ލޯކަލް ކައުންސިލް އިންތިހާބުގެ ރަސްމީ ނަތީޖާ މި ހަފްތާގެ ތެރޭގައި އިއުލާނުކޮށް ނިންމާލެވޭނެ ކަމަށް އިލެކްޝަންސް ކޮމިޝަނުން ހާމަކޮށްފި އެވެ.

އިލެކްޝަންސް ކޮމިޝަނުގެ  މެންބަރު އަހުމަދު އަކްރަމު ވިދާޅުވީ، ކައުންސިލް އިންތިހާބުގެ ރަސްމީ ނަތީޖާ އިއުލާނުކުރުން މި ހަފްތާގެ ތެރޭގައި ފެށިގެންދާނެ ކަމަށާއި، މީގެ ކުރިން ބޭއްވި ލޯކަލް ކައުންސިލް އިންތިހާބުގެ ނަތީޖާއަށް ވުރެ ކުރިން މި ފަހަރުގެ ލޯކަލް ކައުންސިލް އިންތިހާބު އިއުލާނު ކުރައްވާނެ ކަމަށެވެ.

އަކްރަމް ވިދާޅުވީ، އާއްމު އިންތިހާބުތަކާބެހޭ ގަވައިދުގައި އިންތިހާބުގެ ރަސްމީ ނަތީޖާ 14 ދުވަހުގެ ތެރޭގައި އިއުލާނު ކުރަން ޖެހޭ އިރު, 2014 ގައި ބޭއްވުނު ލޯކަލް ކައުންސިލް އިންތިހާބުގެ ރަސްމީ ނަތީޖާ އިއުލާނުކޮށްފައިވަނީ އިންތިހާބު ބޭއްވުނުތާ 13 ދުވަހުގެ ތެރޭގައި ކަމަށެވެ. އަދި މިފަހަރުގެ ލޯކަލް ކައުންސިލް އިންތިހާބުގެ ނަތީޖާ، އެއަށްވުރެ ކުރިން އިއުލާނުކޮށް ނިންމާލެވޭނެ ކަމަށް އަކްރަމް ވިދާޅުވި އެވެ.

ލޯކަލް ކައުންސިލް އިންތިހާބުގެ ވަގުތީ ނަތީޖާ އިއުލާނުކޮށް ނިންމާލާފައިވަނީ، މިދިޔަ އާދިއްތަ ދުވަހު އެވެ.

މިމަހުގެ 6 ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި 653 ކައުންސިލަރުން އިންތިހާބު ކުރާނެ އެވެ. މީގެ ތެރޭގައި ހިމެނެނީ 179 ރަށު ކައުންސިލަށް 563 ކައުންސިލަރުންނާއި 18 އަތޮޅު ކައުންސިލަށް 67 ކައުންސިލަރުންނާއި މާލެ އާއި އައްޑޫ އަދި ފުވައްމުލަކު ސިޓީ ކައުންސިލަށް 23 ކައުންސިލަރުންނެވެ.

މިއިންތިހާބުގައި 1497 ކެންޑިޑޭޓުން ވާދަކޮށްފައިވެއެވެ. ވޯޓްލުމުގެ ހައްގު 255،987 މީހުންނަށް ލިބިފައިވީ ނަމަވެސް އިންތިހާބުގައި ވޯޓްލާން ނިކުމެފައިވަނީ ނިސްބަތުން މަދު އަދަދެކެވެ. ކައުންސިލް އިންތިހާބުގައި ވޯޓްލުމަށް 422 ވޯޓް ފޮށި ބެހެއްޓުނު އިރު މި އިންތިހާބަށް ހާއްސަކޮށްގެން 431،939 ވޯޓް ކަރުދާސްކޮޅު ވަނީ ޗާޕްކޮށްފަ އެވެ.

މި އިންތިހާބުގެ ވަގުތީ ނަތީޖާއަށް ބަލާއިރު އެންމެ ބޮޑު ކާމިޔާބީއެއް ހޯދާފައިވަނީ އިދިކޮޅު އެމްޑީޕީންނެވެ. އެގޮތުން އެމްޑީޕީއަށް 300 އަށް ވުރެ ގިނަ ގޮޑި ވަނީ ކާމިޔާބުވެފަ އެވެ. ދެވަނައަށް އެންމެ ގިނަ ގޮޑި ކާމިޔާބު ކޮށްފައިވަނީ، ވެރިކަން ކުރާ ޕީޕީއެމް އިން ނެވެ.