ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާގައި އެކުއެޑޯއާ އެއްވަރުވެ، ބްރެޒިލުގެ މޮޅުވުމުގެ ރިކޯޑަށް ނިމުން އަތުވެއްޖެއެވެ.
އަމިއްލަ ގައުމުގައި ކުރިއަށްދާ މި މުބާރާތުގައި ކުޅުނު މެޗުން ބްރެޒިލް އެއްވަރުވީ އެކުއެޑޯއާ 1-1 ގެ ނަތީޖާއަކުންނެވެ. މި މެޗުގެ ކުރިން ބްރެޒިލުން ވަނީ އެންމެ ފަހުން ކުޅުނު 10 މެޗުންވެސް މޮޅުވެފައެވެ.
ހޯމަ ދުވަހުގެ ފަތިހު ކުޅުނު މެޗުގެ ފުރަތަމަ ހާފުގައި ބްރެޒިލުން ވަނީ ލީޑު ނަގާފައެވެ. މެޗުގެ 37 ވަނަ މިނެޓުގައި މި ލަނޑު އެ ގައުމަށް ކާމިޔާބުކޮށްދިނީ އެޑާ މިލިޓާއޯއެވެ. މިއީ އުމުރުން 23 އަހަރުގެ ޑިފެންޑަރު ބްރެޒިލުގެ ޖާޒީގައި ކާމިޔާބުކުރި ފުރަތަމަ ލަނޑެވެ. މެޗުގެ ފުރަތަމަ ހާފުގައި ބްރެޒިލުން ލީޑު ނެގި ނަމަވެސް، ދެވަނަ ހާފު ފަށައިގެން އަށްވަނަ މިނެޓުގައި އެކުއެޑޯއިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ގައުމަށް ކާމިޔާބުކޮށްދިނީ އެންހެލް މެނާއެވެ.
މި މެޗު އެއްވަރުޗި ނަމަވެސް، އެންމެ ފަހުގެ ޗެމްޕިއަން ކަމަށްވާ ބްރެޒިލުން ވަނީ މީގެ ކުރިން ކުއާޓާ ފައިނަލުން ފުރުސަތު ހޯދާފައެވެ. ގްރޫޕް ބީ ގެ އެއްވަނައި ބްރެޒިލް އޮތީ ކުޅުނު ހަތަރު މެޗުން 10 ޕޮއިންޓް ހަމަކޮށްގެންނެވެ. މި ގްރޫޕުގެ ދެވަަނައަށް ދިޔައީ ހޯމަ ދުވަހުގެ ފަތިހު ވެެނެޒުއޭލާ އަތުން 1-0 ގެ ނަތީޖާއަކުން ބަލިވި ޕެރޫއެވެ. އެ ޓީމަށް ވަނީ ހަތަރު މެޗުން ހަތް ޕޮއިންޓް ލިބިފައެވެ. ދެން މި ގްރޫޕުން ކުއާޓާ ފައިނަލުގެ ދެ ޖާގަ ލިބުނީ ތިންވަަނައިގައި ނިންމާލި ކޮލަމްބިއާ އާއި ހަތަރުވަނަ ލިބުނު އެކުއެޑޯއަށެވެ.
