، އޭނާގެ މައްޗަށް ކުރެވިފައިވާ ކޮރަޕްޝަނުގެ ތުހުމަތުތަކާ ގުޅިގެން ވެރިކަމުން އިސްތިއުފާ ދެއްވުމަށް ގޮވާލައި ރައްޔިތުންނާއި، އޭނާ ނިސްބަތްވާ ޕާޓީން ވެސް ފިއްތުންތައް ކުރިމަތި ކުރުމުންނެވެ.

ކޮރަޕްޝަނުގެ ވަރަށް ގިނަ ތުހުމަތުތައް ޒޫމާގެ މައްޗަށް ވަނީ ކުރެވިފައެވެ.