"އާސްކް ސްޕީކަރ" މިފަހަރު ކްލަބް ހައުސް މެދުވެރިކޮށް

ރައްޔިތުންގެ މަޖިލީހާ ގުޅޭގޮތުން ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ބާއްވަވާ އާސްކް ސްޕީކާ ޕްރޮގްރާމްގެ ތިންވަނަ ޕްރޮގްރާމް ކްލަބް ހައުސް އެޕްލިކޭޝަން މެދުވެރިކޮށް ބާއްވަން ނިންމައިފިއެވެ.

ޓީވީއާއި ސޯޝަލް މީޑިއާ މެދުވެރިކޮށް، ރައްޔިތުންގެ ސުވާލުތަކަށް ޖަވާބު ދިނުމަށް ބާއްވާ، "އާސްކް ސްޕީކަރ" ޕްރޮގްރާމް އޮންނާނީ ޖުލައި ފަސް ވަނަ ދުވަހުގެ ރޭގަނޑު 9:00 ގައެވެ. މި ފަހަރުގެ ޕްރޮގްރާމް ވަރޗުއަލްކޮށް ކުރިއަށް ގެންދާއިރު، ކްލަބް ހައުސް މެދުވެރިކޮށް ލައިވްކޮށް ސުވާލުކުރުމުގެ ފުރުސަތު ބައިވެރިންނަށް ލިބޭނެއެވެ. އަދި ޓީވީ ޗެނަލްތަކުންނާއި ސޯޝަލް މީޑިއާގެ ވަސީލަތްތަކުން ޕްރޮގްރާމް ވަގުތުން ބަލައިލެވޭނެއެވެ.

މި ޕްރޮގްރާމުގައި ލައިވްކޮށް ސުވާލުކުރަން ބޭނުންވާ ފަރާތްތަކުން ނަން ނޯޓުކުރުމުގެ ފުރުސަތުވަނީ ހުޅުވާލާފައެވެ. އެގޮތުން އެފަރާތުގެ ނަމާއި ކުރަން ބޭނުންވާ ސުވާލު، ޖުލައި ފަސް ވަނަ ދުވަހުގެ މެންދުރު 2:00 ގެ ކުރިން ރައްޔިތުންގެ މަޖިލީހުގެ އިދާރާގެ މީޑިއާ ސެކްޝަންގެ ހޮޓްލައިން ނަންބަރު 7234566ށް ފޮނުވުމަށް ވަނީ އެދިފައެވެ. އަދި ކްލަބް ހައުސް މެދުވެރިކޮށް ސުވާލުކުރަން ބޭނުންވާ ފަރާތްތަކުން އެ ފަރާތެއްގެ ނަން އަދި ކްލަބް ހައުސް އެކައުންޓުގެ ނަން މީޑިއާ ސެކްޝަންގެ ހޮޓްލައިން ނަންބަރަށް ފޮނުވުމަށް ވަނީ އެދިފައެވެ.

މީގެ އިތުރުން މަޖިލީހުގެ ރައީސާ ސުވާލުކުރަން ބޭނުންވާ ފަރާތްތަކަށް ސުވާލު ފޮނުވުމުގެ ފުރުސަތު ވެސް ވަނީ ހުޅުވާލާފައެވެ. އެގޮތުން ފޯނުން ވީޑިއޯ ކުރުމަށްފަހު ނުވަތަ މެސެޖު މެދުވެރިކޮށް ސުވާލުކުރެވޭގޮތް ވަނީ ހަމަޖައްސާފައެވެ. އަދި ސޯޝަލް މީޑިއާ މެދުވެރިކޮށް ސުވާލުކުރަން ބޭނުންވާ ފަރާތްތައް، ސުވާލު ޕޯސްޓު ކުރާއިރު AskSpeaker# ބޭނުންކުރުމަށް މަޖިލީހުގެ އިދާރާއިން އެދެއެވެ.

"އާސްކްސްޕީކަރ" ޕްރޮގްރާމަކީ ރައްޔިތުންގެ މަޖިލީހުގެ އިދާރާއިން ކުރިއަށް ގެންދާ ލައިވް ޕްރޮގްރާމެކެވެ. މިއީ މިގޮތަށް ޢާންމުކޮށް ރައްޔިތުންނަށް ހުޅުވާލައިގެން ރައްޔިތުންގެ ސުވާލުތަކަށް ޖަވާބު ދެއްވުމަށް ރައްޔިތުންގެ މަޖިލީހުގެ ރައީސް ބާއްވަވާ ތިންވަނަ ޕްރޮގްރާމެވެ.