ރާއްޖޭގެ އެކި ސަރަހައްދުތަކުގައި ހަމަނުޖެހުން ނަގާލުމަށް ބަޔަކު ރާވަމުންދާކަމަށް ބުނެ ފުލުހުން ބުދަ ދުވަހު ބަޔާނެއް ނެރެފިއެެވެ.

ސިޔާސީ ގޮތުން ހަލަބޮލިވާ ކޮންމެ ވަގުތަކު ފުލުހުންގެ އާދަ ކާދައިގެ މަތިން، ނެރެފައިވާ ބަޔާނެއްގައި ބުނެފައިވަނީ، މާލެއާއި ރާއްޖޭގެ އެކި ކަންކޮޅުތަކުގައި ބަޔަކު ހަމަ ނުޖެހުން އުފައްދަން ރާވަމުންދާކަމުގެ މައުލޫމާތު ފުލުހުންނަށް ލިބިފައިވާކަމަށެވެ. އެހެންކަމުން މާލެއާއި އަތޮޅުތެރޭގެ ސަލާމަތީ ކަންކަން ބެލެހެއްޓުމަށް ޓަކައި އިތުރު ފިޔަވަޅުތައް އެޅުމަށް ނިންމާފައިވާކަމަށް ފުލުހުން ބުންޏެވެ.

ރާއްޖޭގެ އެއްވެސް ހިސާބެއްގައި ހަމަ ނުޖެހުން ހިންގުމުގެ ފުރުސަތު ފުލުހުން ނުދޭނޭކަމަށްވެސް މި ބަޔާނުގައި ވެއެވެ.

ހަމަ ނުޖެހުން ހިންގުމަށް ރާވައި، އެފަދަ އަަމަލެއް ކުރަން އުޅޭކަމަށް ބެލެވޭ ފަރާތްތަކާއި މެދު ގާނޫނީ ފިޔަވަޅު އަޅާނެކަމުގް އިންޒާރު ފުލުހުން ވަނީ ދީފައެވެ.

ފުލުހުން މި ބަޔާން ނެރެ މިފަދަ އިލްތިމާސެއް ކޮށްފައިވާއިރު، މާލޭގައި ދާދި ފަހުން ހިންގި ގްރޫޕްމާރާމާރީތަކެއް ފިޔަވާ ފާއިތުވެ ދިޔަ ދުވަސް ތަކުގައި ހަމަނުޖެހުން ގެއެްލޭފަދަ އެއްވެސް ހަރަކާތެއް އަދި މުޒާހަރާއެއްވެސް އިދިކޮޅު ފަރާތްތަކުން ވެސް ބާއްވާފައެއް ނުވެއެވެ.

އެހެންނަމަވެސް މިމަހުގެ 24 ވަނަ ދުވަހަށް ތާވަލް ކުރެވިފައިވާ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ އޮންނަ ދުވަހަށް، އެކަމަށް ސަޕޯޓް ދިނުމުގެ ގޮތުން ވީހާވެސް ގިނަ ބަޔަކު މާލެ އައުމަށް އިދިކޮޅު ގުޅިފައިވާ ސިޔާސީ ޕާޓީތަކުން ވަނީ ގޮވާލާފައެވެ.