ފްލޮރިޑާގައި އިމާރާތް ވެއްޓުނު ހާދިސާގައި މިހާތަނަށް ފަސް މަރު

ފްލޮރިޑާގެ އާންމުން ދިރިއުޅެމުން އައި އިމާރާތެއް ވެއްޓުނު ހާދިސާގައި މިހާތަނަށް 5 މީހަކު މަރުވެއްޖެއެވެ.

މިއާމީ ޑޭޑް ކައުންޓީ މޭޔަރ ޑެނިއެލާ ލެވިން ކާވާ ވިދާޅުވީ ބިމާ ހަމަވެފައިވާ އިމާރާތުގެ ދަށުން ހޮނިހިރު ދުވަހުގެ ނިޔަލަށް 5 މީހެއްގެ ހަށިގަނޑު ފެނިފައިވާ ކަމަށެވެ. މީގެ އިތުރުން އަދިވެސް އިމާރާތުގެ ދަށުގައި މީހުން ތާށިވެފައި ތިބެދާނެ ކަމަށް ބެލެވޭ ކަމަށް މީހުން ސަލާމަތްކުރުމުގައި ހަރަކާތްތެރިވާ މީހުންނާއި ހަވާލާދީ މޭޔަރު ވަނީ ވިދާޅުވެފައެވެ.

މަރުވި މީހުން ދެނެގަތުމަށް އުނދަގޫތަކެއް އެބަހުރި ކަމަށް ވެސް މޭޔަރު ވިދާޅުވިއެވެ. އަދި އެއީ ކޮންބައެއްކަން ކަށަވަރު ކުރުމަށްޓަކައި ޑީއެންއޭ ހެދުމުގެ މަސައްކަތް ކުރަމުންދާ ކަމަށާއި، އިމާރާތުގައި ދިރިއުޅެމުން ދިޔަ އާއިލާތަކުގެ ޑީއެންއޭ އެއްކުރަމުންދާ ކަމަށެވެ.

މިހާތަނަށް ދެނެގަނެވިފައިވާ މީހުންގެ ތެރޭގައި ހިމެނެނީ 83 އަހަރުގެ އެންޓޯނިއޯ ލޮޒާނޯ އާއި 79 އަހަރުގެ ގްލެޑީސް ލޮޒާނޯގެ އިތުރުން 54 އަހަރުގެ މެނުއެލް ލަފޮންޓް ކަމަށް މިއާމީ ޑޭޑް ގެ ފުލުހުން ވަނީ ބުނެފައެވެ. މީގެ ކުރިން 54 އަހަރުގެ ސްޓޭސީ ފެންގް ވެސް ވަނީ ދެނެގަނެވިފައެވެ.

އެންޓޯނިއޯ އާއި ގްލޭޑީސްގެ ހަށިގަނޑު ފެނިފައިވަނީ އިމާރާތުގެ 903 ވަނަ އެޕާޓްމަންޓުންނެވެ. އެންޓޯނިއޯގެ ހަށިގަނޑު ފެނުނީ މި މަހުގެ 24 ވަނަ ދުވަހުއެވެ. އަދި ގްލެޑީސްގެ ހަށިގަނޑު ފެނުނީ 25 ވަނަ ދުވަހުއެވެ.

5 ވަނައަށް ފެނުނު މީހާއަކީ ކާކުކަމެއް މިހާތަނަށް ދެނެގަނެވިފައެއް ނުވެއެވެ. މިހާތަނަށް 130 މީހަކު ސަލާމަތް ކުރެވިފައިވާ އިރު، 156 މީހަކު އަދިވެސް ނުފެނެއެވެ. އަދި މިހާތަނަށް އައި އިރު އިމާރާތް ވެއްޓެން ދިމާވި ސަބަބެއް ވެސް ފުލުހުން ހާމަކޮށްފައެއް ނުވެއެވެ.

އިމާރާތުގެ 136 ޔުނިޓްގެ ތެރެއިން 55 ޔުނިޓެއް ވަނީ ބިމާ ހަމަވެފައެވެ. އިމާރާތް ވެއްޓުނީ ބުރާސްފަތި ދުވަހުގެ ދަންވަރު 1:30 ހާއިރުއެވެ.