އެމްޑީޕީގެ 16 ވަނަ އަހަރީ ދުވަސް ފާހަގަ ކުރުމުގެ ގޮތުން ދިދަ ނަގައިފި
26 ޖޫން 2021 | ހޮނިހިރު 03:59މި ރަސްމިއްޔާތުގައި ގައުމީ ދިދަ ވެސް ނަގާފައިވޭ
އެމްޑީޕީން އެ ޕާޓިގެ 16 ވަނަ އަހަރީ ދުވަހުގެ މުނާސަބަތުގައި ބޭއްވި ދިދަ ނެގުމުގެ ރަސްމިއްޔާތު
ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ށް 16 އަހަރު ފުރުން ފާހަގަކޮށް ދިދަ ނަގައިފިއެވެ.
ހޮނިހިރު ދުވަހުގެ ހެނދުނު ހެނދުނު 6:00ގައި އެމްޑީޕީ ހަރުގޭގައި ދިދަ ނެގުމުގެ ރަސްމިއްޔާތު ބާއްވާފައިވާއިރު އެ ރަސްމިއްޔާތަށް ފަހު އެމްޑީޕީ އޮފީހުގައި ވެސް ދިދަ ނަގާފައިވެއެވެ. މީގެ އިތުރުން ބައެއް ރަށްރަށުން ވެސް ވަރޗުއަލްކޮށް ރަސްމިއްޔާތުގައި ބައިވެރިވެ އަހަރީ ދުވަސް ފާހަގަކޮށް ދިދަ ނަގާފައިވެއެވެ.
މި ރަސްމިއްޔާތުގައި ގައުމީ ދިދަ ވެސް ނަގާފައިވާއިރު ގައުމީ ދިދަ ނަގާފައިވަނީ ޕާޓީގެ ނާއިބު ރައީސް މުހައްމަދު ޝިފާޒެވެ. އެމްޑީޕީގެ ދިދަ ނަގާފައިވަނީ އެ ޕާޓީގެ ޗެއާޕަރސަން ހަސަން ލަތީފެވެ. މި ރަސްމިއްޔާތުގައި އެމްޑީޕީގެ ގައުމީ މަޖިލީހުގެ މެންބަރުން ވެސް ބައިވެރިވެފައިވަނީ ވަރޗުއަލްކޮށެވެ.
ދިދަ ނެގުމަށްފަހު ފުވައްމުލަކު ސިޓީގެ މޭޔަރު އިސްމާއިލް ރަފީގު، އައްޑޫ ސިޓީގެ މޭޔަރު އަލީ ނިޒާރު އަދި ކުޅުދުއްފުށި ސިޓީގެ މޭޔަރު މުހައްމަދު އާތިފް ވަނީ ވާހަކަ ދައްކަވާފައެވެ. ތިން ބޭފުޅުންގެ ވާހަކައިގައި އެމްޑީޕީ އުފެދުނު ހިސާބުން މިއަދާހަމައަށް މުހިއްމު ގިނަ މަސައްކަތްތަކެއް ކުރެވުނު ކަމަށާ ކުރެވިފައިވާ ބައެއް މުހިއްމު މަސައްކަތްތަކުގެ ވާހަކައަށް ވަނީ އަލިއަޅުއްވާލައްވާފައެވެ.
26 ޖޫން 2005 ގައި ރަޖިސްޓްރީ ކުރި އެމްޑީޕީގެ 16 ވަނަ އަހަރީ ދުވަސް ފާހަގަކުރާއިރު، އެޕާޓީން ވަނީ ޑިމޮކްރަސީ ރާއްޖެއަށް ގެނައުމުގައި ގިނަ މަސައްކަތްތައް ކޮށްފައެވެ. މީގެ އިތުރުން 2018 ގައި ބޭއްވި ރިޔާސީ އިންތިޚާބާއި، 19 ރައްޔިތުންގެ މަޖިލިސް އިންތިޚާބުގައި އެމްޑީޕީއަށް ވަނީ ބޮޑު ކާމިޔާބީއެއް ލިބިގެން ގޮސްފައެވެ. އަދި ބައި ލައްކައަށް ވުރެ ގިނަ މެމްބަރުންނާއެކު ރާއްޖޭގައި އޮތް އެންމެ ބޮޑު ސިޔާސީ ޕާޓީއަކީ ވެސް އެމްޑީޕީއެވެ.
